Etsha

28 Lam’akatahandɔ oma lo waale ɔsɔ, wakatotɛ dia disɛnga diakɔ lokombo ladiɔ Malta.+ 2 Ase disɛnga diakɔ* wakatokimanyiya efula, wakatɛnya ɔlɔlɔ w’otema wa mamba.* Vɔ wakatɔhɛtshɛ dja, nɛ dia mvula kakalɔka ndo tshitshi kaki efula. 3 Koko, lam’akane Pɔɔlɔ ekanda ka nkunyi ndo lam’akandakidje lo dja, oloyi wa lɔlɛngɔ wakatombe lam’akawoke laladi la dja ko wakawolumata ndo wakakakatɛ lo lonya lande. 4 Lam’akɛnyi ase disɛnga diakɔ oloyi wa lɔlɛngɔ walɛndalɛnda lo lonya lande, vɔ wakatanɛ lam’asawɔ vate: “Onto ɔnɛ ekɔ mɛtɛ ondjakanyi ndo kaanga kambondohandɔ oma lo ndjale, Losembwe* hawotshiki dia nde ntetemala nsɛna.” 5 Ko nde akokɛ oloyi akɔ lo dja ndo nde komboka kandji. 6 Koko, anto wakalongamɛka dia lonya lande layoda kana nde ayɔkɔ la shashimoya ko mvɔ. L’ɔkɔngɔ wa vɔ mendɛ l’etena k’otale ndo wa vɔ mɛna dia ndooko dui dia kɔlɔ diambookomɛ, vɔ wakatshikitanya kanyi yawɔ ndo wakatatɛ mbuta dia nde ekɔ nzambi.

7 Ɔnɛnɛ ɔmɔtshi wa lo disɛnga sɔ, lokombo lande Pubiliyo aki la dikambɔ suke la laawɔ ndo nde akatolongola dimɛna ndo akatohangia dimɛna nshi 3. 8 Koko, she Pubiliyo aketama lo mbeto la demba dja ndo la lɔkɛdi la dikila, ko Pɔɔlɔ akatshu otsha le nde, akasale dɔmbɛlɔ, akawahɛ anya ndo akɔɔkɔnɔla.+ 9 L’ɔkɔngɔ wa nde nsala dikambo sɔ, anto akina tshɛ waki la hemɔ lo disɛnga wakatatɛ ndja le nde ndo wakakɔnɔka.+ 10 Vɔ wakatɔshi la nɛmɔ lo tosha weshasha efula ndo etena kakatɔtɔ lo masuwa, vɔ wakatosha kɛnɛ tshɛ kaki la so ohomba.

11 Ngɔndɔ 3 l’ɔkɔngɔ, takɔtɔ lo masuwa ɔmɔtshi w’oma la Alɛksandriya wakayetsha nshi ya tshitshi lo disɛnga diakɔ. Masuwa akɔ waki la efundelo la ntondo kawɔ ɔnɛ: “Ana w’apami wa Zeusɛ.” 12 Lam’akatakome lo dibongo dia Sirakusɛ, takatshikala nshi 3 laawɔ, 13 ndo oma lo dihole sɔ, takatshimbe ko takakome la Rɛngiyo. Lushi 1 l’ɔkɔngɔ, lɔpɛpɛ l’oma lo sidɛ lakapɛpɛ ko takakome la Putiyɔli lushi la 2. 14 Takatane anangɛso laawɔ ndo vɔ wakatɔlɔmbɛ dia sho ntshikala nshi 7 kaamɛ la wɔ. Oma laasɔ, takete otsha la Rɔmɔ. 15 Lam’akiso lo dihole sɔ, anangɛso wa la Rɔmɔ wakoke lokumu laso ko wakaye ndjotolongola. Vɔ wakayohomana la so lo lobingu la l’Apiyo ndo lo Tavɛrnɛ Shato. Lam’akawaɛnyi Pɔɔlɔ, nde akasha Nzambi losaka ndo akakeketala.+ 16 Lam’akatayokomaka la Rɔmɔ, wakasha Pɔɔlɔ lotshungɔ la nde mbidjasɛ nde la ɔsɔlayi wakoolamaka lo luudu lakandafutɛka.

