Jɛrɛmiya

36 Lo ɔnɔnyi wa 4 w’ɛlɔmbwɛlɔ ka Jɛhɔyakima+ ɔna Jɔsiya, nkumekanga ka Juda, ɔtɛkɛta ɔnɛ w’oma le Jehowa wakaye le Jɛrɛmiya ɔnɛ: 2 “Ɔsa wɔɔmbɔ* ndo funda lɔkɔ awui tshɛ wakamakotɛ lo dikambo dia Isariyɛlɛ, Juda+ ndo wedja tshɛ,+ oma ko lushi la ntondo lakamatɛkɛta la yɛ lo nshi ya Jɔsiya polo ndo ɛlɔ.+ 3 Ondo etena kayoka ase luudu la Juda dikambo dia mpokoso tshɛ kasangoyami mbaela, vɔ koka nkadimɔ oma lo mboka yawɔ ya kɔlɔ, dia dimi dimanyiya munga kawɔ ndo pɛkato kawɔ.”+

4 Ko Jɛrɛmiya akelɛ Baruka+ ɔna Neriya ndo Jɛrɛmiya akawooke awui tshɛ wakawotɛ Jehowa, ko Baruka akaafunde lo wɔɔmbɔ.*+ 5 Oma laasɔ, Jɛrɛmiya akadjangɛ Baruka ate: “Dimi ndjihama ndo dimi bu la akoka wa mbɔtɔ lo luudu la Jehowa. 6 Ɔnkɔnɛ, wɛ kahomba mbɔtɔ lɔkɔ ndo mbadia oma lo wɔɔmbɔ la dui dia wolo ɛtɛkɛta wa Jehowa wakamakooke wakayafunde. Adiawɔ lo atoyi w’anto lo luudu la Jehowa lushi la ekilelo ka mbo ya ndɛ; ngasɔ kayoyadiyɛ ase Juda tshɛ waya oma lo esomba awɔ lɔkɔ. 7 Ondo Jehowa ayoka woho walɔmbawɔ kɛtshi, ndo vɔ wayokadimɔ onto l’onto oma lo mboka yande ya kɔlɔ, nɛ dia nkɛlɛ la odudu wakate Jehowa wekɔ efula otsha le anto anɛ.”

8 Ko Baruka ɔna Neriya akasale kɛnɛ tshɛ kakawodjangɛ omvutshi Jɛrɛmiya; nde akadia ɛtɛkɛta wa Jehowa la dui dia wolo oma lo wɔɔmbɔ* lo luudu la Jehowa.+

9 Lo ɔnɔnyi wa 5 w’ɛlɔmbwɛlɔ ka Jɛhɔyakima+ ɔna Jɔsiya, nkumekanga ka Juda, lo ngɔndɔ ka 9, ase Jɛrusalɛma tshɛ ndo anto tshɛ wakaye la Jɛrusalɛma oma lo esomba wa Juda wakewoya ekilelo ka mbo ya ndɛ la ntondo ka Jehowa.+ 10 Ko Baruka akadia ɛtɛkɛta wa Jɛrɛmiya w’oma lo wɔɔmbɔ* la dui dia wolo lo luudu la Jehowa, lo luudu la ndala* la Ngɛmariya+ ɔna Shafana+ osangodi,* lo sɛkɛ dia la diko, lo mbɔtwɛlɔ ka soko di’oyoyo dia luudu la Jehowa,+ lo atoyi w’anto tshɛ.

11 Etena kakoke Mikaya ɔna Ngɛmariya ɔna Shafana ɛtɛkɛta tshɛ wa Jehowa oma lo wɔɔmbɔ,* 12 nde akaholɔ lo luudu* la nkumekanga, lo luudu la ndala la sekeletɛlɛ. Ewandji* tshɛ wakadjasɛ lɔkɔ: Sekeletɛlɛ Elishama,+ Delaya ɔna Shemaya, Elɛnatana+ ɔna Akɛbɔrɛ,+ Ngɛmariya ɔna Shafana, Zɛdɛkiya ɔna Hananiya ndo ewandji ekina tshɛ. 13 Mikaya akawatɛ ɛtɛkɛta tshɛ wakandoke etena kakadia Baruka wɔɔmbɔ* lo atoyi w’anto.

14 Ko ewandji tshɛ wakatome Jehudi ɔna Netaniya ɔna Shelemiya ɔna Kushi otsha le Baruka ɔnɛ: “Yaka ndo ela wɔɔmbɔ wakayadia lo atoyi w’anto.” Baruka ɔna Neriya akɔshi wɔɔmbɔ lo lonya lande ko akatshu le wɔ. 15 Vɔ wakawotɛ vate: “Lam’alangayɛ, djasɛ kele otadiewɔ la dui dia wolo.” Ko Baruka akawadiɛwɔ.

