Luka

11 Yeso akalɔmbaka lo dihole dimɔtshi ndo lam’akandashidiya nɔmba, ombeki ande ɔmɔtshi akawotɛ ate: “Nkumadiɔndjɔ, otetsha woho wa nɔmba, oko waketsha Joani ambeki ande.”

2 Ko nde akawatɛ ate: “Etena tshɛ kayonyɔlɔmbaka, kanyotake nyate: ‘Papa, lokombo layɛ lakidiame.*+ Diolelo diayɛ diaye.+ 3 Otosha mbo ya ndɛ* ya lushi la lushi lo ndjela ehomba aso wa lushi la lushi.+ 4 Otokimwe pɛkato yaso,+ nɛ dia sho la wɔ dimanyiyaka wanɛ tshɛ wele la dibasa+ diaso ndo totokonyake lo ohemba.’”+

5 Nde akawatɛ nto ate: “Tɔshi dia onto ɔmɔtshi l’atei anyu ekɔ l’ɔngɛnyi, ko nde ntshɔ le nde la midi k’otsho ndo tɔɔlɔmba ate: ‘Ɔngɛnyi, ɔsɔndja mapa 3, 6 nɛ dia ɔngɛnyi ami ɔmɔtshi ambokoma oma lo lɔkɛndɔ, koko dimi ndooko l’ɛngɔ ka mbosha.’ 7 Ko ɔngɛnyi ande akɔ mbokadimola oma lo luudu ate: ‘Takɔmɛnya paa. Lokuke lakashidi ndjihama ndo anami w’akɛnda wakaladi kaamɛ la mi lo mbeto. Haakoke mbetɔ dia ndjokosha kaanga ɛngɔ.’ 8 Lambonyotɛ nte kaanga nde hetwe dia ndjowosha ɛngɔ l’ɔtɛ wende ɔngɛnyi ande, lo mɛtɛ nde ayetɔ dia ndjowosha kɛnɛ tshɛ kalɔmbande l’ɔtɛ wa wembiya+ ande w’efula. 9 Ɔnkɔnɛ, lambonyotɛ nte nyotetemale nɔmba,+ ko wayonyosha; nyotetemale nyanga, ko nyayotana; ndo nyotetemale nkɔkɔla, ko wayonyodihola.+ 10 Nɛ dia onto tshɛ lalɔmba, ayolongola;+ onto tshɛ layanga, ayotana ndo onto tshɛ lakɔkɔla, wayowodihola. 11 Papa kakɔna l’atei anyu kele naka ɔnande mbɔlɔmba lose ko nde mbosha oloyi lo dihole dia lose?+ 12 Kana naka nde mbɔlɔmba okele ko nde mbosha nkoto? 13 Ɔnkɔnɛ naka nyu, kaanga mbenyu akanga wa kɔlɔ, mbeyaka mbisha ananyu weshasha w’ɛlɔlɔ, kete hoke Shɛnyu lele l’olongo! Shi nde ayoleka mbisha nyuma k’ekila le wanɛ wɔɔlɔmbatɔ?”+

14 L’ɔkɔngɔ diko, nde akatondja ɔdiɛngɛ wa lomi.+ L’ɔkɔngɔ wa ɔdiɛngɛ akɔ ntomba, pami kaki lomi akatɛkɛta, ko olui w’anto wakaambe.+ 15 Ko anto amɔtshi wakate vate: “Nde ekɔ lo ntondja ɛdiɛngɛ oma lo wolo wa Bɛlɛzɛbubɛ,* owandji w’ɛdiɛngɛ.”+ 16 Koko dia mbohemba, anto akina wakɔɔlɔmbɛ dia nde mbaɛnya djembetelo+ y’oma l’olongo. 17 Lam’ele nde akeye tokanyi tawɔ,+ nde akawatɛ ate: “Diolelo tshɛ diambatɔna kɔɔka ndo luudu tshɛ lambatɔna pandjɔka. 18 Woho akɔ waamɛ mbele, naka Satana ndamɛ ambatɔna, ngande wayokoka diolelo diande nshikimala? Nɛ dia nyu mbutaka nyate: Dimi lekɔ lo ntondja ɛdiɛngɛ oma lo wolo wa Bɛlɛzɛbubɛ. 19 Naka dimi tondjaka ɛdiɛngɛ oma lo wolo wa Bɛlɛzɛbubɛ, ko ananyu mbatondjaka oma lo wolo waki na? Diakɔ diele vɔ wayonyolombosha. 20 Ko naka l’ekimanyielo ka lohita la Nzambi +mbatondjami ɛdiɛngɛ, kete Diolelo dia Nzambi diambokoma le nyu.+ 21 Etena kalama pami kɛmɔtshi kele la wolo ndo la dihomɔ dia ta luudu lande, diangɔ diande kokamɛka dimɛna. 22 Koko lam’aya onto looleki wolo dia ndjɔɔlɔsha ko nde mbɔlɛndja, nde ayowɔhɔtɔla dihomɔ dia ta tshɛ diayaɛkɛnde lɔkɔ ndo nde ayokahɛ anto akina diangɔ diayondɔɔhɔtɔla. 23 Ɔnɛ tshɛ lele bu lo wedi ami ekɔ otunyi ami ndo ɔnɛ lahatshumanya kaamɛ la mi, ekɔ lo mpandjola.+

