1 Nkumi ya dikanga

14 L’etena kɛsɔ, Abidja ɔna Jɛrɔbɔama akandama la hemɔ. 2 Ko Jɛrɔbɔama akatɛ wadɛnde ate: “Lam’alangayɛ, emala ndo tshikitanya ɛnamelo kayɛ diaha vɔ mbeya dia wɛ ekɔ wadi aki Jɛrɔbɔama, kele tshɔka otsha la Shilo. Omvutshi Ahidja ekɔ lɛkɔ. Nde kakambutɛ dia dimi monga nkumekanga ka wodja ɔnɛ.+ 3 Ɔsa mapa 10, ekate wa lɔlɔya ndo ɔlɔndɔ w’osanga kele tshɔka le nde. Nde ayotokotɛ kɛnɛ kayokomɛ ɔna.”

4 Ko wadi aki Jɛrɔbɔama akasale kɛnɛ kakandawotɛ. Nde akonɛɛ, akatshu otsha la Shilo+ ko akatokoma lo luudu laki Ahidja. Washo wa Ahidja waki engole ndo nde kokokaka mɛna, nɛ dia nde aki osombe.

5 Koko Jehowa akatɛ Ahidja ate: “Wadi aki Jɛrɔbɔama ekɔ lo ndjaye dia ndjokombola lo dikambo dia ɔnande lele la hemɔ. Dimi layokotɛ kɛnɛ kahombayɛ mbotɛ.* Lam’ayondokoma, nde ayoshɛ lonto lande.”

6 Kam’akoke Ahidja nkindo yande lam’akandayɔtɔka la soko, nde akate ate: “Wadi aki Jɛrɔbɔama, ɔtɔ. Lande na kashɛyɛ lonto layɛ? Lakalongodi ɔkɛndɛ wa kotɛ losango la wolo. 7 Tshɔka tote Jɛrɔbɔama wate: ‘Jehowa Nzambi k’Isariyɛlɛ kata ate: “Dimi lakakodiya oma l’atei w’anto ayɛ dia ketɛ ɔnɔmbɔdi wa wodja ami Isariyɛlɛ.+ 8 Oma laasɔ, dimi lakahɔtɔla luudu la Davidɛ diolelo ko lakakoshadiɔ.+ Koko wɛ hongi oko okambi ami Davidɛ lakalame wadjango ami ndo lakandjele la otema ande tshɛ lo nsala paka kɛnɛ kaki ɔlɔlɔ lo washo ami.+ 9 Koko wɛ ambosala kɔlɔ oleki wanɛ tshɛ waki la ntondo kayɛ, wɛ amboyasalɛ jambizambi kina ndo dikishi dia mbolo dia mbokiyami nkɛlɛ+ ndo wɛ ambomboka ɔkɔngɔ.+ 10 Diakɔ diele, dimi layanga mbela mpokoso lo luudu la Jɛrɔbɔama ndo dimi layanga nshila* apami tshɛ* wa laka Jɛrɔbɔama oshiki, mbidja ndo wanɛ waha l’ekimanyielo ndo wele wɔdu lo Isariyɛlɛ; ndo dimi layɔmba luudu la Jɛrɔbɔama,+ oko watɔmbaka onto tumi polo ndo yɔ tshɛ yambomɔ! 11 Onto tshɛ lele oseka Jɛrɔbɔama layovɔ l’osomba ɔnɛ, mfɔ yayowɔlɛ; ndo onto tshɛ layovɔ l’oswe, tofudu ta l’olongo tayowɔlɛ, nɛ dia Jehowa ambodita.”’

12 “Ɔnkɔnɛ, emala kele tshɔka otsha lo luudu layɛ. Kam’ayoyodja ekolo l’osomba, ɔna ayovɔ. 13 Isariyɛlɛ w’otondo wayowolela ndo wayowokundɛ, nɛ dia lo nkumbo ka Jɛrɔbɔama k’otondo, nde oto kayokundɛma lo diombo dikambo l’atei w’ase luudu la Jɛrɔbɔama tshɛ, le nde oto kambotana Jehowa Nzambi k’Isariyɛlɛ dui dimɔtshi di’ɔlɔlɔ. 14 Jehowa ayoyatondjɛ nkumekanga k’Isariyɛlɛ kayoshila* ase luudu la Jɛrɔbɔama+ oshiki oma ko lushi lakɔ, ɛɛ, oma ko kakianɛ. 15 Jehowa ayɔkɔmɔla Isariyɛlɛ oko watosutshasutshaka ashi diyo, ndo nde ayokundola Isariyɛlɛ oma lo wodja wa dimɛna ɔnɛ wakandasha watshɛwɔ,+ ko nde ayowahandjola la wedi w’Ɔkɛdi,*+ nɛ dia vɔ wakokiya Jehowa nkɛlɛ lo ndjasalɛ dimɛta dia l’esongo.*+ 16 Nde ayɔsɛka Isariyɛlɛ l’ɔtɛ wa pɛkato yambosala Jɛrɔbɔama ndo yamondokonya Isariyɛlɛ dia nsala.”+

