Ɛnyɛlɔ
18 L’ɔkɔngɔ wa laasɔ, dimi lakɛnyi ondjelo okina wele la lowandji l’efula ayaholɔ oma l’olongo ndo nkɛtɛ yakahɛtɛ l’osase wa lotombo lande. 2 Ko nde akawelɛ la dui dia wolo ate: “Tɔ kambɔkɔ! Babilɔna ka Woke kambɔkɔ+ ndo tɔ kaya edjaselo k’ɛdiɛngɛ ndo dihole diadjasɛ nyuma ya mindo* tshɛ ndo lɛnɛ aholama tofudu tshɛ ta mindo ndo tahetshama!+ 3 Nɛ dia l’ɔtɛ wa wanu wa nsɔngu* k’awui atɔ wa mindo wa dieyanelo,* tɔ kambodjoya wedja tshɛ+ ndo nkumi ya dikanga ya la nkɛtɛ wakasale awui wa mindo wa dieyanelo la tɔ+ ndo amundji w’okanda* wa la nkɛtɛ wambɔngɔna l’ɔtɛ wayamɔtshɛtɔ diangɔ efula di’oshinga wolo aha la mboka nsɔnyi.”
4 Ndo dimi lakoke dui dikina oma l’olongo diata ɔnɛ: “Anto ami,+ nyotombe oma l’atei atɔ naka hanyolange ndjotambɛ lo pɛkato yatɔ diaha nyu ndjolongola asui atɔ.+ 5 Nɛ dia tota dia pɛkato yatɔ diambokoma polo l’olongo+ ndo Nzambi ambohɔ+ etsha atɔ waha la losembwe.* 6 Wakisale oko wakatasalɛka anto akina,+ eelo, akambo wakatasalaka,+ wakisɔmbɔya lo ndodia l’ahende. Wakisɔhɛ mbala 2 lo dikɔhɔ+ diakatasɔhɛka anto akina.+ 7 Lo yɛdikɔ yakatayatombolaka ndo yakatasɛnaka l’efula ka diangɔ di’oshinga wolo aha la mboka nsɔnyi, wakisoya ndo wakiledia polo lo yɛdikɔ yakɔ. Dikambo tɔ kekɔ lo ntetemala mbuta l’otema atɔ ate: ‘Dimi mbidjasɛ oko nkumekanga ka womoto ndo dimi keema wadi aki odo ndo dimi handelaki pondjo.’+ 8 Diakɔ diele, asui atɔ anɛ wayoya lushi ɔtɔi: Nyɔi ndo delo ndo ndjala, ndo tɔ kayotshumbama oshiki la dja,+ nɛ dia Jehowa* Nzambi ɔnɛ lakilombosha ekɔ la wolo.+
9 “Nkumi ya dikanga ya la nkɛtɛ yakasale awui wa mindo wa dieyanelo* la tɔ ndo yakayasɛnyaka kaamɛ la tɔ la diangɔ di’oshinga wolo aha la mboka nsɔnyi wayolela ndo wayoyakɔmɔla l’ɔtɛ wa kandji kayowokioka lam’ayowɛna edinga etena kayolongola Babilɔna kakɔ. 10 Vɔ wayemala tshalola, nɛ dia wayoka sui diatɔ wɔma, ko wayota vate: ‘Ande kandji, ande kandji, wɛ osomba wa woke, wɛ Babilɔna osomba wa wolo,+ nɛ dia kilombo kayɛ kamboya lo wonya wa ntango 1!’