24 “Etena katomba ɔdiɛngɛ oma le onto, vɔ mbetetaka l’ahole wa womu dia nyanga dihole dia momuya. Ko naka hawotanyi dihole dia momuya, vɔ totaka ɔnɛ: ‘Dimi layokalola lo luudu lami lakamatombe.’+ 25 Ndo etena kakomawɔ, vɔ tanaka luudu lakɔ lambɔmbama ndo lambɔlɛngama. 26 Oma laasɔ, vɔ wayotshɔ tɔsa ɛdiɛngɛ ekina 7 wooleki kɔlɔ, ko vɔ wayoyɔtɔ lɔkɔ, wayoyodjasɛ lɔkɔ ndo ekomelo k’onto akɔ kayoleka woho wakinde ntondo kɔlɔ.”

27 Etena kakandataka akambo asɔ, womoto ɔmɔtshi oma l’atei w’olui w’anto akawotɛ la dui dia wolo ate: “Ɔngɛnɔngɛnɔ le otema wakakote ndo awɛlɛ wakakɔlɔnya!”+ 28 Koko nde akate ate: “Keema. Ɔngɛnɔngɛnɔ le wanɛ woka ɔtɛkɛta wa Nzambi ndo wawokitanyiya!”+

29 Lam’akatshumana elui w’anto kaamɛ, nde akatatɛ mbuta ate: “Lɔlɔnga lɔnɛ lekɔ lɔlɔnga la kɔlɔ ndo lɔ lekɔ lo nyanga djembetelo. Koko ndooko djembetelo yayowowasha laadiko dia djembetelo ya Jɔna.+ 30 Nɛ dia oko waki Jɔna+ djembetelo le ase Niniva, woho akɔ waamɛ mbayoyala Ɔna onto nde lawɔ djembetelo le lɔlɔnga lɔnɛ. 31 Nkumekanga ka womoto ka lo sidɛ+ ayemala lo kilombo l’anto wa lo lɔlɔnga lɔnɛ ndo ayowawanya, nɛ dia nde akaye oma lo tokoma ta nkɛtɛ dia ndjoka awui wa lomba waki Sɔlɔmɔna. Koko nyolonge, onto loleki Sɔlɔmɔna ekɔ lanɛ.+ 32 Ase Niniva wayemala lo kilombo la lɔlɔnga lɔnɛ ndo wayolianya, nɛ dia vɔ wakayatshumoya l’ɔtɛ wa kɛnɛ kakaasambisha Jɔna.+ Koko nyolonge, onto loleki Jɔna ekɔ lanɛ. 33 Hawotɔhɛtshaka tala ko dishɛ kana didja lo saka,* koko vɔ todikitshaka laadiko dia ekundji ka tala,+ dia wanɛ wɔtɔ lo luudu lakɔ mɛna osase. 34 Sso mbele tala dia demba. Naka sso diayɛ mbikama lo dui di’ɔlɔlɔ,* kete demba diayɛ di’otondo diayonga osase.* Koko naka diɔ kɔmiyaka,* kete ndo demba diayɛ diayonga wodjima.+ 35 Ɔnkɔnɛ, endaka dimɛna diaha osase wele le yɛ monga wodjima. 36 Koko, naka demba diayɛ di’otondo diekɔ osase ndo ndooko etenyi kadiɔ kele wodjima, kete demba di’otondo diayoyala osase, oko watokongamulɛka tala esase adiɔ.”

