1 Nkumi ya dikanga

12 Rɛhɔbɔama akatshu la Shɛkɛmɛ, nɛ dia ase Isariyɛlɛ tshɛ wakaye la Shɛkɛmɛ+ dia ndjowetɛ nkumekanga.+ 2 Kam’akoke Jɛrɔbɔama ɔna Nebatɛ dui sɔ (laasɔ ko nde eke l’Edjibito, nɛ dia nde akalawɔ l’ɔtɛ wa nkumekanga Sɔlɔmɔna ndo akadjasɛka l’Edjibito),+ 3 vɔ wakatome dui dia towelɛ. L’ɔkɔngɔ diko, Jɛrɔbɔama nde l’etshumanelo k’otondo k’Isariyɛlɛ wakaye le Rɛhɔbɔama ndo wakawotɛ vate: 4 “Shɔ aketɛ osembe aso wotsho.+ Ko naka wɛ tokitshɛkitshɛ olimu wa wolo wakatokandjaka shɔ ndo wɛ tɔlɛndjɛlɛndjɛ wotsho* w’osembe wakandatɛndja, kete sho tayokokambɛ.”

5 Ko nde akawatɛ ate: “Nyotshu kele kanyoye le mi l’ɔkɔngɔ wa nshi 3.” Ɔnkɔnɛ wodja wakatshu.+ 6 Oma laasɔ, nkumekanga Rɛhɔbɔama akasawola l’epalanga w’anto* wakakambɛka Sɔlɔmɔna ka she etena kakinde eke la lɔsɛnɔ ate: “Dako diakɔna diayonyombisha lo woho wahombami nkadimola wodja?” 7 Vɔ wakookadimola vate: “Naka ɛlɔ wɛ monga okambi w’anto anɛ ndo wɛ mbetawɔ dia nsala kɛnɛ kakɔlɔmbawɔ lo mbasha okadimwelo wa dimɛna, kete vɔ wayongaka nshi tshɛ ekambi ayɛ.”

8 Koko nde akatone dako diakawosha epalanga w’anto,* ko akatosawola nde l’ɛlɔngɔ w’apami wakole kaamɛ la nde ndo wakayonga ekambi ande.+ 9 Nde akawambola ate: “Dako diakɔna diayonyosha lo woho wahombaso nkadimola anto anɛ wakanɔmbɛ vate: ‘Kitshakitsha wotsho w’osembe wakatɛndja shɔ’?” 10 Ɛlɔngɔ w’apami wakole kaamɛ la nde wakawotɛ vate: “Nganɛ kahombayɛ mbutɛ anto anɛ wakakotɛ vate: ‘Shɔ aketɛ osembe aso wotsho, koko wɛ pombaka tokitshɛkitshɛ wotsho awɔ’; wɛ pombaka mbatɛ wate: ‘Lohita lami la tshungutshungu layoleka lokende la papa woke. 11 Papa akanyahɛ osembe wa wotsho, koko dimi layahɛ wotsho okina laadiko di’osembe anyu. Papa akanyoshaka dilanya la mfimbɔ y’esongo, koko dimi layonyosha dilanya la mfimbɔ yele la mbolo lo tokoma.’”

12 Jɛrɔbɔama nde l’anto tshɛ wakaye le Rɛhɔbɔama lushi la 3, oko wakate nkumekanga ate: “Kanyoye le mi lushi la 3.”+ 13 Koko nkumekanga akakadimola wodja la ngala lo ntona dako diakawosha epalanga w’anto.* 14 Nde akaakadimola lo ndjela dako di’ɛlɔngɔ w’apami ate: “Papa aketɛ osembe anyu wotsho, koko dimi layahɛ wotsho laadiko di’osembe anyu. Papa akanyoshaka dilanya la mfimbɔ y’esongo, koko dimi layonyosha dilanya la mfimbɔ yele la mbolo lo tokoma.” 15 Ɔnkɔnɛ nkumekanga kompokamɛ kɛnɛ kakawotɛ wodja, nɛ dia Jehowa+ kakasale dia akambo salema ngasɔ dia nkotsha ɔtɛkɛta wakate Jehowa lo tshimbo ya Ahidja+ ose Shilo lo dikambo dia Jɛrɔbɔama ɔna Nebatɛ.

16 Lam’akɛnyi Isariyɛlɛ w’otondo dia nkumekanga ambotona mbahokamɛ, wodja wakakadimola nkumekanga vate: “Kakɔna kele laso le Davidɛ? Sho ndooko l’etenyi k’okitɔ le ɔna Jɛse. Isariyɛlɛ le, nyotshu le tozambizambi tanyu. Davidɛ le, endaka akambo wa luudu layɛ hita!” Ko ase Isariyɛlɛ wakakalola lawakawɔ.*+ 17 Koko Rɛhɔbɔama akatetemala mbolɛ ase Isariyɛlɛ wakadjasɛka lo esomba wa la Juda.+

18 Oma laasɔ, nkumekanga Rɛhɔbɔama akatome Adɔrama+ laki owandji wa wanɛ wakakambaka elimu la wolo, koko Isariyɛlɛ w’otondo wakawoke ave polo lo nde mvɔ. Nkumekanga Rɛhɔbɔama akalange mbahema lo pusupusu kande dia ndawɔ otsha la Jɛrusalɛma.+ 19 Ko ase Isariyɛlɛ wakatɔmbɔkwɛ+ luudu la Davidɛ polo ndo ɛlɔ.

