Isaya
42 “Eenda, okambi ami+ wasukɛmi!
2 Nde hatoda ekoko ndo hatodiya dui diande,
Ndo nde hatokiya dui diande lo ɛsɛsɛ.+
3 Nde hatohembola sɔpɔ diakawaminola,
Ndo nde hatodima oshinga wa tala wotadimala.+
La kɔlamelo nde ayela losembwe.+
4 Nde hatɔlɛmba kana tɛtshatɛtshama polo etena kayondoshikikɛ losembwe la nkɛtɛ;+
Ndo asɛnga tetemalaka kongɛɛ ɛlɛmbɛ* ande.
5 Jehowa Nzambi ka mɛtɛ,
Otungi w’olongo ndo Ɔnɛ lele woke, Ɔnɛ lawasembola,+
Ɔnɛ lakadianganya nkɛtɛ ndo kɛnɛ tshɛ katondjayɔ,+
Ɔnɛ lasha anto wa lɔkɔ loowe+
Ndo wanɛ wakɛndakɛnda lɔkɔ lomu kata ate:+
6 “Dimi Jehowa lakakelɛ lo losembwe;
Dimi lakakimɛ lonya layɛ.
Dimi layokokokɛ ndo layokokimɔ oko sheke le anto+
Ndo oko osase wa wedja,+
7 Dia wɛ ndjihola totshungu washo,+
Dia ntondja ase lokanu oma lo lokanu
Ndo wanɛ wodjashi lo wodjima oma lo lokanu.+
8 Dimi kele Jehowa. Ɔsɔ kele lokombo lami;
Dimi halasha ndooko onto lotombo lami,*
Kana mbisha lotombo lami le dikishi.+
9 Eenda, akambo wa ntondo wambeta;
Kakianɛ dimi lota akambo w’eyoyo.
La ntondo ka vɔ ntatɛ mɛnama, dimi lambonyotɛwɔ.”+
10 Nyembee Jehowa osambo w’oyoyo,+
Lotombo lande oma lo tokoma ta nkɛtɛ,+
Nyu wanɛ waholɔ otsha lo ndjale ndo kɛnɛ tshɛ koludi lɔkɔ,
Nyu asɛnga ndo wanɛ wadjasɛ lɔkɔ.+
Wanɛ wadjasɛ lo dive wade ekoko w’ɔngɛnɔngɛnɔ;
Wade ekoko oma lo tɔsɔdi t’akona.
12 Washa Jehowa lotombo
Ndo wewoya lotombo lande lo asɛnga.+
13 Jehowa ayotomba oko pami ka wolo.+
Nde ayemula ohetoheto ande oko ɔndɔshi wa ta.+
Nde ayoda kioko, ɛɛ, nde ayoda kioko ya ta;
Nde ayɛnya dia nde ndeka atunyi ande wolo.+
14 “Dimi lakɔlama lo etena k’otale.
Dimi lakatshikala ki ndo lakayakimɛ.
Oko womoto latata lɔɔnɔ,
Dimi layokuma akumu, layokitshakitsha lomu ndo layosekuma mbala kakɔ ɔtɔi.
15 Dimi layohandjola akona ndo tokonakona
Ndo layoonya tombatomba diawɔ tshɛ.
Dimi layokadimola ɛkɛdi w’ashi asɛnga
Ndo layoonya afuku w’ashi wele la asɔpɔ.+
16 Dimi layɔlɔmbɔla akanga wa totshungu lo mboka kahaweye+
Ndo layosala dia vɔ mbeta lo mboka yahawatetaka.+
Kɛsɔ mbayomowasalɛ ndo dimi hantowaoka ɔkɔngɔ.”
17 Vɔ wayokadimɔ ɛkɔngɔkɔngɔ ndo wayoshama nsɔnyi tshɛ lo tshɛ,
Wanɛ wayaɛkɛ le dikishi,
Wanɛ watɛ dikishi dia la mbolo ɔnɛ: “Nyu mbele nzambi yaso.”+
18 Nyohokame, nyu akanga wa mpoke;
Nyende ndo nyɛnyi, nyu akanga wa totshungu.+
19 Akɔna ele tshungu naka aha okambi ami,
Ehoke k’efula oko ɔkɛndji wamomotoma?
Akɔna ele tshungu y’efula oko ɔnɛ lambofutama,
Tshungu y’efula oko okambi wa Jehowa?+
20 Wɛ ekɔ lo mɛna diangɔ efula, koko wɛ hasungukala.
Wɛ ekɔ lo ndjihola atoyi ayɛ, koko wɛ hahokamɛ.+
21 L’ɔtɛ wa losembwe lande,
Jehowa ambɔngɛnangɛna mbetɛ ɛlɛmbɛ* weke ndo diambo.
22 Koko wanɛ wekɔ anto wakawambe ndo wakawɔshi diangɔ diawɔ;+
Vɔ tshɛ wambondama lo tolonga ndo wamboshɛma lo nkanu.+
Vɔ wambomba diangɔ diawɔ aha la onto lawatsha,+
Ndo wambɔsa diangɔ diawɔ ko ndooko onto lata ɔnɛ: “Nyodikaloya!”
23 Akɔna l’atei anyu ayoka dui nɛ?
Akɔna ayodja yimba ndo mpokamɛ etena kayaye?
24 Akɔna akakimɔ Jakɔbɔ dikambo dia dimbo
Ndo Isariyɛlɛ le amumbi?
Shi Jehowa, Ɔnɛ lakandasalɛ pɛkato?
25 Diakɔ diakandatetemala mbatshulwɛ odudu ande,
Nkɛlɛ kande, yɛnyi ya ta.+
Tɔ kakatshumbe ɛngɔ tshɛ kele suke lande, koko nde kombidja yimba.+
Tɔ kakɔhɛtɛ, koko nde kombidja dikambo sɔ l’otema.+