Luka

10 L’ɔkɔngɔ w’akambo asɔ, Nkumadiɔndjɔ akasɔnɛ ambeki akina 70 ndo akaatome ahende ahende+ la ntondo kande l’esomba tshɛ ndo l’ahole tshɛ wakandahombe ndamɛ ndjotshɔ. 2 Ko nde akawatɛ ate: “Lo mɛtɛ, dinela diekɔ woke, koko ekambi mbele yema tshitshɛ. Ɔnkɔnɛ, nyɔlɔmbɛ Owandji wa dinela dia nde ntoma ekambi lo dinela+ diande. 3 Nyotshu! Nyolonge, dimi lambonyotoma oko ɛkɔkɔ l’atei wa ndjaondo.+ 4 Tanyotshɔke la tshapatapa ya falanga kana tapa dia mbo ya ndɛ kana sabata+ ndo tanyoshake ndooko onto* mɔyɔ lo mboka. 5 Dihole tshɛ diayonyɔtɔ lo luudu, kanyotake ntondo nyate: ‘Wɔladi wayale lo luudu lɔnɛ.’+ 6 Naka onto lalanga wɔladi ekɔ laawɔ, wɔladi anyu wayoyala le nde. Ko naka ndooko onto lalanga wɔladi, kete wɔladi anyu wayokalola le nyu. 7 Ɔnkɔnɛ, kanyotshikale lo luudu lakɔ,+ kanyole ndo kanyɔnɔ diangɔ diayowonyosha,+ nɛ dia ose olimu la dia nongola difuto+ diande. Tanyɔsɛkɔsɛkɔke la mvudu.

8 “Ndo nto, l’osomba tshɛ wayonyɔtɔ ko wambonyolongola, kanyole diangɔ diayowonyosha, 9 kanyɔkɔnɔlɛ wanɛ wele la hemɔ lɔkɔ ndo kanyowatɛke nyate: ‘Diolelo dia Nzambi diaya suke la nyu.’+ 10 Koko l’osomba tshɛ wayonyɔtɔ ko hawonyolongodi, kanyotombe l’ɛsɛsɛ awɔ wa weke ndo kanyote nyate: 11 ‘Lo dikambo dianyu, tambohomɛ ndo ditshu dia l’osomba anyu diakakakate l’ekolo aso.+ Koko, nyeye dia Diolelo dia Nzambi diaya suke.’ 12 Lambonyotɛ nte: Lushi lɔsɔ, osomba akɔ wayolongola dilanya dioleki dia Sɔdɔma la fwa.+

13 “Mananu le yɛ wɛ Kɔrazina! Mananu le yɛ wɛ Bɛtɛsayida, nɛ dia otondonga ahindo wakasalema le nyu mbakasalema la Tura ndo la Sidɔna, tshike vɔ wamboyatshumoyaka edja lo mbidjasɛ lo akoto ndo lo otoko.+ 14 Ɔnkɔnɛ lo kilombo, nyayolongola dilanya dioleki dia Tura la Sidɔna la fwa. 15 Ndo wɛ Kapɛrnauma, onde wɛ ayodiyama polo l’olongo? Wɛ ayoholoyama lo Diombo!*

16 “Onto tshɛ lanyohokamɛ, ambompokamɛ ndo dimi.+ Ndo onto tshɛ lanyotona, ambontona ndo dimi. Ndo nto, onto tshɛ lantona, ambotona ndo Ɔnɛ lakantome.”+

17 Oma laasɔ, ambeki ande 70 wakakalola l’ɔngɛnɔngɛnɔ, wata vate: “Nkumadiɔndjɔ, kaanga ɛdiɛngɛ wekɔ lo tokitanyiya lam’akambaso la lokombo layɛ.”+ 18 Ko nde akawatɛ ate: “Dimi lakɛnyi Satana amboshila nkɔ+ oma l’olongo oko dingadimu. 19 Nyolonge, lakanyosha wolo wa mbikamɛ eloyi la nkoto, ndo lowandji la mbahemɛ wolo tshɛ w’otunyi,+ ndo ndooko ɛngɔ kayonyosalɛ kɔlɔ. 20 Tanyɔngɛnangɛnake l’ɔtɛ wele ɛdiɛngɛ wekɔ lo nyokitanyiya, koko nyɔngɛnɛngɛnɛ lo woho wele nkombo yanyu yambofundama l’olongo.”+ 21 Lo wonya akɔ, nde akangɛnangɛna efula l’ekimanyielo ka nyuma k’ekila ndo akate ate: “Papa, wɛ Owandji w’olongo la nkɛtɛ, lambokotombola lo sɛkɛ, nɛ dia wɛ akashɛ akanga wa tomba ndo ambeyi wa mukanda+ awui anɛ, ko ambowashola le ana w’akɛnda. Eelo, Papa, nɛ dia ngasɔ mbakayetawɔ.+ 22 Papa akambisha diangɔ tshɛ ndo ndooko onto leya Ɔna paka Papa ndo ndooko onto leya Papa paka Ɔna,+ ndo onto tshɛ lele Ɔna nangaka mbosholɛnde.”+

23 Ko nde akakadimɔ otsha le ambeki ande ndo akawatɛ lo shɔpɔ ate: “Ɔngɛnɔngɛnɔ le washo wɛna akambo wɛnanyu anɛ.+ 24 Nɛ dia lambonyotɛ nte: Amvutshi efula ndo nkumi ya dikanga efula wakakombola mɛna akambo wɛnanyu, koko vɔ kombaɛna,+ ndo wakakombola mboka akambo wokanyu, koko vɔ kombaoka.”

