2 Samuɛlɛ

5 Oma laasɔ, waoho tshɛ w’Isariyɛlɛ wakaye le Davidɛ la Hɛbɛrɔna+ ko wakate vate: “Eenda, sho tekɔ weka ayɛ ndo emunyi ayɛ.*+ 2 Lo nshi yakete lam’aki Saolo nkumekanga kaso, wɛ kakalɔmbɔlaka Isariyɛlɛ lo ata.*+ Ndo Jehowa akakotɛ ate: ‘Wɛ ayolama wodja ami w’Isariyɛlɛ ndo wɛ ayonga ɔnɔmbɔdi w’Isariyɛlɛ.’”+ 3 Ko dikumanyi tshɛ dia l’Isariyɛlɛ wakaye le nkumekanga la Hɛbɛrɔna ndo nkumekanga Davidɛ akadje sheke kaamɛ la wɔ+ la Hɛbɛrɔna la ntondo ka Jehowa. Oma laasɔ, vɔ wakakite Davidɛ esɔ dia nde monga nkumekanga k’Isariyɛlɛ.+

4 Davidɛ aki l’ɛnɔnyi 30 lam’akandonge nkumekanga ndo nde akolɛ l’edja k’ɛnɔnyi 40.+ 5 Nde akolɛ Juda l’edja k’ɛnɔnyi 7 la ngɔndɔ 6 la Hɛbɛrɔna ndo nde akolɛ Isariyɛlɛ w’otondo la Juda l’edja k’ɛnɔnyi 33 la Jɛrusalɛma.+ 6 Ko nkumekanga nde l’anto ande wakatshu la Jɛrusalɛma dia tɔlɔsha ase Jɛbusɛ+ wakadjasɛka l’ɛtshi ka nkɛtɛ kakɔ. Vɔ wakasɔkɛ Davidɛ vate: “Wɛ hakomaki pondjo lanɛ! Oyadi kanga tshungu kana etshumbe ayokotshanya.” Vɔ wakafɔnyaka vate: ‘Davidɛ hakomaki pondjo lanɛ.’+ 7 Koko Davidɛ akaamamala la longele la Siɔna lele nshi nyɛ Osomba wa Davidɛ.+ 8 Ɔnkɔnɛ, Davidɛ akate lushi lɔsɔ ate: “Wanɛ wayɔlɔsha ase Jɛbusɛ pombaka mbeta lo ɔkɛdi w’ashi dia vɔ todiaka oyadi ‘etshumbe kana kanga tshungu,’ lahetsha Davidɛ!”* Diakɔ diatawɔ ɔnɛ: “Kanga tshungu kana etshumbe hɔtɔki pondjo lo luudu.” 9 Oma laasɔ, Davidɛ akatodjasɛ lo longele ndo lɔ mbelamɛka* ɔnɛ Osomba wa Davidɛ. Davidɛ akatatɛ mbika l’otshimbedi alɔ w’otondo oma lo Milo*+ polo l’etei.+ 10 Ɔnkɔnɛ, Davidɛ akatahamaka mpama tsho+ ndo Jehowa Nzambi kanga lolembelembe aki kaamɛ la nde.+

11 Hirama+ nkumekanga ka Tura akatomɛ Davidɛ akɛndji kaamɛ la abaya w’osongo w’olondo,+ etshudi w’abaya ndo waa masɔ yaka l’ave dia mbika mpele, ko vɔ wakatatɛ mbikɛ Davidɛ luudu.*+ 12 Ko Davidɛ akeye dia Jehowa ambooshikikadia nkumekanga k’Isariyɛlɛ+ ndo ambodiya diolelo diande+ lo wahɔ wa wodja Ande w’Isariyɛlɛ.+

13 Davidɛ akatɔsa eseka ekina+ ndo akatotshuka wadi akina la Jɛrusalɛma l’ɔkɔngɔ wa nde mimɔ oma la Hɛbɛrɔna ndo Davidɛ+ akatota ana akina w’apami ndo wa wamato. 14 Nkombo y’ana wakandote la Jɛrusalɛma yɔ nyɛ: Shamua, Shobaba, Natana,+ Sɔlɔmɔna,+ 15 Ibarɛ, Elishua, Nɛfɛngɛ, Jafia, 16 Elishama, Eliyada ndo Elifɛlɛtɛ.

17 Lam’akoke ase Filistiya dia wambokita Davidɛ esɔ dia monga nkumekanga k’Isariyɛlɛ,+ ase Filistiya tshɛ wakaye dia ndjoyanga Davidɛ.+ Lam’akoke Davidɛ dui sɔ, nde akaholɔ otsha lo longele.+ 18 Ko ase Filistiya wakaye ndo wakahandjɔnɛ l’Okidi* wa Rɛfayima.+ 19 Davidɛ akambola Jehowa+ ate: “Mbide dia tɔlɔsha ase Filistiya? Onde wɛ ayowakimɔ lo anya ami?” Ko Jehowa akatɛ Davidɛ ate: “Dɛ, nɛ dia ndooko onyake dimi layokimɔ ase Filistiya lo anya ayɛ.”+ 20 Ɔnkɔnɛ, Davidɛ akaye la Baala-Pɛrazima ndo Davidɛ akaadiake lɛkɔ. Ko nde akate ate: “Jehowa ambohandjola atunyi ami+ la ntondo kami oko watohandjolaka ashi nkonge.” Diakɔ diakandɔlɛ dihole diakɔ ate Baala-Pɛrazima.*+ 21 Ase Filistiya wakatshike dikishi diawɔ laawɔ, ko Davidɛ nde l’anto ande wakadiɔshi.

22 L’ɔkɔngɔ diko, ase Filistiya wakaye nto, ko wakahandjɔnɛ l’Okidi* wa Rɛfayima.+ 23 Davidɛ akambola Jehowa kanyi, ko Nde akate ate: “Tosembɔke tɔɔ. Koko tshimba oma l’ɔkɔngɔ awɔ kele tɔlɔ la wɔ mbɛlanɛ la hioka y’esongo wa baka. 24 Lam’ayoyoka nkindo ya lɔkɛndɔ la diko dia hioka y’esongo wa baka, totshimbatshimbake, nɛ dia Jehowa ayeta la ntondo kayɛ dia ndjaka asɔlayi w’ase Filistiya.” 25 Ɔnkɔnɛ Davidɛ akasale paka oko wakawodjangɛ Jehowa, ko nde akadiake ase Filistiya+ oma la Ngɛba+ lo mboka k’otondo k’otsha la Ngezɛrɛ.+