Jɔbɔ
22 Elifazɛ+ ose Temana akakadimola ate:
2 “Onde onto koka monga ohomba le Nzambi?
Onde onto lele la yimba koka monga la wahɔ le nde?+
3 Onde Kanga-Wolo-Tshɛ mbidjaka yimba* lo woho weyɛ ɔlɔlɔ,
Kana onde nde kondjaka ɛngɔ kɛmɔtshi l’ɔtɛ wayelayɛ mboka k’olowanyi?+
4 Onde nde ayokosha dilanya
Ndo ayosamba la yɛ l’ɔtɛ wa wɔma ayɛ wɔsɔhanyemi la dilɛmiɛlɔ?
5 Shi l’ɔtɛ wele kɔlɔ kayɛ hita kaya woke efula
Ndo munga kayɛ keema l’ekomelo?+
6 Nɛ dia wɛ mbɔsaka ɔkɔlɛ le ananyɔ wɔsɔsa,
7 Wɛ hasha onto lambɔlɛmba ashi wa nnɔ,
Ndo wɛ nyimaka ɔnɛ lele la ndjala ɛngɔ ka ndɛ.+
8 Wodja wekɔ waki pami ka wolo,+
Ndo ɔnɛ lahomɔ lokolo l’ɔlɔ kadjasɛ lɔkɔ.
9 Koko wɛ akakɛndja wadi waki edo anyanya,
Ndo wɛ akɔkɔla anya w’ana wa tshike.*
10 Diakɔ diamboyodingama la tolonga,*+
Ndo diaatɛyɛ wɔma wa shashimoya asolo;
11 Diakɔ diele ekɔ wodjima efula woho wahayakoke mɛna,
Ndo elola k’ashi kambokokomba.
12 Shi Nzambi ekɔ etale l’olongo?
Ndo ohenda tɔɔtɔ tshɛ woho wolombetɔ etale.
13 Koko wɛ akate wate: ‘Nzambi eyande mɛtɛ?
Onde nde koka nombosha lo wodjima wa tshududu?
14 Wange mbokombɛka diaha nde mɛna
Etena katandakɛndakɛnda l’olongo wokotami.’*
15 Onde wɛ ayoyela mboka k’edjedja
Kakakɛndakɛndaka akanga wa kɔlɔ,
16 Apami wakanyɛma* la ntondo ka nshi yawɔ,
17 Vɔ wakatɛka Nzambi ka mɛtɛ vate: ‘Ototshike mɛ!’
Ndo vate: ‘Kanga-Wolo-Tshɛ akokande tosalɛ?’
18 Koko nde kele Ɔnɛ lakalodia mvudu yawɔ la diangɔ di’amɛna.
(Tokanyi ta kɔlɔ ta ngasɔ tekɔ etale oma le mi.)
19 Anto w’ɛlɔlɔ wayɛna dui sɔ ko wayɔngɛnangɛna,
Ndo ɔnɛ laha la onongo ayowaɔla, ata ate:
20 ‘Andɔshi aso wambolanyema,
Ndo dja yayotshumba kɛnɛ kambaatshikalɛ.’
21 Eyande, ko wɛ ayonga lo wɔladi;
Ko diangɔ di’amɛna diayoya lo mboka kayɛ.
22 Etawɔ ɛlɛmbɛ w’oma l’onyɔ ande,
Ndo lamaka ɛtɛkɛta ande l’otema ayɛ.+
23 Naka wɛ nkalola le Kanga-Wolo-Tshɛ, wɛ ayokaloyama;+
Naka wɛ minya akambo wa kɔlɔ oma lo luudu layɛ la dipɛma,
24 Naka wɛ ayokasha paonyi* yayɛ lo ditshu
Ndo paonyi y’oma la Ɔfira+ lo menga y’ave,
25 Kanga-Wolo-Tshɛ ayonga paonyi* yayɛ,
Ndo nde ayonga mfɛsa yayɛ yoleki amɛna.
26 Nɛ dia l’etena kɛsɔ, ɔngɛnɔngɛnɔ ayɛ wayonga le Kanga-Wolo-Tshɛ,
Ndo wɛ ayonyiya elungi kayɛ otsha le Nzambi.
27 Wɛ ayowɔsɛngasɛnga, ko nde ayokooka;
Ndo wɛ ayokotsha alɔkɔlɔkɔ ayɛ.
28 Kɛnɛ tshɛ kɔsayɛ yɛdikɔ dia nsala kayolowana,
Ndo osase wayɔhɛta lo mboka kayɛ.
29 Nɛ dia wɛ ayoshama nsɔnyi lam’atɛkɛtayɛ la lotamanya tshɛ,
Koko nde ayoshimbɛ kanga okitshakitsha.*
30 Nde ayohandja wanɛ waha la onongo;
Ɔnkɔnɛ, naka anya ayɛ wekɔ pudipudi, kete ndooko onyake wɛ ayohanda.”