Amɔsɛ
3 “Ase Isariyɛlɛ le, nyohokame ɔtɛkɛta ɔnɛ wambota Jehowa lo dikambo dianyu wendana la nkumbo k’otondo kakamatondja oma lo wodja w’Edjibito:
2 ‘Nyu ato mbakameye l’atei wa nkumbo tshɛ ya la nkɛtɛ.+
Diakɔ diele, dimi layokoya la nyu l’ɔtɛ wa munga+ yanyu tshɛ.
3 Onde anto 2 wayɔkɛndakɛnda kaamɛ aha la vɔ tookanyi dia mpomana?*
4 Onde ntambwɛ kayodikita lo okonda lam’ahatɔ la nyama ka minda?
Onde ɔsɔngɔ wa ntambwɛ* wayohangɔhangɔ oma lo edjaselo kawɔ aha la vɔ minda ndooko ɛngɔ?
5 Onde fudu kayotala la nkɛtɛ aha la djonga monga?
Onde djonga koka nsukasuka la nkɛtɛ aha la yɔ minda ndooko ɛngɔ?
6 Naka wɔɔndjɔ mbidama l’osomba, onde anto hawotosaka lokomba?
Naka mpokoso kamboya l’osomba, onde aha Jehowa kambosala dui sɔ?
7 Nɛ dia Nkum’Olongo Nkumadiɔndjɔ Jehowa hatosala dui dimɔtshi
Aha la tashodi dikambo diande dia sheke le ekambi ande amvutshi.+
8 Ntambwɛ kambodikita!+ Akɔna ahatoka wɔma?
Nkum’Olongo Nkumadiɔndjɔ Jehowa ambɔtɛkɛta! Akɔna ahatota prɔfɛsiya?’+
9 ‘Nyewoya dui sɔ lo totshoto ta Ashidɔdɛ todingami la mpele
Ndo lo totshoto ta lo wodja w’Edjibito todingami la mpele.
Nyote ɔnɛ: “Nyotshumane kaamɛ dia ndɔsha akona wa Samariya;+
Nyende lofunguso lele l’atei atɔ
Ndo lokeso lele l’etei katɔ.+
10 Nɛ dia vɔ haweye woho wa nsala kɛnɛ kosembwe,” mbata Jehowa,
“Wanɛ womba awui wa ngala ndo w’elanyelo lo totshoto tawɔ todingami la mpele.”’
11 Ɔnkɔnɛ, Nkum’Olongo Nkumadiɔndjɔ Jehowa kata ate:
‘Otunyi ɔmɔtshi ayodinga wodja,+
Nde ayoshidiya wolo ayɛ,
Ndo totshoto tayɛ todingami la mpele tayombama.’+
12 Jehowa kata ate:
‘Oko watɔhɔtɔlaka olami w’ɛkɔkɔ ekolo 2 kana ɛtshi ka toyi oma l’onyɔ wa ntambwɛ,
Ngasɔ mbayɔhɔtwama wodja w’Isariyɛlɛ,
Wanɛ wodjashi kakianɛ lo Samariya lo mbeto y’amɛna ndo lo nkɔsa y’etale y’amɛna.’*+
13 ‘Nyohokame ndo nyɔhɛmɔlɛ* luudu la Jakɔbɔ,’ mbata Nkum’Olongo Nkumadiɔndjɔ Jehowa, Nzambi kanga lolembelembe.
14 ‘Nɛ dia lushi layomokoya la Isariyɛlɛ l’ɔtɛ w’ɛtɔmbɔkwɛlɔ*+ ande tshɛ,
Dimi layokoya ndo la dilambwelo dia Bɛtɛlɛ;+
Nseke ya elambwelo yayohembɔma ko yayɔkɔ lo nkɛtɛ.+
15 Dimi layonyukola luudu la lo eleko k’ɔwɔ kaamɛ la luudu la lo eleko k’avula.’