Ɛnyɛlɔ
11 Ko wakambisha lɔsɔlɔ lele oko danga*+ ndo wakambutɛ ɔnɛ: “Emala kele ɛdika tɛmpɛlɔ k’ekila dia tɛmpɛlɔ ka Nzambi la elambwelo ndo wanɛ watɛmɔla lɔkɔ. 2 Koko lo kɛnɛ kendana la sɛkɛ dia l’andja wa tɛmpɛlɔ, tshikadiɔ ndo todiɛdikake, nɛ dia wakadisha ase wedja ndo vɔ wayɔhɔtshahɔtsha osomba w’ekila+ l’edja ka ngɔndɔ 42.+ 3 Dimi layotoma ɛmɛnyi ami 2 dia vɔ nsambisha l’edja ka nshi kinunu la nkama hiende l’akumi asamalo (1 260) wɔlɔtshi akoto.” 4 Esongo 2 w’ɔlivɛ+ la dikundji 2 di’atala+ mbele didjidji diawɔ ndo vɔ memala la ntondo k’Owandji wa nkɛtɛ.+
5 Naka onto ɔmɔtshi ayolanga mbasalɛ kɔlɔ, dja yayotomba oma l’enyɔ awɔ, ko yayotshumba atunyi awɔ. Naka onto ɔmɔtshi ayolanga mbasalɛ kɔlɔ, ngasɔ mbahombande ndjakema. 6 Vɔ wekɔ la wolo wa ndjiha wange*+ diaha mvula ndɔ+ lo nshi yatawɔ prɔfɛsiya ndo wekɔ la wolo wa nkadimola ashi dikila+ ndo wa mbela weho tshɛ wa mpokoso la nkɛtɛ mbala tshɛ yalangawɔ.
7 Lam’ayowoshidiya nsambisha, nyama ka ngala kayatombe oma lo difuku diaha l’ekomelo kayowalɔsha, kayowalɛndja ndo kayowadiaka.+ 8 Edo awɔ wayokalema lo shinga ya woke ya l’osomba wa woke welamɛ lo yoho ya lo nyuma ɔnɛ Sɔdɔma la Edjibito lɛnɛ akadiakema ndo Nkumɛwɔ l’otamba. 9 Ndo weho w’anto tshɛ ndo waoho tshɛ ndo ɛtɛkɛta tshɛ ndo wedja tshɛ wayotanganɛka edo awɔ l’edja ka nshi shato l’etenyi,+ ndo hawotetawɔ dia edo awɔ kundɛma lo diombo. 10 Wanɛ wodjashi la nkɛtɛ wayɔngɛnangɛna lo dikambo diawɔ ndo wayosala fɛtɛ ndo wayotomanɛ weshasha lam’asawɔ, nɛ dia losango laki amvutshi 2 asɔ lakasoyaka wanɛ wodjashi la nkɛtɛ.
11 L’ɔkɔngɔ wa nshi shato l’etenyi, nyuma ka lɔsɛnɔ k’oma le Nzambi kakɔtɔ le wɔ,+ ko vɔ wakemala l’ekolo awɔ ndo wanɛ wakaatanganɛka wakandama la wɔma wa mamba. 12 Ko vɔ wakoke dui dia wolo oma l’olongo diawatɛ ɔnɛ: “Nyodee lendo.” Ko vɔ wakadɛ otsha l’olongo lo dinge ndo atunyi awɔ wakawaɛnyi.* 13 Ko didimu dia nkɛtɛ dia mamba diakasalema wonya akɔ ndo etenyi ɔtɔi ka dikumi k’osomba kakakɔ ndo anto nunu esambele (7 000) wakadiakema la didimu dia nkɛtɛ, ko anto wakatshikala wakoke wɔma ndo wakatombola Nzambi ka l’olongo.
14 Mananu+ ka 2 kambeta. Hokamɛ! Mananu ka 3 kekɔ lo ndjaye esadi.
15 Ondjelo wa 7 akade dimama+ diande. Ko awui wa wolo wakokɛma l’olongo, wata vate: “Diolelo dia l’andja ɔnɛ diaya Diolelo dia Nkumɛso+ ndo dia Kristo+ kande ndo nde ayongaka nkumekanga pondjo pondjo.”+
16 Ko dikumanyi+ 24 diakadjasɛ lo kiti yawɔ ya lowandji la ntondo ka Nzambi wakakusama ndo wakatɛmɔla Nzambi, 17 wata vate: “Jehowa* Nzambi Kanga-Wolo-Tshɛ, ɔnɛ lekɔ+ ndo lakikɔ, tambokosha losaka, nɛ dia wɛ ambɔsa lowandji layɛ la woke ndo ambotatɛ mbolɛ oko nkumekanga.+ 18 Ko wedja wakomala, ko nkɛlɛ kayɛ kakaye ndo etena kakashikikɛma kakakoke ka nombosha wanɛ wakavu ndo ka mfuta+ ekambi ayɛ amvutshi,+ kaamɛ ndo ekilami ndo wanɛ watokaka lokombo layɛ wɔma, anto wa totshitshɛ ndo wa weke ndo dia ndanya wanɛ walanya* nkɛtɛ.”+
19 Ko dihole di’ekila dia tɛmpɛlɔ ka Nzambi ka l’olongo diakadihɔ, ko ɔshɛtɛ wa sheke yande wakɛnama lo dihole di’ekila dia lo tɛmpɛlɔ kande.+ Ko angadimu wa ndjadi la ɛtɛkɛta la akungola la didimu dia nkɛtɛ wakayala ndo mvula ka mbɔkɔ kakalɔ.