Isaya
66 Jehowa kata ate:
“Olongo wekɔ kiti kami ka lowandji ndo nkɛtɛ kekɔ kihona k’ekolo ami.+
2 “Lonya lami hita mbakasale diangɔ sɔ tshɛ,
Ndo ngasɔ mbakadiayala diɔ tshɛ,” mbata Jehowa.+
“Ɔnkɔnɛ otsha le onto ɔnɛ kayomenda,
Le ɔnɛ lele la okitshakitsha ndo lambɔtɛtɛ solo lasaka lokomba lam’okande* ɔtɛkɛta ami.+
3 Ɔnɛ ladiaka ngɔmbɛ ekɔ oko ɔnɛ ladiaka onto.+
Ɔnɛ lalambola ɔkɔkɔ ekɔ oko ɔnɛ lɔkɔla nkingo ka mfɔ.+
Ɔnɛ lakimɔ woshasha, oko dikila dia nsombo!+
Ɔnɛ lakimɔ olambo wa tshɔ ya wɛma wa eohwelo+ ekɔ oko ɔnɛ latshɔkɔla la ɛtɛkɛta wa maji.*+
Vɔ wambɔsɔna mboka yawɔ hita,
Ndo vɔ* ngɛnangɛnaka kɛnɛ kele nyɛtɛɛtɛ.
4 Ɔnkɔnɛ, dimi layɔsɔna toho ta mbasha dilanya,+
Ndo dimi layowaela paka akambo wokawɔ wɔma.
Nɛ dia lam’akamelɛ, ndooko onto laketawɔ;
Lam’akamatɛkɛta, ndooko onto lakahokamɛ.+
Vɔ wakatetemala nsala kɛnɛ kaki kɔlɔ lo washo ami,
Ndo vɔ wakasɔnɛ dia nsala kɛnɛ kahangɛnyangɛnya.”+
5 Nyohokame ɔtɛkɛta wa Jehowa, nyu wanɛ wasaka lokomba lam’okanyu* ɔtɛkɛta ande:
“Anangɛnyu wanyohetsha ndo wanyodiaka l’ɔtɛ wa lokombo lami wakate vate: ‘Jehowa atombɔme!’+
Koko nde ayɛnama ndo ayonyosha ɔngɛnɔngɛnɔ,
Vɔ mbayoshama nsɔnyi.”+
6 Londjo la lofunguso lekɔ lo ndja oma lo osomba, londjo l’oma lo tɛmpɛlɔ!
Ɔsɔ ekɔ londjo la woho wafuta Jehowa atunyi ande kɛnɛ kahombawɔ nongola.
7 La ntondo ka nde diɛnɛ, nde akote.+
La ntondo ka nde ntata lɔɔnɔ, nde akote ɔna pami.
8 Akɔna ambokaka dui dia ngasɔ?
Akɔna ambɛnaka akambo wa ngasɔ?
Onde wodja wayotɔ lushi ɔtɔi?
Kana onde wodja wayotɔ mbala kakɔ ɔtɔi?
Koko, kam’akatatɛ Siɔna ntata lɔɔnɔ, nde akote anande w’apami.
9 “Onde dimi layosala dia ɔna monga suke la mbotɔ ko oma laasɔ dimi ndjookaloya nto?” mbata Jehowa.
“Kana onde dimi layosala dia eotwelo monga ko oma laasɔ dimi ndjiha otema?” mbata Nzambi kayɛ.
10 Nyɔngɛnɛngɛnɛ kaamɛ la Jɛrusalɛma ndo nyonge l’ɔlɔ kaamɛ la yɔ,+ nyu wanɛ tshɛ wayioka ngandji.+
Nyonge la ɔlɔ w’efula kaamɛ la yɔ, nyu wanɛ tshɛ wayilela,
11 Nɛ dia nyu nyayɔlɔma ko nyayolota awɛlɛ ayɔ wa esambelo,
Ndo nyu nyayɔnɔ efula ndo nyayɔngɛnangɛna lo efula ka lotombo layɔ.
12 Nɛ dia Jehowa kata ate:
Nyu nyayɔlɔma ndo nyayɛmbama lo lokondo,
Nyu nyayetshetshama lo dihɛlɔ.
13 Oko watosambaka mama ɔnande,
Dimi layotetemala nyosamba;+
Ndo nyu nyayosambema+ l’ɔtɛ wa Jɛrusalɛma.
14 Nyu nyayɛna dui sɔ, ko etema anyu wayɔngɛnangɛna,
Weka anyu wayɔmɔnga oko adiyo w’eyoyo.
15 Nɛ dia Jehowa ayoya oko dja,+
Ndo pusupusu yande yekɔ oko lɔpɛpɛ la wolo,+
Dia nsɔmbɔya la odudu wa wolo,
Dia mpangwɛ la nyombe ya dja.+
16 Nɛ dia Jehowa ayela elanyelo la dja,
Ɛɛ, la lokuwa lande la ta dia ndanya anto* tshɛ;
Ndo wanɛ wayodiakema oma le Jehowa wayonga efula.
17 “Wanɛ wayakidia ndo wayaɛdia dia mbɔtɔ lo dikambɔ*+ watayele ɔnɛ lele l’atei atei, wanɛ walɛ emunyi wa nsombo+ ndo diangɔ dia wɔnɔnyi ndo dji,+ vɔ tshɛ wayokoma lo ekomelo kawɔ kaamɛ,” mbata Jehowa. 18 “Lam’ele dimi mbeyaka elimu awɔ ndo tokanyi tawɔ, dimi lekɔ lo ndjaye dia ndjotshumanya anto wa lo wedja tshɛ ndo ɛtɛkɛta tshɛ, ndo vɔ wayoya ko wayɛna lotombo lami.”
19 “Dimi layotoma djembetelo l’atei awɔ ndo layotoma amɔtshi l’atei wa wanɛ wakahandɔ otsha lo wedja, otsha la Tarashishi,+ Pulu ndo Luda,+ otsha le wanɛ woka ota, otsha la Tubala ndo Javana,+ ndo lo asɛnga w’etale. Dimi layowatoma le wanɛ waki komboka akambo wendana la mi ndo waki kɔmɛna lotombo lami; ko vɔ wayewoya lotombo lami l’atei wa wedja.+ 20 Vɔ wayɔtɔla ananyɔ tshɛ oma lo wedja tshɛ+ oko woshasha le Jehowa lo mfalasa, lo pusupusu, lo pusupusu yofame, lo mfalo ndo lo kamɛlɔ yalawɔ efula polo lo dikona diami di’ekila la Jɛrusalɛma,” mbata Jehowa, “oko etena kela ase Isariyɛlɛ woshasha awɔ lo ɛngɔ ka pudipudi oya lo luudu la Jehowa.”
21 “Ndo nto dimi layɔsa amɔtshi dikambo dia ɛlɔmbɛdi ndo dikambo dia ase Lɛwi,” mbata Jehowa.
22 “Nɛ dia oko wele olongo w’oyoyo ndo nkɛtɛ k’oyoyo+ kayangami nsala kayotshikala la ntondo kami,” mbata Jehowa, “ngasɔ mbayotshikala ananyu* ndo lokombo lanyu.”+