Malaki
3 “Eenda, dimi layotoma dikɛndji diami, ko nde ayɛdia* mboka la ntondo kami.+ Ndo Nkumadiɔndjɔ ka mɛtɛ, ɔnɛ layanganyu, ayoya la shashimoya lo tɛmpɛlɔ+ kande; ndo ɔkɛndji wa sheke ayoya, ɔnɛ langɛnangɛnanyu. Eenda, nde ayoya mɛtɛ,” mbata Jehowa kanga lolembelembe.
2 “Ko akɔna ayokikɛ lushi l’oyelo ande, ndo akɔna ayonga l’akoka wa memala lam’ayondɛnama? Nɛ dia nde ayonga oko dja ya ɔnɛ lɛɛdia mbolo ndo oko sudɛ*+ kaki osodi w’ahɔndɔ. 3 Nde ayodjasɛ oko ɔnɛ lɛɛdia mbolo ndo lɛɛdia mfɛsa,+ ko ayɛdia ana w’apami wa Lɛwi; nde ayowaɛdia oko paonyi ndo oko mfɛsa, ko vɔ mɛtɛ wayoyala le Jehowa anto wela olambo wa woshasha la losembwe. 4 Ndo olambo wa woshasha wa Juda la wa Jɛrusalɛma wayɔngɛnyangɛnya* Jehowa mɛtɛ, oko lo nshi y’edjedja ndo oko lo ɛnɔnyi wambetaka.+
5 “Dimi layosukana suke la nyu lo kilombo ndo aha la ntshimbatshimba, dimi layonga ɔmɛnyi le akanga w’alɔka,+ le akanga wa loseka, le wanɛ watshiba+ lo kashi, le wanɛ wakesa ose olimu,+ wadi aki odo ndo ɔna etshike,*+ ndo le wanɛ watona nkimanyiya* ɔngɛndangɛnda.+ Vɔ kombokami wɔma,” mbata Jehowa kanga lolembelembe.
6 “Nɛ dia dimi kele Jehowa; dimi haatshikitana.*+ Ndo nyu nyekɔ ana wa Jakɔbɔ; nyu nyatashile. 7 Oma ko nshi ya wa tshɛnyu, nyu nyakasɛkɛ wadjango ami ndo nyu kombakitanyiya.+ Nyokalole le mi, ko dimi layokalola le nyu,”+ mbata Jehowa kanga lolembelembe.
Koko nyu mbutaka nyate: “Ngande wakokaso nkalola?”
8 “Onde onto ayova Nzambi? Koko nyu nyekɔ lo mbivami.”
Ko nyu mbutaka nyate: “Ngande wakatakove?
“Lo tenyi dia dikumi ndo lo weshasha. 9 Nyu mɛtɛ nyambodjama mananu,* nɛ dia nyekɔ lo mbivami, ɛɛ, wodja w’otondo mbasala dui sɔ. 10 Nyela etenyi ka dikumi k’otondo* lo luudu lande la eombelo,+ dia mbo ya ndɛ monga lo luudu+ lami; ndo lam’alanganyu, nyompembe lo dikambo sɔ,” mbata Jehowa kanga lolembelembe, “dia menda kana dimi hantonyodiholɛ asoko w’olongo+ ndo nyohongolɛ* ɔtshɔkɔ polo ndo ndooko ɛngɔ kahombama.”+
11 “Dimi layohangwɛ ɛngɔ kalanya* lo dikambo dianyu, ko tɔ hatolanya elowa wa lo wodja anyu kana nsala diaha ɛkɔdi wa vinyɔ wa lo dikambɔ dianyu ntɔ,”+ mbata Jehowa kanga lolembelembe.
12 “Wedja tshɛ wayota dia nyekɔ l’ɔngɛnɔngɛnɔ,+ nɛ dia nyu nyayonga wodja w’ɔngɛnɔngɛnɔ,” mbata Jehowa kanga lolembelembe.
13 Jehowa kanga lolembelembe kata ate: “Ɛtɛkɛta anyu oya le mi wakayala wolo.”
Ndo nyu mbutaka nyate: “Ngande wakatatɛkɛta lam’asaso lo dikambo diayɛ?”+
14 “Nyu mbutaka nyate: ‘Kambɛ Nzambi+ ndooko la wahɔ. Wahɔ akɔna wakatakondja lo nkotsha ɛkɛndɛ aso otsha le nde ndo lo nkɛndakɛnda la lonyangu la ntondo ka Jehowa kanga lolembelembe? 15 Wonya ɔnɛ, sho mbɔsaka akanga w’etako oko anto wele l’ɔngɛnɔngɛnɔ. Ndo wanɛ wasala kɔlɔ mbahomɔ lokolo l’ɔlɔ.+ Vɔ sombɔka mpemba Nzambi, ko hawolongola dilanya.’”
16 L’etena kɛsɔ, wanɛ woka Jehowa wɔma wakatɛkɛtaka lam’asawɔ, onto l’onto la osekande, ko Jehowa akadjaka yimba ndo akahokamɛka. Ko dibuku dia eohwelo diakafundama la ntondo kande+ dikambo dia wanɛ woka Jehowa wɔma ndo dia wanɛ wakana yimba lo* lokombo+ lande.
17 Jehowa kanga lolembelembe kata ate: “Vɔ wayoyala anto ami+ lo lushi layomotondja ɛngɔ ka laande.*+ Dimi layowaoka kɛtshi, oko watokaka onto ɔnande lawokambɛ+ kɛtshi. 18 Ko nyu nyayɛna nto otshikitanu wele lam’asa onto ɔlɔlɔ la kanga kɔlɔ,+ lam’asa ɔnɛ lakambɛ Nzambi la ɔnɛ lahookambɛ.”