Ɛzɛkiyɛlɛ
24 Ɔtɛkɛta wa Jehowa wakaye le mi lo ɔnɔnyi wa 9 lo ngɔndɔ ka 10 nshi 10 ɔnɛ: 2 “Ɔna onto, funda datɛ* nɛ, lushi l’ɛlɔ. Nkumekanga ka Babilɔna ambotatɛ ndɔsha Jɛrusalɛma ɛlɔ.+ 3 Oka yokedi* lo dikambo dia luudu la atɔmbɔki ndo ta lo dikambo diawɔ wate:
“‘Nkum’Olongo Nkumadiɔndjɔ Jehowa kata ate:
“Ahɛ mpoke kakatɛwɔ; ahɛtɔ lo dja ndo dja ashi lɔkɔ.+
4 Dja emunyi wa nyama lɔkɔ,+ omunyi tshɛ wa dimɛna,
Elemba ka lokolo ndo elemba ka lonya; ndo lodiatɔ la weka w’amɛna.
5 Ɔsa ɔkɔkɔ woleki dimɛna l’atei wa dongalonga+ ndo dja nkunyi lo wedi akɔ tshɛ wa l’ɛse ka mpoke.
Tukutsha emunyi ndo katɛ weka l’etei katɔ.”’
6 Diakɔ diata Nkum’Olongo Nkumadiɔndjɔ Jehowa ate:
‘Mananu le osomba wakɛdia dikila,+ mpoke kakatɛwɔ ka matadi kele matadi atɔ watanyema!
Nya omunyi la omunyi+ oma lɔkɔ; tanyokake owale dikambo diawɔ.
7 Nɛ dia dikila diawɔ diekɔ l’etei kawɔ;+ osomba akɔ wakaditshola laadiko wa dive dia hwe.
Vɔ koditshola lo nkɛtɛ, dia difɛ la ditshu.+
8 Dia mfudia nkɛlɛ dia mbela shɔmbɔya,
Dimi lakakitsha dikila diawɔ lo dive dia ngaingai dia hwe
Diaha diɔ kombama.’+
9 “Diakɔ diata Nkum’Olongo Nkumadiɔndjɔ Jehowa ate:
‘Mananu le osomba wakɛdia dikila!+
Dimi layotshumanya tota dia nkunyi.
10 Tshumanya nkunyi ndo hɛtsha dja,
Tukutsha nyama dimɛna, tshola oshi, kele tshika weka walongole.
11 Kitsha mpoke ka hwe laadiko dia akalanga dia tɔ ndolɔ
Dia nkonga ka lɔkɔ mbelɔ beela la dja.
Ko mindo yatɔ yayɔlɛlɔ l’etei katɔ+ ndo matadi atɔ wayolongola.
12 Ɔnɛ ekɔ dui diasha nkɛlɛ ndo dialɛndja,
Nɛ dia matadi w’efula hawotomɔ.+
Okɛtɔ lo dja la matadi atɔ!’
13 “‘Mindo kayɛ kakaye oma lo lɔkɛwɔ layɛ la mindo.+ Dimi lakayange kɛɛdia, koko wɛ kɔmbɛla oma lo mindo kayɛ. Wɛ hatɛla polo lam’ayokitakita+ nkɛlɛ kakokami. 14 Dimi Jehowa dimɛ kambɔtɛkɛta. Dui sɔ diayosalema. Dimi layokɔsɛ yɛdikɔ aha la kooka kɛtshi ndo aha la monga la lonyangu.+ Vɔ wayokolombosha lo ndjela mboka yayɛ ndo etsha ayɛ,’ mbata Nkum’Olongo Nkumadiɔndjɔ Jehowa.”
15 Ko ɔtɛkɛta wa Jehowa wakaye le mi nto ɔnɛ: 16 “Ɔna onto, lo mayi ka sso, dimi layanga mbɔsa olangemi ayɛ oma le yɛ.+ Wɛ hahombe nsala otanda;* ndo wɛ hahombe ndela kana nkɛdia asɔyi. 17 Kuma akumu aha la dui mbokɛma ndo tosalake sɛlɛmɔnyi y’otanda dikambo dia onto lambovɔ.+ Lɔta dihɔndɔ diayɛ dia l’ɔtɛ+ ndo lɔta sabata+ yayɛ. Wɛ hahombe nkomba onyɔ*+ ndo tɔlɛke mbo ya ndɛ yayokela anto akina.”*+
18 Ko dimi lakatɛkɛta la anto la pindju ndo wadɛmi akavu la dikɔlɔ. Ɔnkɔnɛ la pindju dimi lakasale oko wakawambidjangɛ. 19 Anto wakambutɛka ɔnɛ: “Onde wɛ hatototɛ woho wɔtɔnɛ akambo wasalayɛ anɛ la so?” 20 Dimi lakaakadimola nte: “Ɔtɛkɛta wa Jehowa wakaye le mi ɔnɛ: 21 ‘Tɛ luudu la Isariyɛlɛ wate: “Nkum’Olongo Nkumadiɔndjɔ Jehowa kata ate: ‘Dimi layanga mɔnyɔla tɛmpɛlɔ kami k’ekila,+ kiɔkɔ ya efula ka lotamanya lanyu, ɛngɔ kalanganyu efula ndo kakombola otema* anyu. Ananyu w’apami ndo ananyu wa wamato wakanyatshike l’ɔkɔngɔ wayodiakema la lokuwa la ta.+ 22 Ko nyu nyayosala oko wamomosala. Nyu hanyotokomba onyɔ* anyu ndo hanyotɔlɛ diangɔ diayonyela anto akina.+ 23 Ahɔndɔ anyu wa lo ɛtɛ wayonga lo ɛtɛ anyu ndo sabata yanyu lo ekolo anyu. Hanyotosala otanda ndo hanyotolela. Koko nyayɔhɔnda lo munga+ yanyu, ndo nyayokuma akumu le onto la wonyande. 24 Ɛzɛkiyɛlɛ aya djembetelo le nyu.+ Oko wamondosala mbayonyosala. Lam’ayosalema dui sɔ, nyayohomba mbeya dia dimi kele Nkum’Olongo Nkumadiɔndjɔ Jehowa.’”’”
25 “Wɛ ɔna onto, lushi layomakɔsɔla dihole diawɔ di’eshamelo, ɛngɔ k’olangala efula kangɛnangɛnawɔ, ɛngɔ kalangawɔ, ɛngɔ kakombola otema* awɔ kaamɛ la anawɔ w’apami la anawɔ wa wamato,+ 26 onto layohandɔ+ ayoyokotɛ. 27 Lushi lɔsɔ, wɛ ayofola onyɔ ayɛ ndo ayɔtɛkɛta la ɔnɛ layohandɔ ko wɛ hatonga nto lomi.+ Wɛ ayonga djembetelo le wɔ, ko vɔ wayohomba mbeya dia dimi kele Jehowa.”