Ɛnyɛlɔ
4 L’ɔkɔngɔ wa laasɔ, nyolonge, dimi lakɛnyi lokuke lambodihɔ l’olongo ndo dui dia ntondo diakamoke diaki oko dimama ndo diɔ diakambutɛ ɔnɛ: “Yaka lendo kele ndjokɛnya akambo wahomba salema.” 2 Oma laasɔ, mbala kakɔ ɔtɔi lakayala lo wolo wa nyuma ndo nyolonge, kiti kɛmɔtshi ka lowandji kaki lo dihole diatɔ l’olongo ndo onto ɔmɔtshi akadjasɛ lo kiti kakɔ.+ 3 Ɔnɛ lakadjasɛ lɔkɔ aki la ɛnamelo kele oko lɔwɔkɔ la jaspɛ+ ndo oko lɔwɔkɔ la sardɔyinɛ* ndo ngolo kele oko emɛrɔdɛ* kakadinge kiti kakɔ ka lowandji.+
4 Kiti nkina ya lowandji 24 yakadinge kiti kakɔ ka lowandji ko dimi lakɛnyi dikumanyi+ 24 diakalɔtɛ ahɔndɔ wa wɛma ndo alɛmbɔ wa nkoso wa paonyi l’ɛtɛ awɔ wodjashi lo kiti yakɔ ya lowandji. 5 Angadimu+ la ɛtɛkɛta la akungola+ wakatombaka oma lo kiti kakɔ ka lowandji ndo atala 7 wa dja wakahɛtaka la ntondo ka kiti ka lowandji ndo atala asɔ wekɔ didjidji dia nyuma 7 yaki Nzambi.+ 6 Ɛngɔ kɛmɔtshi kafɔna la oduwa+ wa talatala, oko kristalɛ* kaki la ntondo ka kiti kakɔ ka lowandji.
Ditongami 4 diasɛna+ diaki la washo tɔɔ la ntondo ndo l’ɔkɔngɔ diaki l’atei ndo diakadinge kiti kakɔ ka lowandji.* 7 Etongami kasɛna ka ntondo kaki oko ntambwɛ,+ etongami kasɛna ka 2 kaki oko ɔsɔngɔ wa ngɔmbɛ,+ etongami kasɛna+ ka 3 kaki l’elungi kele oko elungi k’onto ndo etongami kasɛna+ ka 4 kaki oko mpongo katafumbɔ.+ 8 Lo kɛnɛ kendana la ditongami 4 diasɛna, etongami l’etongami kaki l’ahafu 6 ndo vɔ waki la washo tɔɔ l’emamu awɔ ndo l’ɛse kawɔ.+ Otsho la yanyi aha la momuya, ditongami sɔ mbutaka ɔnɛ: “Ekila, ekila, ekila ele Jehowa*+ Nzambi, Kanga-Wolo-Tshɛ, Ɔnɛ lakikɔ, lekɔ ndo layaye.”+
9 Etena tshɛ kasha ditongami diasɛna sɔ lotombo, kɛnɛmɔ ndo losaka le Ɔnɛ lodjashi lo kiti ka lowandji, Ɔnɛ lasɛna pondjo pondjo,+ 10 dikumanyi+ 24 kusamaka la ntondo ka Ɔnɛ lodjashi lo kiti ka lowandji ndo vɔ tɛmɔlaka Ɔnɛ lasɛna pondjo pondjo ndo vɔ kitshaka alɛmbɔ awɔ wa nkoso la ntondo ka kiti ka lowandji, wata vate: 11 “Wɛ Jehowa* Nzambi kaso, wɛ kasungana nongola lotombo,+ kɛnɛmɔ+ ndo wolo,+ nɛ dia wɛ kakatonge diangɔ tshɛ,+ ndo oma lo lolango layɛ mbakadionge ndo mbakadiatongama.”