2 Nkumi ya dikanga

14 L’ɔnɔnyi wa 2 w’ɛlɔmbwɛlɔ ka Jɛhɔashi+ ɔna Jɛhɔahaza nkumekanga k’Isariyɛlɛ, Amaziya ɔna Jɛhɔashi nkumekanga ka Juda akayala nkumekanga. 2 Nde aki l’ɛnɔnyi 25 lam’akandayala nkumekanga ndo nde akolɛ l’edja k’ɛnɔnyi 29 la Jɛrusalɛma. Nyango lokombo lande Jɛhɔadina, ose Jɛrusalɛma.+ 3 Nde akatetemala nsala kɛnɛ kaki ɔlɔlɔ lo washo wa Jehowa, koko aha oko Davidɛ+ dia tshɛnde. Nde akasale akambo tshɛ oko wakasale Jɛhɔashi ya she.+ 4 Koko ahole wa la diko kominyɛma+ ndo anto wakatetemala nambola ndo ntshumba elambo lo ahole wa la diko.+ 5 Kam’akashikikala diolelo lo anya ande, nde akadiake ekambi ande wakadiake she laki nkumekanga.+ 6 Koko nde kondjaka ana w’andjakanyi lo ndjela didjango dia Jehowa diofundami lo dibuku di’Ɛlɛmbɛ wa Mɔsɛ ɔnɛ: “Ambutshi hawohombe ndjakema l’ɔtɛ wa kɛnɛ kasala anawɔ ndo ana hawohombe ndjakema l’ɔtɛ wa kɛnɛ kasala ambutshi awɔ. Onto pombaka ndjakema paka l’ɔtɛ wa pɛkato kande hita.”+ 7 Nde akadiake ase Ɛdɔmɛ+ lo Okidi wa Lɛɛhɔ,+ apami nunu dikumi (10 000), ndo nde akɔshi Sɛla la ta,+ ko lokombo latɔ lakayonga Jɔkɛtɛlɛ polo ndo ɛlɔ.

8 Oma laasɔ, Amaziya akatomɛ Jɛhɔashi ɔna Jɛhɔahaza ɔna Jehu nkumekanga k’Isariyɛlɛ akɛndji ate: “Yaka toyɔlɔ.”*+ 9 Jɛhɔashi nkumekanga k’Isariyɛlɛ akatomɛ Amaziya nkumekanga ka Juda dikɛndji ate: “Ɔkɔdi w’atɛndɛ wa la Lɛbanɔna akatomɛ olondo wa la Lɛbanɔna dikɛndji ate: ‘Etawɔ dia ɔnami ntshuka ɔnayɛ la womoto.’ Koko nyama kɛmɔtshi ka l’okonda wa la Lɛbanɔna kakete laawɔ, ko kakahɔtshahɔtsha ɔkɔdi akɔ w’atɛndɛ. 10 Ekɔ mɛtɛ dia wɛ ambɔlɛndja Ɛdɔmɛ;+ ɔnkɔnɛ otema ayɛ waya la lotamanya. Ngɛnangɛna la lotombo layɛ, koko tshikala lo luudu* layɛ hita. Lande na kayayangɛyɛ elanyelo ndo ɔkwɛlɔ ayɛ wɛ la Juda?” 11 Koko Amaziya komboka.+

Ɔnkɔnɛ Jɛhɔashi nkumekanga k’Isariyɛlɛ akatshu, ko nde la Amaziya nkumekanga ka Juda wakalɔ la Bɛtɛ-Shɛmɛshɛ+ k’ase Juda.+ 12 Isariyɛlɛ akalɛndja Juda, ko onto l’onto akalawɔ otsha lakande.* 13 Jɛhɔashi nkumekanga k’Isariyɛlɛ akande Amaziya nkumekanga ka Juda, ɔna Jɛhɔashi ɔna Ahaziya la Bɛtɛ-Shɛmɛshɛ. Ko vɔ wakakome la Jɛrusalɛma ndo nde akatondola wosho lo ehele ka lokombo la Jɛrusalɛma, oma la Soko di’Efrayimɛ+ polo la Soko dia Tshuku,+ kubita 400.* 14 Nde akɔshi paonyi tshɛ la mfɛsa ndo diangɔ tshɛ diaki lo luudu la Jehowa ndo lo waombelo wa lo luudu* la nkumekanga, kaamɛ ndo esunge. Oma laasɔ, nde akakalola la Samariya.

