2 Nkumi ya dikanga

17 L’ɔnɔnyi wa 12 w’ɛlɔmbwɛlɔ ka Ahaza nkumekanga ka Juda, Hɔshɛya+ ɔna Ela akayala nkumekanga k’Isariyɛlɛ oma la Samariya. Nde akolɛ l’edja k’ɛnɔnyi 9. 2 Nde akatetemala nsala kɛnɛ kaki kɔlɔ lo washo wa Jehowa, koko aha polo lo yɛdikɔ yakasale nkumi ya dikanga y’Isariyɛlɛ yaki la ntondo kande. 3 Shalamanɛsɛrɛ nkumekanga k’Asuriya akaye ndjɔɔlɔsha,+ ko Hɔshɛya akayala okambi ande ndo akatatɛ mfuta elambo le nde.+ 4 Koko nkumekanga k’Asuriya akoke dia Hɔshɛya aya l’atei w’anto wakawɔtwɛ sheke, nɛ dia nde akatomɛ So, nkumekanga k’Edjibito+ akɛndji ndo nde kombela elambo le nkumekanga k’Asuriya oko wakandasalaka ɛnɔnyi wa ntondo. Ɔnkɔnɛ, nkumekanga k’Asuriya akawodje lo shasa ndo akookeleka ko akawodje lo lokanu.

5 Nkumekanga k’Asuriya akɔtɔ lo wodja w’otondo ndo nde akakome la Samariya, ko akakidinge l’edja k’ɛnɔnyi 3. 6 L’ɔnɔnyi wa 9 w’ɛlɔmbwɛlɔ ka Hɔshɛya, nkumekanga k’Asuriya akɔshi Samariya.+ Oma laasɔ, nde akatɔlɛ ase Isariyɛlɛ lo lɔhɔmbɔ+ lo Asuriya ko akawadjashiya la Hala ndo la Habɔra, suke la ɔkɛdi wa Ngɔzana+ lo esomba w’ase Mediya.+

7 Dui sɔ diakasalema nɛ dia ase Isariyɛlɛ wakasalɛ Jehowa Nzambi kawɔ pɛkato, nde lakaatondja oma lo wodja w’Edjibito, oma l’ɛlɔmbwɛlɔ ka Farawɔ nkumekanga k’Edjibito.+ Vɔ wakatɛmɔla* tozambizambi tokina.+ 8 Vɔ wakayele mbekelo ya wedja wele Jehowa akawatshanya oma la ntondo k’ase Isariyɛlɛ ndo vɔ wakayele mbekelo yakashikikɛ nkumi ya dikanga y’Isariyɛlɛ.

9 Ase Isariyɛlɛ wakayasha lo akambo waki komonga amɛna le Jehowa Nzambi kawɔ. Vɔ wakatetemala mbika ahole wa la diko lo esomba awɔ tshɛ,+ oma lo tshoto y’etangelo polo l’osomba wele la mpele.* 10 Vɔ wakayaemɛka dimɛta dia l’ave ndo dimɛta dia l’esongo*+ lo kionakona tshɛ y’otale ndo l’ɛse k’osongo tshɛ wele l’akatshi efula,+ 11 ndo vɔ wakatshumbaka elambo lo ahole wa la diko tshɛ oko wakasalaka wedja wele Jehowa akawatshanya oma la ntondo kawɔ+ otsha lo lɔhɔmbɔ. Vɔ wakasalaka akambo wa kɔlɔ dia mbokiya Jehowa nkɛlɛ.

