Etsha

17 Vɔ wakete oma l’Afipɔli ndo la Apoloniya, ko wakakome la Tɛsalɔnika+ lɛnɛ aki shinangɔnga y’ase Juda. 2 Oko waki mbekelo ka Pɔɔlɔ,+ nde akɔtɔ dia tetsha ndo lo nshi ya sabato 3, nde akakanaka la wɔ yimba oma lo Afundelo,+ 3 awalembetshiya ndo awaɛnya lo nkamba l’Afundelo dia aki dimɛna Kristo nsowa+ ndo mbolɔ oma lo nyɔi,+ ata ate: “Yeso lanyewoyami kele Kristo.” 4 Ɔnkɔnɛ, amɔtshi l’atei awɔ wakakome ambetawudi, wakasangana la Pɔɔlɔ la Silasɛ+ ndo leemba la woke l’ase Ngirika wakatɛmɔlaka Nzambi kaamɛ ndo wamato efula wa lokumu wakakome ambetawudi.

5 Koko ase Juda wakawaoke kandjema,+ wakasanganya akanga wa kɔlɔ amɔtshi wa lo lobingu waki komonga la elimu wa nkamba, ko wakakenge olui a woke w’anto ndo wakatatɛ mbidja lofunge l’osomba. Vɔ wakɔtɔ la wolo lo luudu laki Jasɔna ko wakayange dia ntondja Pɔɔlɔ la Silasɛ oya le olui w’anto. 6 Lam’akiwɔ kombatana, vɔ wakande Jasɔna kaamɛ la anangɛso amɔtshi ko wakatshu la wɔ le ewandji w’osomba watate la dui dia wolo vate: “Anto wambofukutanya* nkɛtɛ k’otondo anɛ wamboya polo ndo lendo,+ 7 ko Jasɔna akaalongola dimɛna oko angɛndangɛnda ande. Anto asɔ tshɛ wekɔ lo ndɔshana l’ɛlɛmbɛ wa Kayisa, wata dia Yeso+ ekɔ nkumekanga kekina.” 8 Lam’akawoke akambo asɔ, olui w’anto ndo ewandji w’osomba wakoke wɔma, 9 ndo l’ɔkɔngɔ wa Jasɔna l’anto akina mfuta kibawo,* vɔ wakaakimɔ.

10 Aha la ntshimbatshimba, anangɛso wakatome Pɔɔlɔ la Silasɛ l’otsho otsha la Bɛrɔya. Lam’akawakome lɛkɔ, vɔ wakatshu lo shinangɔnga y’ase Juda. 11 Ase Bɛrɔya waki la nsaki ka mbeka oleki ase Tɛsalɔnika, nɛ dia vɔ waketawɔ ɔtɛkɛta wa Nzambi la nsaki k’efula ndo wakasɛdingolaka Afundelo la yambalo tshɛ lushi la lushi dia menda kana akambo akɔ waki mɛtɛ. 12 Ɔnkɔnɛ, efula l’atei awɔ kaamɛ ndo apami la wamato efula wa lokumu w’ase Ngirika wakakome ambetawudi. 13 Koko lam’akoke ase Juda w’oma la Tɛsalɔnika dia Pɔɔlɔ aki lo nsambisha ɔtɛkɛta wa Nzambi ndo la Bɛrɔya, vɔ wakaye lɛkɔ dia ndjofukutanya ndo ndjɔtɔmbɔsha elui w’anto.+ 14 Ɔnkɔnɛ, aha la ntshimbatshimba, anangɛso wakatɛ Pɔɔlɔ dia nde mpolɔ otsha lo ndjale,+ koko Silasɛ la Timɔte wakatshikala lɛkɔ. 15 Wanɛ wakatatshindɛka Pɔɔlɔ wakatshu la nde polo l’Atɛna ndo l’ɔkɔngɔ wa vɔ mbatɛ dia Silasɛ la Timɔte+ ndja le Pɔɔlɔ aha la ntshimbatshimba, vɔ wakakalola.