17 Ko wadi aki Jɛrɔbɔama akonɛɛ, akatshu ndo akatokoma la Tiriza. Kam’akandakome la soko dia luudu, ɔnakɔ akavu. 18 Ɔnkɔnɛ wakookundɛ, ko Isariyɛlɛ w’otondo wakoolele lo ndjela ɔtɛkɛta wa Jehowa wakandate lo tshimbo y’omvutshi Ahidja okambi ande.

19 Etenyi kekina k’ɔkɔndɔ wa Jɛrɔbɔama, woho wakandalɔsha ata+ ndo woho wakandolɛ, awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ. 20 Jɛrɔbɔama akolɛ l’edja k’ɛnɔnyi 22. L’ɔkɔngɔ wa laasɔ, nde aketama dia momuya kaamɛ la watshɛnde.+ Ko ɔnande Nadaba akayala nkumekanga lo dihole diande.+

21 L’etena kɛsɔ ko Rɛhɔbɔama ɔna Sɔlɔmɔna aya nkumekanga la Juda. Rɛhɔbɔama aki l’ɛnɔnyi 41 lam’akandayala nkumekanga ndo nde akolɛ l’edja k’ɛnɔnyi 17 la Jɛrusalɛma, osomba wakasɔnama+ oma le Jehowa l’atei wa waoho tshɛ w’Isariyɛlɛ oko dihole dia nkitsha lokombo lande.+ Nyango Rɛhɔbɔama lokombo lande Naama, ose Amɔna.+ 22 Ase Juda wakasalaka kɛnɛ kaki kɔlɔ lo washo wa Jehowa+ ndo l’ɔtɛ wa pɛkato yakawasale, vɔ wakawootsha nkɛlɛ oleki watshɛwɔ.+ 23 Vɔ la wɔ wakatetemala ndjahikɛ ahole wa la diko, dimɛta dia l’ave ndo dimɛta dia l’esongo*+ lo kionakona tshɛ y’otale+ ndo l’ɛse k’osongo tshɛ wele l’akatshi efula.+ 24 Ndo nto, numba y’apami ya lo tɛmpɛlɔ waki lo wodja.+ Vɔ wakasalaka akambo lo ndjela awui wa wɔnɔnyi tshɛ w’ase wedja wele Jehowa akawatshanya oma la ntondo k’ase Isariyɛlɛ.

25 L’ɔnɔnyi wa 5 w’ɛlɔmbwɛlɔ ka nkumekanga Rɛhɔbɔama, Shishakɛ+ nkumekanga k’Edjibito akaye dia ndjɔlɔsha Jɛrusalɛma.+ 26 Nde akɔshi diangɔ dia nɛmɔ dia lo luudu la Jehowa ndo diangɔ dia nɛmɔ dia lo luudu* la nkumekanga.+ Nde akɔshi diangɔ tshɛ, mbidja ndo dingawo tshɛ dia paonyi diakasale Sɔlɔmɔna.+ 27 Ko nkumekanga Rɛhɔbɔama akasale dingawo dia nkonga dia dihɛnya ko nde akadisha ewandji w’alami* wakalamaka soko dia luudu la nkumekanga. 28 Etena tshɛ kakayaka nkumekanga lo luudu la Jehowa, alami wakadiɛmbaka ndo oma laasɔ, vɔ wakadikaloyaka lo luudu l’alami.

29 Etenyi kekina k’ɔkɔndɔ wa Rɛhɔbɔama ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda?+ 30 Ta diakongaka tena tshɛ lam’asa Rɛhɔbɔama nde la Jɛrɔbɔama.+ 31 Oma laasɔ, Rɛhɔbɔama aketama dia momuya kaamɛ la watshɛnde, ko wakookundɛ lale watshɛnde l’Osomba wa Davidɛ.+ Nyango lokombo lande Naama, ose Amɔna.+ Ko ɔnande Abidjamɛ*+ akayala nkumekanga lo dihole diande.