12 Vɔ wakatetemala kambɛ dikishi dia wɔnɔnyi*+ diele Jehowa akawatɛ ate: “Tanyosalake dikambo nɛ!”+ 13 Jehowa akatetemala mpɛmɔla Isariyɛlɛ la Juda lo tshimbo y’amvutshi ande tshɛ ndo y’ɔmɛnyi tshɛ wa waɛnɛlɔ+ ate: “Nyokadimɔ oma lo mboka yanyu ya kɔlɔ!+ Nyokitanyiya ɛlɛmbɛ ami la wadjango ami, lo ndjela ɛlɛmbɛ tshɛ wakamadjangɛ watshɛnyu ndo wakamanyosha lo tshimbo y’ekambi ami amvutshi.” 14 Koko vɔ komboka ndo wakatetemala monga ɛtɛ wolo oko* waki watshɛwɔ kɔmɛnya mbetawɔ kawɔ le Jehowa Nzambi kawɔ.+ 15 Vɔ wakatetemala ntona wadjango ande la sheke+ yande yakandadje la watshɛwɔ ndo waohwelo ande wakandawasha dia mbahɛmɔla,+ ndo vɔ wakatetemala ndjela dikishi di’anyanya+ ndo vɔamɛ wakayala anto w’anyanya,+ lo mbokoya wedja wakaadinge, wele Jehowa akawadjangɛ diaha mbaokoya.+

16 Vɔ wakatetemala mboka ɛlɛmbɛ tshɛ wa Jehowa Nzambi kawɔ ɔkɔngɔ ndo vɔ wakayasalɛ mpingu ya la mbolo ya tana 2 ta ngɔmbɛ+ ndo kimɛta ka l’osongo,*+ ndo vɔ wakakusamɛka alembe tshɛ wa l’olongo+ ndo wakakambɛ Baala.+ 17 Ndo nto, vɔ wakatshumbaka anawɔ w’apami ndo anawɔ wa wamato lo dja,+ wakasalaka diendja+ la alɔhɔ, ndo vɔ wakayakimɔ* dia nsala kɛnɛ kaki kɔlɔ lo washo wa Jehowa dia mbookiya nkɛlɛ.

18 Ko Jehowa akomalɛ Isariyɛlɛ nkɛlɛ k’efula; ɔnkɔnɛ nde akawanya oma lo washo ande.+ Nde kotshika kaanga onto 1, onyake dioho dia Juda to.

19 Kaanga ase Juda kokitanyiya wadjango wa Jehowa Nzambi kawɔ.+ Vɔ lawɔ wakakɛndakɛnda lo ndjela mbekelo yakayelaka ase Isariyɛlɛ.+ 20 Jehowa akoke tokanula tshɛ ta Isariyɛlɛ ɔkɔngɔ ndo nde akawasha nsɔnyi ndo akaakimɔ lo anya w’amumbi polo lam’akandawakasha oma la ntondo kande. 21 Nde akakakitola Isariyɛlɛ oma lo luudu la Davidɛ, ko vɔ waketɛ Jɛrɔbɔama ɔna Nebatɛ nkumekanga.+ Koko Jɛrɔbɔama akakonya Isariyɛlɛ dia vɔ ntshika ndjela Jehowa, ndo nde akaakonya dia vɔ nsala pɛkato ka woke. 22 Ko ase Isariyɛlɛ wakatetemala nkɛndakɛnda lo ndjela pɛkato tshɛ yakasale+ Jɛrɔbɔama. Vɔ kondjitshika 23 polo lam’akanya Jehowa Isariyɛlɛ oma lo washo ande, oko wakandate lo tshimbo y’ekambi ande amvutshi+ tshɛ. Ko ase Isariyɛlɛ wakanyɛma oma lo wodja awɔ ndo wakatɔlama lo lɔhɔmbɔ lo Asuriya,+ lɛnɛ akawatshikala polo ndo ɛlɔ.

24 Oma laasɔ, nkumekanga k’Asuriya akela anto oma la Babilɔna, oma la Kuta, oma la Ava, oma la Hamatɛ ndo oma la Sefaravayima,+ ko akayowadjashiya lo esomba wa la Samariya lo dihole di’ase Isariyɛlɛ. Vɔ wakɔshi Samariya ko wakadjasɛ lo esomba wa lɔkɔ. 25 Lam’akatatɛ anto wa ntondo mbidjasɛ lɔkɔ, vɔ kombokaka Jehowa wɔma.* Ko Jehowa akaatomɛ ntambwɛ+ ndo yɔ yakadiake anto amɔtshi. 26 Wakatotɛ nkumekanga k’Asuriya ɔnɛ: “Wedja wakayatonda mfumbe ndo wakayadjashiya lo esomba wa la Samariya haweye ɔtɛmwɛlɔ* wa Nzambi ka lo wodja akɔ. Ko nde ekɔ lo ntetemala mbatomɛ ntambwɛ yawadiaka, nɛ dia ndooko onto l’atei awɔ leya ɔtɛmwɛlɔ wa Nzambi ka lo wodja akɔ.”