16 Lam’akaakongɛka Pɔɔlɔ l’Atɛna, nde akomala lo woho wakandɛnyi osomba ndola la dikishi. 17 Ko nde akatatɛ nkana yimba l’ase Juda lo shinangɔnga ndo l’anto akina wakatɛmɔlaka Nzambi ndo lushi tshɛ nde akakanaka yimba l’anto wakatanemaka lo lobingu. 18 Koko ambeyi amɔtshi wa filozofi, oyadi w’aseka Epikura kana w’aseka Stɔa wakatatɛ mbidjana la nde taamu, ndo amɔtshi wakataka vate: “Ɔtshɔbɔdi ɔnɛ alangande totɛ?” Akina vate: “Ekɔ oko nde ekɔ osambisha wa tozambizambi t’angɛndangɛnda.” Nɛ dia nde akewoyaka lokumu l’ɔlɔlɔ lendana la Yeso ndo la eolwelo.+ 19 Ɔnkɔnɛ, vɔ wakawonde ndo wakatshu la nde la Areopango, wata vate: “Onde sho kokaka mbeya wetshelo w’oyoyo ɔsɔ watayɛ? 20 Nɛ dia wɛ ekɔ lo mbetsha akambo wahateye. Ndo sho nangaka mbeya kitshimudi y’akambo asɔ.” 21 Lo mɛtɛ, ase Atɛna tshɛ ndo angɛndangɛnda wakadjasɛka* lɛkɔ waketshaka wenya awɔ paka lo mbuta kana mpokamɛ dui dimɔtshi di’oyoyo. 22 Ko Pɔɔlɔ akemala l’atei wa Areopango+ ndo akate ate:

“Nyu ase Atɛna, dimi lambɛna dia lo akambo tshɛ, mɛnamaka dia nyu ndeka anto akina+ mboka tozambizambi wɔma.* 23 Ɛnyɛlɔ, lam’akamatetaka ndo lam’akamatasɛdingolaka diangɔ dialɛmiyanyu,* dimi lakɛnyi elambwelo kofundami ɔnɛ: ‘Le Nzambi kaheyama.’ Ɔnkɔnɛ, dikambo dia ɔnɛ latɛmɔlanyu aha la mbeya ɔsɔ kanyosambishami. 24 Nzambi kakatonge andja la diangɔ tshɛ diele lɔkɔ, nde ekɔ woho wende, Nkumadiɔndjɔ k’olongo la nkɛtɛ.+ Nde hadjasɛ lo tɛmpɛlɔ yakakama l’anya,+ 25 ndo nde hendɛ l’anya w’anto, oko onto lele l’ohomba w’ɛngɔ kɛmɔtshi,+ nɛ dia ndamɛ kasha anto tshɛ lɔsɛnɔ, lomu+ ndo diangɔ tshɛ. 26 Ndo oma le onto ɔtɔi+ mbakandatonge anto wa lo wedja tshɛ dia vɔ mbidjasɛ lo nkɛtɛ+ k’otondo ndo nde akashikikɛ tena ndo elelo wendana la ahole wahomba anto mbidjasɛ,+ 27 dia vɔ nyanga Nzambi, watamamba dia mbotana,+ kaanga mbele lo mɛtɛ nde bu etale oma le ɔmɔmɔ la l’atei aso. 28 Nɛ dia oma le nde mbeso la lɔsɛnɔ, mbakɛndakɛndaso ndo mbeso lo andja ɔnɛ, oko wakate pɔɛtɛ yanyu mɔtshi ɔnɛ: ‘Nɛ dia ndo sho mbele anande.’*

29 “Ɔnkɔnɛ, lam’ele tekɔ ana* wa Nzambi,+ sho hatohombe mfɔnya dia Nzambi ekɔ oko paonyi, mfɛsa, kana dive kana oko ɛngɔ kɛmɔtshi kakasalema la diewo ndo la yimba y’anto.+ 30 Lo mɛtɛ, Nzambi akadihe washo lo tena diaki anto kombeyaka,+ koko kakianɛ nde ekɔ lo mbewoya anto tshɛ l’ahole tshɛ dia vɔ ndjatshumoya, 31 nɛ dia nde akashikikɛ lushi layondolombosha+ nkɛtɛ k’otondo la losembwe lo tshimbo y’onto lakandasɔnɛ, ndo anto tshɛ kokaka monga l’eshikikelo dia kilombo kɛsɔ kayosalema, lo mboolola oma lo nyɔi.”+

32 Lam’akawoke dikambo dia eolwelo k’oma lo nyɔi, amɔtshi wakatatɛ mbɔla,+ koko akina wakate vate: “Tayokohokamɛ lo dikambo sɔ mbala kekina.” 33 Ko Pɔɔlɔ akamɔ oma lalewɔ, 34 koko anto amɔtshi wakete lo wedi ande wakakome ambetawudi. L’atei awɔ mbaki ndo Diyɔnisiyo, ɔnɛ laki shushi ya lo tominadi ta la Areopango la womoto ɔmɔtshi, lokombo lande Damari ndo anto akina.