Esambo
Le ɔnɔmbɔdi. Ngɛngu ka Davidɛ.
64 Nzambi le, ooke dui diami etena kakɔsɛngasɛngami.+
Olame lɔsɛnɔ lami oma lo wɔma w’efula w’otunyi.
2 Onkokee oma lo toseke ta lo woshɛshɛ t’akanga wa kɔlɔ,+
Oma l’olui w’atshi wa kɔlɔ.
3 Vɔ kɛtɛmɔlaka nemi yawɔ oko lokuwa la ta;
Vɔ mbɛdiyaka ɛtɛkɛta awɔ wa lɔlɛngɔ oko mpito,
4 Dia ntshieta onto laha la onongo oma lo dihole diande di’eshamelo;
Vɔ mbotshietaka la shashimoya, aha la wɔma.
5 Vɔ kukutɛka tokanyi tawɔ ta kɔlɔ;*
Vɔ kɛtshanyaka woho wa mbishɛ tolonga tawɔ.
Vɔ mbutaka vate: “Akɔna ayowaɛna?”+
6 Vɔ nyangaka toho t’eyoyo ta nsala kɔlɔ,
Vɔ kongɛka yoho ya mayɛlɛ ya nsala lo woshɛshɛ;+
Ekanelo ka yimba kele l’otema w’onto l’onto hamanema mfundo.
7 Koko Nzambi ayowatshieta;+
Vɔ wayohomɔ lohito la shashimoya.
8 Nemi yawɔ hita yayowakɔsha;+
Wanɛ tshɛ wenda wayonyinginya ɛtɛ awɔ.
9 Ko anto tshɛ wayoka wɔma,
Vɔ wayewoya kɛnɛ kambosala Nzambi,
Ndo vɔ wayonga la shɛnɔdi ya nshihodia etsha ande.+