3 Joani
1 Dimi ekumanyi* lambofundɛ Ngayo ɔnalengo la ngandji lokami mɛtɛ ngandji nte:
2 Ɔnalengo la ngandji le, lekɔ lo nɔmba dia wɛ ntetemala mpomɔ lokolo l’ɔlɔ lo akambo tshɛ ndo dia wɛ monga la demba dia dimɛna oko watayangɔnɛ.* 3 Nɛ dia dimi lakangɛnangɛna efula lam’akaye anangɛso ndo lam’akawayota woho wakukutɛyɛ akambo wa mɛtɛ ndo woho watetemalayɛ nkɛndakɛnda lo akambo wa mɛtɛ.+ 4 Ndooko dikambo dioleki mbishami ɔngɛnɔngɛnɔ* oleki nɛ: dia dimi mboka dia anami wekɔ lo ntetemala nkɛndakɛnda lo akambo wa mɛtɛ.+
5 Ɔnalengo la ngandji le, wɛ ambɛnya kɔlamelo yayɛ lo kɛnɛ kasalɛyɛ anangɛso kaanga kahayawaeye.+ 6 Vɔ wakatɛkɛta dikambo dia ngandji kayɛ la ntondo k’etshumanelo. Lam’alangayɛ, kowakɛndja lo yoho yangɛnyangɛnya Nzambi.+ 7 Nɛ dia l’ɔtɛ wa lokombo lande mbakawahandjɔnɛ aha la mbɔsa kaanga yangɔ+ oma le ase wedja. 8 Ɔnkɔnɛ, sho la dia nongolaka anto wa ngasɔ+ dimɛna dia sho nkamba kaamɛ lo akambo wa mɛtɛ.+
9 Dimi lakafundɛ etshumanelo mukanda, koko Diyɔtɛrɛfɛ lalanga dihole dia ntondo l’atei awɔ+ hɔshi kaanga dui ɔtɔi di’oma le so la nɛmɔ.+ 10 Diakɔ diele naka dimi ndja, layonyohola kɛnɛ kasalande lo ntɛkɛta akambo wa kɔlɔ ndo w’anyanya lo dikambo diaso.+ Ndo nto, lam’ele nde hangɛnangɛna akambo asɔ, nde halongola anangɛso+ la nɛmɔ ndo wanɛ walanga mbalongola la nɛmɔ, nde nyangaka dia mbashimba ndo mbatshanya oma l’etshumanelo.
11 Ɔnalengo la ngandji le, tokoyake kɛnɛ kele kɔlɔ, koko okoya kɛnɛ kele ɔlɔlɔ.+ Onto lasala kɛnɛ kele ɔlɔlɔ ndja oma le Nzambi.+ Onto lasala kɔlɔ atɛnyi Nzambi.+ 12 Anangɛso tshɛ wakatɛkɛta dimɛna lo dikambo dia Dɛmɛtɛriyo ndo akambo wa mɛtɛ vɔamɛ wakashikikɛ dui sɔ. Lo mɛtɛ, ndo sho lawɔ tekɔ lo ntɛkɛta dimɛna lo dikambo diande ndo wɛ mbeyaka dia kɛnɛ kataso kekɔ mɛtɛ.
13 Lekɔ l’akambo efula wa kotɛ, koko dimi haakombola ntetemala kofundɛwɔ la ashi wa mukanda ndo la lokala. 14 Koko lekɔ lo nongamɛ dia kɛna esadi kele katoyosawole elungi l’elungi.
Wɔladi wayale la yɛ!
Angɛnyi wakotomɛ mɔyɔ. Ombishe angɛnyi mɔyɔ onto l’onto lo lokombo lande.