20 Kam’akoke ase Isariyɛlɛ tshɛ dia Jɛrɔbɔama ambokalola, vɔ wakawelɛ lɛnɛ akasangana olui w’anto ko wakawetɛ nkumekanga k’Isariyɛlɛ+ w’otondo. Ndooko onto lakayele luudu la Davidɛ nto, onyake dioho dia Juda.+

21 Lam’akakome Rɛhɔbɔama la Jɛrusalɛma, mbala kakɔ ɔtɔi nde akasanganya luudu la Juda l’otondo ndo dioho dia Bɛnjamina, andɔshi wa ta wakalowanyema* nunu lokama l’akumi enanɛi (180 000) dia ndɔsha ase Isariyɛlɛ la oyango wa nkaloya lowandji le Rɛhɔbɔama ɔna Sɔlɔmɔna.+ 22 Ko ɔtɛkɛta wa Nzambi ka mɛtɛ wakaye le Shemaya,+ okambi wa Nzambi ka mɛtɛ ɔnɛ: 23 “Tɛ Rɛhɔbɔama ɔna Sɔlɔmɔna nkumekanga ka Juda ndo luudu l’otondo la Juda ndo la Bɛnjamina kaamɛ l’anto akina wate: 24 ‘Jehowa kata ate: “Tanyotshɔke ndo tanyɔlɔshake anangɛnyu w’ase Isariyɛlɛ. Onto l’onto l’atei anyu akalole lakande, nɛ dia dimi kakasale dia dui nɛ salema.”’”+ Ɔnkɔnɛ vɔ wakakitanyiya ɔtɛkɛta wa Jehowa ko wakakalola lawakawɔ, oko wakawatɛ Jehowa.

25 Oma laasɔ, Jɛrɔbɔama akake* Shɛkɛmɛ+ lo lɛkɛ l’akona l’Efrayimɛ ko akadjasɛ lɛkɔ. Oma lɛkɔ, nde akatshu ko akatoka* Penuɛlɛ.+ 26 Jɛrɔbɔama akate l’otema ande ate: “Kakianɛ diolelo diayokalola lo luudu la Davidɛ.+ 27 Naka anto anɛ wayotetemala ntshɔ dia tolambola elambo la Jɛrusalɛma+ lo luudu la Jehowa, kete etema w’anto anɛ wayokadimɔ nto le nkumɛwɔ, le Rɛhɔbɔama nkumekanga ka Juda. Mɛtɛ vɔ wayondjaka ko wayokalola le Rɛhɔbɔama nkumekanga ka Juda.” 28 L’ɔkɔngɔ wa nkumekanga nyanga kanyi, nde akasale tana ta ngɔmbɛ+ ta paonyi 2, ko akatɛ anto ate: “Ekɔ paa efula le nyu dia ntshɔka la Jɛrusalɛma. Isariyɛlɛ le, Nzambi kanyu nde ɔnɛ, ɔnɛ lakanyotondja oma lo wodja w’Edjibito.”+ 29 Ko nde akakitsha yana mɔtshi la Bɛtɛlɛ+ ndo nde akakitsha yana kina la Danɛ.+ 30 Dui sɔ diakaakonya dia nsala pɛkato+ ndo anto wakatshɔka polo la Danɛ dia tɔtɛmɔla yana mɔtshi lɛkɔ.

31 Ko nde akake mvudu y’ɔtɛmwɛlɔ lo ahole wa la diko ndo akasɔnɛ ɛlɔmbɛdi oma l’atei w’anto k’anto waki komonga ase Lɛwi.+ 32 Jɛrɔbɔama akashikikɛ nto fɛtɛ kɛmɔtshi lo ngɔndɔ ka 8 nshi 15 oko fɛtɛ kakasalemaka la Juda.+ Lo elambwelo kakandasale la Bɛtɛlɛ,+ nde akalambolɛka tana ta ngɔmbɛ takandasale elambo, ndo nde akadje ɛlɔmbɛdi la Bɛtɛlɛ dikambo di’ahole wa la diko wakandasale. 33 Ko lo ngɔndɔ ka 8 nshi 15, nde akatatɛ nambola elambo lo elambwelo kakandasale la Bɛtɛlɛ, lo ngɔndɔ kakandakongɛ ndamɛ. Nde akashikikɛ fɛtɛ dikambo di’ase Isariyɛlɛ ndo akadɛ lo elambwelo dia tolambola ndo totshumba elambo.