1 Ɛkɔndɔ

23 Lam’akayala Davidɛ osombe ndo otsha l’ekomelo ka lɔsɛnɔ lande,* nde aketɛ ɔnande Sɔlɔmɔna nkumekanga k’Isariyɛlɛ.+ 2 Oma laasɔ, nde akatshumanya ewandji tshɛ wa l’Isariyɛlɛ, ɛlɔmbɛdi+ ndo ase Lɛwi.+ 3 Wakadia lofulo l’ase Lɛwi waki l’ɛnɔnyi 30 otsha la diko; lofulo lawɔ+ lo mbadia onto l’onto laki nunu akumi asato l’enanɛi (38 000). 4 L’atei awɔ, nunu akumi ahende la nɛi (24 000) mbakakambaka oko ɛnɔmbɔdi w’olimu wa lo luudu la Jehowa, nunu samalo (6 000) waki ewandji la toshushi,+ 5 nunu nɛi (4 000) waki alami w’asoko,+ ndo nunu nɛi (4 000) wakatombolaka+ Jehowa la dihomahoma diakate Davidɛ lo dikambo diadiɔ ate: “Lambodisala dia tombolaka Nzambi.”

6 Ko Davidɛ akaalɔngɛ* lo elui lo ndjela+ ana w’apami wa Lɛwi anɛ: Ngɛrɛshɔna, Kɔhata ndo Merari.+ 7 Oma le aseka Ngɛrɛshɔna: Ladana nde la Shimei. 8 Ana w’apami wa Ladana vɔ anɛ: Owandji Jɛhiyɛlɛ, Zetama ndo Jɔɛlɛ,+ 3. 9 Ana w’apami wa Shimei vɔ anɛ: Shelɔmɔta, Haziyɛlɛ ndo Harana, 3. Wasɔ mbaki ɛtɛ wa nkumbo ya washɛwɔ dikambo dia Ladana. 10 Ana w’apami wa Shimei vɔ anɛ: Jahata, Zina, Jeushɛ ndo Beriya. Wasɔ 4 mbaki ana w’apami wa Shimei. 11 Jahata aki owandji, ko Zizahɛ la 2. Koko lam’ele Jeushɛ nde la Beriya kombota ana w’apami efula, vɔ wakadiemaka oko nkumbo 1 ka washɛwɔ ndo waki l’ɔkɛndɛ 1.

12 Ana w’apami wa Kɔhata vɔ anɛ: Amurama, Izɛhara,+ Hɛbɛrɔna+ ndo Uziyɛlɛ, 4. 13 Ana w’apami wa Amurama vɔ anɛ: Arɔna+ nde la Mɔsɛ.+ Koko Arɔna akakitshama pondjo laande+ dia nkidia Dihole dioleki Ekila nde l’anande w’apami, dia nambolaka elambo la ntondo ka Jehowa, dia mbokambɛka ndo dia tshɔkɔlaka anto nshi tshɛ lo lokombo lande.+ 14 Lo kɛnɛ kendana la Mɔsɛ okambi wa Nzambi ka mɛtɛ, anande wakadiema l’atei wa dioho di’ase Lɛwi. 15 Ana w’apami wa Mɔsɛ vɔ anɛ: Ngɛrɛshɔmɛ+ nde la Eliɛzɛrɛ.+ 16 L’atei w’ana w’apami wa Ngɛrɛshɔmɛ, Shɛbuɛlɛ+ kaki owandji. 17 L’atei wa tokanula* taki Eliɛzɛrɛ, Rɛhabiya+ kaki owandji; Eliɛzɛrɛ komonga l’ana akina w’apami, koko ana w’apami wa Rɛhabiya waki efula ka mamba. 18 L’atei w’ana w’apami wa Izɛhara,+ Shelomita+ kaki owandji. 19 Ana w’apami wa Hɛbɛrɔna vɔ anɛ: La ntondo Jɛriya, la 2 Amariya, la 3 Jahaziyɛlɛ ndo la 4 Jɛkameamɛ.+ 20 Ana w’apami wa Uziyɛlɛ+ vɔ anɛ: La ntondo Mika ndo la 2 Ishiya.

21 Ana w’apami wa Merari vɔ anɛ: Mahili nde la Mushi.+ Ana w’apami wa Mahili vɔ anɛ: Eleazara nde la Kisha. 22 Eleazara akavu aha la mbota ana w’apami, paka wamato ato. Ɔnkɔnɛ, ana w’apami wa Kisha, ewotɔ* awɔ wakaatshuke. 23 Ana w’apami wa Mushi vɔ anɛ: Mahili, Edɛrɛ ndo Jɛrɛmɔtɛ, 3.

24 Wasɔ mbaki ana w’apami wa Lɛwi lo ndjela mvudu ya washɛwɔ, ɛtɛ wa nkumbo ya washɛwɔ lo ndjela wanɛ wakafundjama nkombo wakadiema ndo oko wofundamiwɔ lo ndjela nkombo yawɔ ndo wanɛ wakakambaka olimu wa lo luudu la Jehowa oma l’ɛnɔnyi 20 otsha la diko. 25 Nɛ dia Davidɛ akate ate: “Jehowa Nzambi k’Isariyɛlɛ ambosha wodja ande+ momuya, ndo nde ayodjasɛka la Jɛrusalɛma pondjo pondjo.+ 26 Ndo nto, ase Lɛwi hawotɛmbaka tabɛrnaklɛ kana ɛngɔ tshɛ ka lɔkɔ kendana l’olimu atɔ.”+ 27 Dikambo lo ndjela kɛnɛ kakatatshi Davidɛ l’ekomelo, ase Lɛwi wakadiema oma l’ɛnɔnyi 20 otsha la diko. 28 Ɔkɛndɛ awɔ aki wa nkimanyiya ana w’apami wa Arɔna+ l’olimu wa lo luudu la Jehowa, monga la ɔkɛndɛ wa namaka asɛkɛ,+ mvudu y’oleelo, wɛdiamelo w’ɛngɔ k’ekila tshɛ ndo kɛnɛ tshɛ kaki ohomba l’olimu wa lo luudu la Nzambi ka mɛtɛ. 29 Vɔ wakakimanyiyaka la mapa wa lahatanya,*+ ofushi wa dimɛna dikambo di’olambo wa ntɔngɔ, mapa+ wa tɔlɛwɛlɛwɛ waha la wodoya,+ ekate wokatewɔ lo mpanu, ofushi wa lɔsɔha l’esɔ, ndo weho tshɛ wa tɛdikɔ. 30 Vɔ wakahombaka memala pindju+ tshɛ dia mbisha Jehowa losaka ndo mbotombola, ndo nsala woho akɔ waamɛ la dikɔlɔ.+ 31 Vɔ wakakimanyiyaka etena tshɛ kakalambɔmaka elambo wa lotshumba le Jehowa lo Sabato,+ lo towalelo ta ngɔndɔ+ ndo lo fɛtɛ ya deko,+ lo ndjela lofulo lakalɔmbamaka lo ɛlɛmbɛ wendana la wɔ, ndo wakasalaka dui sɔ mbala la mbala la ntondo ka Jehowa. 32 Ndo nto, vɔ wakakotshaka ɛkɛndɛ awɔ wendana la luudu la dipɛma l’esanganelo, dihole di’ekila ndo la anangɛwɔ w’ana w’apami wa Arɔna dikambo di’olimu wa lo luudu la Jehowa.