27 Ko nkumekanga k’Asuriya akadjanga ate: “Nyokaloya ɔlɔmbɛdi ɔmɔtshi wakanyande mfumbe oma lɛkɔ kele atodjasɛ lɛkɔ dia nde mbaetsha ɔtɛmwɛlɔ wa Nzambi ka lo wodja akɔ.” 28 Ko ɔlɔmbɛdi ɔmɔtshi wakawande mfumbe oma la Samariya akakalola dia todjasɛ la Bɛtɛlɛ+ ndo nde akatatɛ mbaetsha woho wahombawɔ mboka Jehowa wɔma.*+

29 Koko wodja la wodja wakayasalɛ jambizambi* yawɔ yakawakitsha lo mvudu y’ɔtɛmwɛlɔ lo ahole wa la diko wakatasadi ase Samariya. Wodja la wodja wakasale ngasɔ lo esomba awɔ wakawadjasɛ. 30 Ko ase Babilɔna wakasale Sukɔta-Benɔtɛ, ase Kuta wakasale Nɛrɛngala, ase Hamatɛ+ wakasale Ashima, 31 ndo ase Ava wakasale Nibihazɛ la Tarataka. Ase Sefaravayima wakatshumbe anawɔ w’apami lo dja dikambo dia Adaramɛlɛkɛ ndo Anamɛlɛkɛ, tozambizambi ta la Sefaravayima.+ 32 Kaanga mbakawokaka Jehowa wɔma, vɔ wakɔshi anto k’anto, ko wakawaetɛ ɛlɔmbɛdi ndo ɛlɔmbɛdi akɔ wakaakambɛka lo mvudu y’ɔtɛmwɛlɔ ya l’ahole wa la diko.+ 33 Ɔnkɔnɛ, vɔ wakokaka Jehowa wɔma, koko wakatɛmɔlaka tozambizambi tawɔ lo ndjela ɔtɛmwɛlɔ* wa wedja w’oma lɛnɛ akawandama mfumbe.+

34 Polo ndo ɛlɔ, vɔ ndjelaka ɛtɛmwɛlɔ* awɔ wa ntondo. Ndooko onto l’atei awɔ latɛmɔla* Jehowa ndo ndooko onto layela wadjango ande, dombwelo diande, Ɛlɛmbɛ ndo didjango diakasha Jehowa ana wa Jakɔbɔ lele lokombo lande lakayonga Isariyɛlɛ.+ 35 Lam’akadje Jehowa sheke kaamɛ la wɔ,+ nde akawadjangɛ ate: “Tanyokake tozambizambi tokina wɔma ndo tanyotikusamɛke kana tikambɛ kana tilambola elambo.+ 36 Koko Jehowa lakanyotondja oma lo wodja w’Edjibito la wolo w’efula ndo la lonya losembwe tɔɔ+ kahombanyu mboka wɔma,+ Nde kahombanyu kusamɛ ndo nde kahombanyu nambola elambo. 37 Wadjango, dombwelo, Ɛlɛmbɛ ndo didjango diakandanyofundɛ,+ nyu pombaka mbayelaka nshi tshɛ nna lo nna ndo tanyokake tozambizambi tokina wɔma. 38 Tanyohɛke sheke yakamadje la nyu+ ndo tanyokake tozambizambi tokina wɔma. 39 Koko Jehowa Nzambi kanyu kahombanyu mboka wɔma, nɛ dia nde kayonyotshungola oma lo anya w’atunyi anyu tshɛ.”

40 Koko vɔ kokitanyiya ndo wakayasha l’ɔtɛmwɛlɔ*+ awɔ wa ntondo. 41 Ɔnkɔnɛ, wedja ɛsɔ wakayoka Jehowa wɔma,+ koko vɔ wakakambɛka ndo dikishi diawɔ hita. Polo ndo ɛlɔ, anawɔ la ekana awɔ wekɔ lo nsala paka oko wakasale watshɛwɔ.