25 Nyolonge, onto ɔmɔtshi lakayashaka tshavu lo Ɛlɛmbɛ akemala dia mbohemba ndo akate ate: “Ombetsha, ahombami nsala dia dimi nkondja lɔsɛnɔ la pondjo?”+ 26 Yeso akawotɛ ate: “Kakɔna kofundami l’Ɛlɛmbɛ? Atoyadiaka?” 27 Nde akakadimola ate: “‘Langa Jehowa* Nzambi kayɛ la otema ayɛ tshɛ, la anima* ayɛ tshɛ, la wolo ayɛ tshɛ ndo la yimba yayɛ tshɛ’+ ndo ‘langa wonyayɛ onto oko wayalangayɛ.’”+ 28 Yeso akawotɛ ate: “Wɛ ambokadimola dimɛna, tetemala nsala ngasɔ ko wɛ ayokondja lɔsɛnɔ.”+

29 Koko lo nyanga dia ndjaɛnya dia nde ekɔ kanga losembwe,+ pami kɛsɔ akambola Yeso ate: “Akɔna mɛtɛ ele wonyami?” 30 Yeso akookadimola ate: “Pami kɛmɔtshi akataholɔka oma la Jɛrusalɛma otsha la Jeriko ndo akahomana l’apɔtwanyi, ko wakɔhɔtɔla diangɔ diande tshɛ ndo wakɔɔkɔmɔla ko wakatshu, wakootshike l’asa eko la nyɔi. 31 Koko oko ahoma, ɔlɔmbɛdi ɔmɔtshi akayaholɔka lo mboka kakɔ ko lam’akandɛnyi pami kɛsɔ, nde akete lo wedi okina. 32 Woho akɔ waamɛ mbakasale ndo ose Lɛwi ɔmɔtshi. Lam’akandakome laawɔ, nde akawɛnyi ndo akete lo wedi okina. 33 Koko ose Samariya+ ɔmɔtshi akayetaka lo mboka kakɔ. Lam’akandakome suke la nde ndo lam’akandawɛnyi, nde akawoke kɛtshi. 34 Ɔnkɔnɛ, nde akasukana lalende, akɔmbɛ mpota yande ndo akatɛ esɔ la wanu lɔkɔ. Oma laasɔ, nde akawahenya laadiko dia nyama kande, akɔɔtɔlɛ l’ɔtɛlɛ ndo akookimanyiya. 35 La wedi a pindju, nde akɔshi dɛnariyo* 2, akasha kanga ɔtɛlɛ ndo akawotɛ ate: ‘Kimanyiyakande ndo kɛnɛ tshɛ kayoyoshisha laadiko dia falanga nyɛ, dimi layoyofuta lam’ayomokalola.’ 36 Oko le yɛ, akɔna l’atei w’anto 3 asɔ akayaetɛ wonyande+ la pami kakahomana la apɔtwanyi kɛsɔ?” 37 Nde akate ate: “Ɔnɛ lakawoke kɛtshi.”+ Ko Yeso akawotɛ ate: “Tshɔka, tosale ngasɔ.”+

38 Oma laasɔ lam’akawatatshɔka, nde akɔtɔ lo ngelo kɛmɔtshi. Womoto ɔmɔtshi laki lɛkɔ lokombo lande Maata+ akoolongola lakande. 39 Womoto ɔsɔ aki la kosɛnde ka womoto lokombo lande Mariya. Nde akadjasɛ l’ekolo wa Nkumadiɔndjɔ ndo akahokamɛka kɛnɛ kakandataka.* 40 Koko yimba yaki Maata tshɛ yaki paka l’elimu efula waki la nde. Ko nde akasukana ndo akate ate: “Nkumadiɔndjɔ, wɛ hɛnyi dia kosɛmi ambotshikɛ elimu tshɛ dimɛ? Tɛnde aye kele ayokimanyiya.” 41 Nkumadiɔndjɔ akookadimola ate: “Maata, Maata, wɛ ekɔ lo ndjakiyanya ndo ekɔ lo ndjaɛnya paa la diangɔ efula. 42 Aha diangɔ efula mbele ohomba, kaanga ɛngɔ ɔtɔi keto kete ambokoka. Nɛ dia Mariya ambɔsɔna kɛnɛ kele dimɛna*+ ndo hawotowɔhɔtɔlatɔ.”