37 Lam’akandate akambo asɔ, Ofarisɛ ɔmɔtshi akɔɔlɔmbɛ dia nde tɔlɛ yangɔ lakande. Ko nde akatshu ndo akadjasɛ la mɛsa. 38 Koko, Ofarisɛ akɔ akaambe lo mɛna dia nde kosola anya* la ntondo ka ndɛ.+ 39 Ko Nkumadiɔndjɔ akawotɛ ate: “Nyu Afarisɛ, nyu tɛdiaka l’andja wa dikɔhɔ la dɔnga, koko l’etei kanyu, nyambolola tɔɔ la lokaki ndo la akambo wa kɔlɔ.+ 40 Nyu akanga wa dinginya le, shi ɔnɛ lakasale l’andja mbakasale ndo l’etei? 41 Koko, nyokambe la diangɔ diele l’etei dia mbisha anto weshasha wa kɛtshi,* ko diangɔ tshɛ diayoyala pudipudi le nyu. 42 Mananu le nyu Afarisɛ, nɛ dia nyu kimɔka etenyi ka dikumi ka mɛntɛ la ka nyumba ndo ka weho w’akatshikatshi ekina tshɛ w’oma lo ekambɔ,*+ koko nyu tonyaka yimba lo losembwe ndo lo ngandji ka Nzambi! Awui asɔ mbakanyahombe nsala, aha la minya awui asɔ yimba.+ 43 Mananu le nyu Afarisɛ, nɛ dia nyu nangaka mbidjasɛ lo ahole wa ntondo* lo toshinangɔnga ndo nyu nangaka di’anto nyosha mɔyɔ lo bingu.+ 44 Mananu le nyu, nɛ dia nyu nyekɔ oko waombo* wahɛnama*+ dimɛna wele anto wekɔ lo mbakamɛkamɛ aha la mbeya!”

45 Onto ɔmɔtshi lakayashaka tshavu lo Ɛlɛmbɛ akawotɛ ate: “Ombetsha, lo mbuta akambo asɔ wɛ ekɔ lo tɔtɛnga ndo sho.” 46 Ko nde akate ate: “Mananu ndo le nyu, nyu wanɛ wayasha tshavu lo Ɛlɛmbɛ, nɛ dia nyu nyekɔ lo kelekɛ anto eshikɔ wa wotsho mɛmba, koko nyuamɛ hanyonanda eshikɔ akɔ kaanga la mpita yanyu!+

47 “Mananu le nyu, nɛ dia nyu mbikaka waombo* w’amvutshi, koko watshɛnyu mbakaadiake!+ 48 Lo mɛtɛ, nyu nyekɔ ɛmɛnyi w’etsha wa watshɛnyu ko nyu mbaetawɔka, nɛ dia vɔ wakadiake amvutshi,+ koko nyu nyekɔ lo mbika waombo awɔ. 49 Diakɔ diakate lomba laki Nzambi nto ɔnɛ: ‘Dimi layowatomɛ amvutshi ndo apɔstɔlɔ, ko wayowadiaka ndo wayɔhɛnyahɛnya amɔtshi, 50 dia lɔlɔnga lɔnɛ+ monga l’onongo* wa dikila di’amvutshi tshɛ diakatshulɔma ntatɛ oma ko etatelo k’andja, 51 oma lo dikila di’Aabɛlɛ+ polo lo dikila dia Zɛkariya lakadiakema lam’asa elambwelo la luudu.’*+ Eelo, lambonyotɛ nte lɔlɔnga lɔnɛ layɛmba onongo* wa dikila sɔ.

52 “Mananu le nyu, nyu wanɛ wayasha tshavu lo Ɛlɛmbɛ, nɛ dia nyu nyakanya nsapi k’ewo. Nyu nyuamɛ kɔmbɔtɔ ndo nyakashimbe wanɛ wakɔtɔka!”+

53 Ɔnkɔnɛ, lam’akandatombe oma laawɔ, afundji l’Afarisɛ wakatatɛ mbodja mpandju l’olongo lo mbɔpɔpa ambola efula, 54 walongamɛ dia mbonda lo lolemi oma lo dui dimɔtshi diakandakoke mbuta.+