Jɛrɛmiya
19 Jehowa kata ate: “Tshɔka tosombe ɔlɔndɔ wa diwomba oma le okengi wa mpoke.+ Ɔsa dikumanyi dimɔtshi dia wodja ndo dikumanyi dimɔtshi di’ɛlɔmbɛdi, 2 kele tshɔka otsha l’Okidi w’Ɔna Hinɔmɛ,+ lo mbɔtwɛlɔ ka Soko dia bɛtshi dia mpoke. Ndo lɛkɔ, tewoya ɛtɛkɛta wakotɛmi. 3 Kote ɔnɛ: ‘Nyohokame ɔtɛkɛta wa Jehowa, nyu nkumi ya dikanga ya Juda ndo anto wadjasɛ la Jɛrusalɛma. Jehowa kanga lolembelembe, Nzambi k’Isariyɛlɛ kata ate:
“‘“Dimi layanga mbela mpokoso lo dihole nɛ, ndo atoyi wa onto tshɛ loka dui sɔ wayonga la paa. 4 Nɛ dia vɔ wakansɛkɛ+ ndo wakasale diaha dihole nɛ mbeyama.+ Vɔ nambolaka tozambizambi elambo lɔkɔ, tele vɔ, watshɛwɔ ndo nkumi ya dikanga ya Juda kombeya, ndo vɔ wambolodia dihole nɛ la dikila di’anto waha la onongo.+ 5 Vɔ wakahike ahole wa la diko wa Baala, dia ntshumba anawɔ w’apami lo dja oko elambo wa lotshumba w’etondo dikambo dia Baala,+ dui diakimi kombidjanga kana mbuta ndo diahatayalaka ndooko lushi lo otema ami.”’*+
6 “‘“Ɔnkɔnɛ eenda, nshi yekɔ lo ndjaye,” mbata Jehowa, “yele dihole nɛ hadielamɛ nto ɔnɛ Tɔfɛta kana Okidi w’Ɔna Hinɔmɛ, koko Okidi wa Ediakelo.+ 7 Dimi layofukutanya dikongelo dia Juda ndo dia Jɛrusalɛma lo dihole nɛ, dimi layowakɔsha la lokuwa la ta la ntondo k’atunyi awɔ ndo l’anya wa wanɛ wayanga dia mbɔsa nsɛnɔ yawɔ.* Ndo dimi layokimɔ edo awɔ le tofudu ta l’olongo ndo le nyama ya la nkɛtɛ oko mbo ya ndɛ.+ 8 Dimi layetɛ osomba ɔnɛ ɛngɔ ka wɔma ndo ɛngɔ ka mbidɛ ekoko. Ɔnɛ tshɛ layeta suke la wɔ ayondama la wɔma ko ayoda ekoko l’ɔtɛ w’asui awɔ tshɛ.+ 9 Ndo dimi layosala dia vɔ ndɛ emunyi w’anawɔ w’apami la w’anawɔ wa wamato, ndo onto l’onto ayɔlɛ emunyi w’osekande l’ɔtɛ wa odingelo ndo oshishelo wa elongamelo l’etena kayowɔhɛnyahɛnyama l’asui w’oma le atunyi awɔ la wanɛ wayanga dia mbɔsa nsɛnɔ yawɔ.”’*+
10 “Oma laasɔ, ko wɛ mbola ɔlɔndɔ lo washo w’anto watatshu la yɛ, 11 ko wɛ mbatɛ ɔnɛ: ‘Jehowa kanga lolembelembe kata ate: “Nganɛ mbayomolanya anto anɛ ndo osomba ɔnɛ, oko onto lola ɛngɔ k’okengi wa mpoke woho wahatakoke nɔngɔsɔma nto; ndo wayokundɛ edo la Tɔfɛta edja ndo ahole wa mbakundɛ wamboshila.”’+
12 Jehowa kata ate: “‘Kɛsɔ mbayomosalɛ dihole nɛ ndo anto wadjasɛ lɔkɔ, dia mbetɛ osomba ɔnɛ oko Tɔfɛta. 13 Ndo mvudu ya Jɛrusalɛma la mvudu ya nkumi ya dikanga ya Juda yayonga mindo oko dihole nɛ, mbuta ate oko Tɔfɛta,+ ɛɛ, mvudu tshɛ yele lo nsambe yayɔ mbakawalambolaka alembe tshɛ wa l’olongo+ elambo ndo lɛnɛ akawalambolaka elambo wa lotɛ dikambo dia tozambizambi tokina.’”+
14 Etena kakakalola Jɛrɛmiya oma la Tɔfɛta lɛnɛ akootome Jehowa dia tota prɔfɛsiya, nde akemala lo sɛkɛ dia luudu la Jehowa ko akatɛ anto tshɛ ɔnɛ: 15 “Jehowa kanga lolembelembe, Nzambi ka Isariyɛlɛ kata ate: ‘Dimi layanga mbela lo osomba ɔnɛ ndo lo ahole tshɛ wa weke wa lɔkɔ mpokoso tshɛ kakamate lo dikambo diawɔ, nɛ dia la ɛtɛ wolo tshɛ vɔ wakatone* nkitanyiya ɛtɛkɛta ami.’”+