11 “Amundji w’okanda wa la nkɛtɛ vɔ lawɔ wekɔ lo ndela ndo wekɔ l’otanda atɔ, nɛ dia ndooko onto laasombɛ diangɔ diawɔ nto. 12 Lokema la diangɔ diatɔ dia paonyi la dia mfɛsa ndo mbɔkɔ y’oshinga wolo, adidi, ahɔndɔ wa linɛnɛ la dimɛna, ahɔndɔ w’ebelabela, ahɔndɔ wa tɛpɛtɛpɛ, ahɔndɔ wa beela ndo diangɔ tshɛ diakasalema la esongo, diangɔ tshɛ diakasalema l’ewanga, diangɔ tshɛ diakasalema l’abaya w’oshinga wolo, la nkonga, la mbolo ndo la marbrɛ,* 13 ndo nto, kalafulu, diangɔ di’opumu, tshɔ, malashi, tshɔ ya wɛma, wanu, esɔ k’ɔlivɛ, ofushi w’ɔlɔlɔ, eponga, nyama, ɛkɔkɔ, mfalasa, pusupusu, mfumbe ndo nsɛnɔ* y’anto. 14 Eelo, wɛ ambotshika elowa w’amɛna wele wɛ* akangɛnangɛnaka ndo diangɔ tshɛ di’amɛna ndo dia nɛmɔ diamboshishɔ ndo hadiɛnamaki nto pondjo le yɛ.
15 “Amundji w’okanda wakasondjaka diangɔ sɔ, wakangɔnɛ oma le tɔ wayemala tshalola nɛ dia vɔ wayoka sui diatɔ wɔma, ko wayolela ndo wayosala otanda, 16 wata vate: ‘Ande kandji, ande kandji le osomba wa woke wɔlɔtshi ahɔndɔ wa linɛnɛ la dimɛna ndo w’ebelabela ndo wa beela ndo wɔlɛngami la lokema la dɛngalɛnga dia paonyi la mbɔkɔ y’oshinga wolo la adidi,+ 17 nɛ dia lo wonya wa ntango 1 ɛngɔnyi w’efula ɛsɔ wambolanyema!’
“Kapitɛnyi tshɛ ya masuwa l’anto tshɛ wɛngɔla laadiko di’ashi ndo ase olimu wa lo masuwa ndo wanɛ tshɛ wendɛ oma lo ndjale dia ndjasɛnya wakemala tshalola 18 ndo wakataka la dui dia wolo lam’akawendaka edinga etena kakalongolaka Babilɔna kakɔ vate: ‘Osomba akɔna wɛdimi l’osomba wa woke ɔnɛ?’ 19 Vɔ wakayatɛka ditshu l’ɛtɛ awɔ, wada ekoko, walela, wasala otanda ndo wata vate: ‘Ande kandji, ande kandji le osomba wa woke ɔnɛ wele wanɛ tshɛ wele la masuwa l’ashi wakangɔnɛ oma l’ɔngɔnyi awɔ, nɛ dia lo wonya wa ntango ɔtɔi vɔ wambolanyema!’+
20 “Olongo le,+ ndo nyu ekilami+ ndo apɔstɔlɔ ndo amvutshi, nyɔngɛnɛngɛnɛ l’ɔtɛ wa kɛnɛ kambookomɛ, nɛ dia Nzambi amboolombosha lo wahɔ anyu!”+
21 Ko ondjelo wa wolo akonyiya dive diele oko dive dia woke di’ɔhɛlɔ, ko akadikasha lo ndjale ata ate: “Nganɛ mbayokashema Babilɔna, osomba wa woke mbala kakɔ ɔtɔi ndo tɔ hɛnamaki nto pondjo.+ 22 Mindjo y’amembi w’esambo wemba ndo wahoma lɔsɛsɛ ndo y’apomi wa mishiki ndo y’ambidi wa tohonge ndo y’ambidi w’amama hayokɛmaki le yɛ nto pondjo. Ndooko otshudi watshula ɛngɔ kɛmɔtshi wayotanema le yɛ nto pondjo. Ndooko londjo la dive di’ɔhɛlɔ layokɛma le yɛ nto pondjo. 23 Ndooko osase wa tala wayokɔhɛtɛ nto pondjo ndo ndooko dui di’otshuki kana di’otshukami diayokɛma le yɛ nto pondjo. Nɛ dia amundji ayɛ w’okanda wakikɔ ɛnɛnɛ wa la nkɛtɛ, ndo l’ɔtɛ wa ditshelo diayɛ di’akambo w’ɛdiɛngɛ,+ wedja tshɛ wakanganyiyama. 24 Eelo, wakatane dikila di’amvutshi ndo dia ekilami+ ndo dia wanɛ tshɛ wakadiakema la nkɛtɛ le tɔ.”+