16 Kam’akawoke ɛtɛkɛta akɔ tshɛ, vɔ wakendana la wɔma ko wakatɛ Baruka vate: “Sho pombaka mɛtɛ mbutɛ nkumekanga ɛtɛkɛta ɛsɔ tshɛ.” 17 Ndo vɔ wakambola Baruka ɔnɛ: “Lam’alangayɛ, otote woho wakayafunde ɛtɛkɛta ɛsɔ tshɛ. Onde nde kakakookakawɔ?” 18 Baruka akaakadimola ate: “Nde kakambokaka ɛtɛkɛta ɛsɔ tshɛ, ko dimi lakatawafundaka la ashi wa mukanda lo wɔɔmbɔ* ɔnɛ.” 19 Ewandji wakatɛ Baruka vate: “Tshɔka, toyashɛ wɛ la Jɛrɛmiya, ndo aha ndooko onto mbeya lɛnɛ enyu.”+

20 Oma laasɔ, vɔ wakɔtɔ le nkumekanga, lo sɛkɛ, ndo wakakitsha wɔɔmbɔ lo luudu la ndala la sekeletɛlɛ Elishama, ko vɔ wakatɛ nkumekanga awui tshɛ wakawoke.

21 Ko nkumekanga akatome Jehudi+ dia tɔsa wɔɔmbɔ ko nde akatowela oma lo luudu la ndala la sekeletɛlɛ Elishama. Jehudi akatatɛ mbaadia lo atoyi wa nkumekanga ndo w’ewandji tshɛ wakemala lale nkumekanga. 22 Nkumekanga akadjasɛ lo luudu la lo nshi ya tshitshi, lo ngɔndɔ ka 9,* ko dja yakahɛtaka lo babola la ntondo kande. 23 L’ɔkɔngɔ wa Jehudi mbadia wedi 3 kana 4, nkumekanga akahembola etenyi kakɔ la lokuwa la sekeletɛlɛ ko akakidje lo dja yakahɛtaka lo babola, polo ndo lam’akashile wɔɔmbɔ w’otondo lo dja yakahɛtaka lo babola. 24 Ndo vɔ komboka wɔma; oyadi nkumekanga kana ekambi ande tshɛ wakoke ɛtɛkɛta ɛsɔ tshɛ kombata ahɔndɔ awɔ. 25 Kaanga mbele Elɛnatana,+ Delaya+ ndo Ngɛmariya+ wakasɛngasɛnga nkumekanga diaha nde ntshumba wɔɔmbɔ, nde kombahokamɛ. 26 Laadiko dia laasɔ, nkumekanga akadjangɛ Jerahemɛlɛ ɔna nkumekanga, Seraya ɔna Aziriyɛlɛ ndo Shelemiya ɔna Abidɛlɛ dia minda sekeletɛlɛ Baruka ndo omvutshi Jɛrɛmiya, koko Jehowa akawashɛ.+

27 Ko ɔtɛkɛta wa Jehowa wakaye nto le Jɛrɛmiya l’ɔkɔngɔ wa nkumekanga ntshumba wɔɔmbɔ waki la ɛtɛkɛta wakafunde Baruka wakawookaka Jɛrɛmiya+ ɔnɛ: 28 “Ɔsa wɔɔmbɔ okina kele funda lɔkɔ ɛtɛkɛta akɔ waamɛ tshɛ waki lo wɔɔmbɔ wa ntondo, wɔnɛ wakatshumbe Jɛhɔyakima nkumekanga ka Juda.+ 29 Ndo wɛ pombaka mbutɛ Jɛhɔyakima nkumekanga ka Juda wate: ‘Jehowa kata ate: “Wɛ ambotshumba wɔɔmbɔ ɔnɛ ndo ambota wate: ‘Lande na kakayafunde lɔkɔ ɔnɛ: “Nkumekanga ka Babilɔna ayoya mɛtɛ, ayolanya wodja ɔnɛ ndo ayoshila anto la nyama ya lɔkɔ oshiki”?’+ 30 Ɔnkɔnɛ, Jehowa kata lo dikambo dia Jɛhɔyakima nkumekanga ka Juda ate: ‘Nde hatonga ndooko l’onto layodjasɛ lo kiti ka lowandji ka Davidɛ+ ndo wayokalɛ odo ande lo yanyi la yanyi ndo lo tshitshi l’otsho.+ 31 Dimi layokoya la nde, la tokanula* tande ndo la ekambi ande l’ɔtɛ wa munga kawɔ, ndo dimi layela le wɔ, le wanɛ wadjasɛ la Jɛrusalɛma ndo le ase Juda mpokoso tshɛ kakamate lo dikambo diawɔ,+ koko vɔ kompokamɛ.’”’”+

32 Ɔnkɔnɛ Jɛrɛmiya akɔshi wɔɔmbɔ okina, akawosha sekeletɛlɛ+ Baruka ɔna Neriya ko nde akafunde ɛtɛkɛta tshɛ wakatawokaka Jɛrɛmiya waki lo wɔɔmbɔ* wakatshumbe Jɛhɔyakima nkumekanga ka Juda lo dja.+ Ndo ɛtɛkɛta ekina efula wa woho akɔ wakakotshama.