17 Koko l’ɔkɔngɔ wa nshi 3, nde akelɛ ɛnɛnɛ w’ase Juda. Lam’akawasangana, nde akawatɛ ate: “Analengo, kaanga mbakimi kosalɛ anto kɔlɔ kana mɔnyɔla mbekelo ya watshɛso,+ dimi lakakimɔma oko ose lokanu oma la Jɛrusalɛma lo anya w’ase Rɔmɔ.+ 18 Ndo l’ɔkɔngɔ wa vɔ nsɛdingola dikambo diami,+ vɔ wakalange tshungolami, nɛ dia vɔ kotana ndooko ɔkɔkɔ wa ndjakami.+ 19 Koko lam’ele ase Juda wakatone, dimi lakɛnyi ohomba nɔmba dia Kayisa menda dikambo diami,+ koko aha ɔnɛ dimi laki la dikambo dimɔtshi dia mfunda wodja aso. 20 Diakɔ diakamalɔmbɛ dia nyɛna ndo ntɛkɛta la nyu nɛ dia l’ɔtɛ w’elongamelo ka Isariyɛlɛ mbemi la mɔlɔla ɔnɛ.”+ 21 Vɔ wakawotɛ vate: “Sho konongola ndooko mukanda wendana la yɛ oma la Judeya ndo ndooko ɔnangɛso lakaye oma lɛkɔ lakela losango kana lakatɛkɛta dikambo dimɔtshi dia kɔlɔ diendana la yɛ. 22 Koko, tambɛna ɔlɔlɔ kohokamɛ dia mbeya kanyi yayɛ lo dikambo sɔ, nɛ dia lo mɛtɛ, lo kɛnɛ kendana la yaato y’ɔtɛmwɛlɔ nyɛ,+ sho mbeyaka dia l’ahole tshɛ+ anto wekɔ lo ntɛkɛta kɔlɔ lo dikambo diayɔ.”

23 Ko vɔ wakokana lushi la ndjohomana la nde, ndo lushi lakɔ, vɔ wakaye efula ka mamba lo dihole diakandadjasɛka. Ndo oma ko pindju polo dikɔlɔ, nde akaalembetshiya dikambo diakɔ lo nsambisha dimɛna dimɛna akambo wendana la Diolelo dia Nzambi dia mbaetawoya awui wendana la Yeso,+ wele lo Ɛlɛmbɛ wa Mɔsɛ+ ndo lo Amvutshi.+ 24 Anto amɔtshi wakatatɛ mbetawɔ akambo wakandataka, koko akina kombetawɔ. 25 Ɔnkɔnɛ, lam’ele vɔ kombokana lam’asawɔ, vɔ wakatatɛ ntshɔ. Ko Pɔɔlɔ akate ate:

“Diakɔ diakatɛ nyuma k’ekila watshɛnyu lo tshimbo y’omvutshi Isaya 26 ate: ‘Tshɔka otsha le anto anɛ ndo towate wate: “Nyu mɛtɛ nyayohokamɛ, koko hanyotoshihodia, ndo nyu mɛtɛ nyayenda koko hanyotɛna.+ 27 Nɛ dia etema w’anto anɛ waya lonyu ndo atoyi awɔ pokamɛka, koko hawokitanyiya, ndo vɔ wambodiha washo awɔ diaha vɔ mɛna la washo awɔ ndo mboka la atoyi awɔ ndo nshihodia la etema awɔ, ko vɔ ndjokadimɔ dia dimi mbakɔnɔla.”’+ 28 Ɔnkɔnɛ, nyeye dia panda k’oma le Nzambi kakatomama le ase wedja,+ ndo aha la taamu vɔ wayokihokamɛ.”+ 29* ——

30 Ko nde akatshikala ɛnɔnyi 2 w’etondo lo luudu lande hita lakandafutɛka+ ndo nde akalongolaka dimɛna wanɛ tshɛ wakayaka le nde, 31 awasambisha Diolelo dia Nzambi ndo etsha akambo wendana la Nkumadiɔndjɔ Yeso Kristo hwe hwe*+ ndo aha l’onto mboshimba.