15 Lo kɛnɛ kendana l’etenyi kekina k’ɔkɔndɔ wa Jɛhɔashi, kɛnɛ kakandasale ndo wolo ande la woho wakandalɔsha Amaziya nkumekanga ka Juda, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ? 16 Oma laasɔ, Jɛhɔashi aketama dia momuya kaamɛ la watshɛnde ndo wakookundɛ la Samariya+ lale nkumi ya dikanga y’Isariyɛlɛ, ko ɔnande Jɛrɔbɔama*+ akayala nkumekanga lo dihole diande.

17 Amaziya+ ɔna Jɛhɔashi nkumekanga ka Juda akasɛnɛ ɛnɔnyi 15 l’ɔkɔngɔ wa nyɔi ka Jɛhɔashi+ ɔna Jɛhɔahaza nkumekanga k’Isariyɛlɛ.+ 18 Lo kɛnɛ kendana l’etenyi kekina k’ɔkɔndɔ wa Amaziya, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda? 19 L’ɔkɔngɔ diko, wakawɔtwɛ sheke+ la Jɛrusalɛma, ko nde akalawɔ la Lakishi ndo vɔ wakatome apami dia mboyela la Lakishi ko wakatoodiaka lɛkɔ. 20 Ɔnkɔnɛ, vɔ wakakalola la nde lo waa mfalasa ko wakayookundɛ la Jɛrusalɛma lale watshɛnde l’Osomba wa Davidɛ.+ 21 Oma laasɔ, ase Juda tshɛ wakɔshi Azariya*+ laki l’ɛnɔnyi 16,+ ko wakawetɛ nkumekanga lo dihole dia Amaziya+ wa she. 22 Nde akayohika nto Elatɛ+ ko akakikaloya le Juda l’ɔkɔngɔ wa nkumekanga* mbetama dia momuya kaamɛ la watshɛnde.+

23 L’ɔnɔnyi wa 15 w’ɛlɔmbwɛlɔ ka Amaziya ɔna Jɛhɔashi nkumekanga ka Juda, Jɛrɔbɔama+ ɔna Jɛhɔashi nkumekanga k’Isariyɛlɛ akayala nkumekanga la Samariya ndo nde akolɛ l’edja k’ɛnɔnyi 41. 24 Nde akatetemala nsala kɛnɛ kaki kɔlɔ lo washo wa Jehowa. Nde kotshika pɛkato tshɛ yakakonya Jɛrɔbɔama ɔna Nebatɛ Isariyɛlɛ dia nsala.+ 25 Nde akakaloya olelo w’Isariyɛlɛ oma la Lɛbɔ-Hamatɛ*+ polo lo Ndjale ka Araba,*+ lo ndjela ɔtɛkɛta wakate Jehowa Nzambi k’Isariyɛlɛ lo tshimbo y’okambi ande Jɔna+ ɔna Amitai, omvutshi w’oma la Ngata-Hɛfɛrɛ;+ 26 nɛ dia Jehowa akɛnyi sui di’efula diaki la Isariyɛlɛ.+ Ndooko onto lakatshikala dia nkimanyiya Isariyɛlɛ, kaanga onto laha l’ekimanyielo kana lele wɔdu. 27 Koko Jehowa akalake diaha nyimola lokombo la Isariyɛlɛ l’ɛse olongo.+ Ɔnkɔnɛ, nde akaashimbɛ lo tshimbo ya Jɛrɔbɔama ɔna Jɛhɔashi.+

28 Lo kɛnɛ kendana l’etenyi kekina k’ɔkɔndɔ wa Jɛrɔbɔama, kɛnɛ tshɛ kakandasale ndo wolo ande, woho wakandalɔsha ndo woho wakandakaloya Damasɛkɛ+ ndo Hamatɛ+ le Juda lo Isariyɛlɛ, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ? 29 Oma laasɔ, Jɛrɔbɔama aketama dia momuya kaamɛ la watshɛnde lale nkumi ya dikanga y’Isariyɛlɛ; ko ɔnande Zɛkariya+ akayala nkumekanga lo dihole diande.