Ɛzɛkiyɛlɛ

34 Ɔtɛkɛta wa Jehowa wakaye le mi nto ɔnɛ: 2 “Ɔna onto, ta prɔfɛsiya lo dikambo dia alami w’ɛkɔkɔ wa lo Isariyɛlɛ. Ta prɔfɛsiya ndo tɛ alami w’ɛkɔkɔ wate: ‘Nkum’Olongo Nkumadiɔndjɔ Jehowa kata ate: “Mananu le alami w’ɛkɔkɔ wa lo Isariyɛlɛ+ wayalesha vɔamɛ! Onde aha ɛkɔkɔ mbahomba alami w’ɛkɔkɔ ndesha?+ 3 Nyu ndɛka wata, nyu ndjalɔtshaka la wɛɔsa wa nyama ndo nyu ndjakaka nyama yoleki wata,+ koko nyu hanyolesha leemba la ɛkɔkɔ.+ 4 Nyu kokeketsha wɔnɛ wakalɛmbɛ, nyu kɔkɔnɔya wɔnɛ waki la hemɔ, nyu kɔmɔmba mpota ya wɔnɛ wakahomɔ, nyu kokaloya wɔnɛ wakanganɛ ndo nyu konyanga wɔnɛ wakashishɔ;+ koko nyu nyakawaolɛ la ngala ndo la hiadi.+ 5 Ko vɔ wakahandjɔ, nɛ dia vɔ komonga ndooko la olami;+ vɔ wakahandjɔ ndo wakayala mbo ya ndɛ ya nyama tshɛ ya mpango ya l’okonda. 6 Ɛkɔkɔ ami wakekekɔka lo akona tshɛ ndo lo tokonakona tshɛ t’etale; ɛkɔkɔ ami wakahandjɔnɛ laadiko dia nkɛtɛ k’otondo, ko ndooko onto lakaayange kana lakayange dia mbatana.

7 “‘“Ɔnkɔnɛ nyu alami w’ɛkɔkɔ, nyohokame ɔtɛkɛta wa Jehowa: 8 ‘“Lo mɛtɛ oko wemi la lɔsɛnɔ,” mbata Nkum’Olongo Nkumadiɔndjɔ Jehowa, “lam’ele ɛkɔkɔ ami waya nyama yandawɔ, mbo ya ndɛ le nyama ya mpango tshɛ ya l’okonda, nɛ dia vɔ komonga la olami ndo alami anyu w’ɛkɔkɔ konyanga ɛkɔkɔ ami; koko vɔ wakatetemala ndjalesha vɔamɛ ndo vɔ kondesha ɛkɔkɔ ami,”’ 9 ɔnkɔnɛ, nyu alami w’ɛkɔkɔ nyohokame ɔtɛkɛta wa Jehowa. 10 Nkum’Olongo Nkumadiɔndjɔ Jehowa kata ate: ‘Dimi layanga ndɔsha alami w’ɛkɔkɔ ndo dimi layokoya la wɔ l’ɔtɛ wa ɛkɔkɔ ami* ndo dimi layowanya diaha vɔ ndesha* ɛkɔkɔ ami,+ ko alami w’ɛkɔkɔ hawotoyaleshaka vɔamɛ nto. Dimi layotsha ɛkɔkɔ ami oma lo enyɔ awɔ ndo vɔ hawotonga mbo ya ndɛ yawɔ nto.’”

11 “‘Nɛ dia Nkum’Olongo Nkumadiɔndjɔ Jehowa kata ate: “Dimi ɔnɛ ndo dimɛ layoyanga ɛkɔkɔ ami ndo dimi layowakokɛ.+ 12 Dimi layokokɛ ɛkɔkɔ ami oko olami w’ɛkɔkɔ wamboshola ɛkɔkɔ ande wakahandjɔ ko nde owalesha.+ Dimi layowatsha oma lo ahole tshɛ wakawahandjɔnɛ lo lushi la wange ndo la wodjima wa tshududu.+ 13 Dimi layowatondja oma le anto ndo layowasanganya kaamɛ oma lo wedja ndo layowatɔla otsha lo wodja awɔ ndo layowalesha lo akona wa Isariyɛlɛ,+ suke la ɛkɛdi ndo suke la ahole tshɛ wadjasɛ ase wodja. 14 Lo adiyo w’amɛna kayomaalesha ndo lo akona w’etale+ wa lo Isariyɛlɛ kayowɔlɛka. Vɔ wayetamaka lɛkɔ l’ɛtshi ka nkɛtɛ kele la adiyo w’amɛna+ ndo vɔ wayɔlɛka adiyo w’amɛna lo akona wa lo Isariyɛlɛ.”

15 “‘“Dimi dimɛ layolesha ɛkɔkɔ ami+ ndo dimɛ layowaetanya,”+ mbata Nkum’Olongo Nkumadiɔndjɔ Jehowa. 16 “Dimi layoyanga wɔnɛ wakashishɔ,+ dimi layokaloya wɔnɛ wakanganɛ, dimi layɔmba mpota ya wɔnɛ wakahomɔ ndo dimi layokeketsha wɔnɛ wambɔlɛmba; koko dimi layolanya wɔnɛ wa wata ndo wɔnɛ wele la wolo. Dimi layowolesha la kilombo.”

17 “‘Koko lo dikambo dianyu, nyu ɛkɔkɔ ami, Nkum’Olongo Nkumadiɔndjɔ Jehowa kata ate: “Dimi layanga nsambola lam’asa ɔkɔkɔ la ɔkɔkɔ ndo lam’asa ɛkɔkɔ wa waomi la weombe wa mbudi.+ 18 Onde woho walɛnyu adiyo woleki amɛna hakoke le nyu? Onde nyu pombaka nto mpɔtshahɔtsha atshikadi wa adiyo la ekolo anyu? Ndo l’ɔkɔngɔ wa nyu nnɔ ashi woleki pudipudi, onde nyu pombaka mfundja ashi lo mbahɔtshahɔtsha la ekolo anyu? 19 Onde ɛkɔkɔ ami pombaka ndɛ adiyo wambɔhɔtshahɔtshama la ekolo anyu ndo nnɔ ashi wambofundjama lo mpɔtshahɔtshama la ekolo anyu?”

20 “‘Diakɔ diawatɛ Nkum’Olongo Nkumadiɔndjɔ Jehowa ate: “Dimi ɔnɛ ndo dimɛ layosambola lam’asa ɔkɔkɔ wa woke la ɔkɔkɔ wa wɔndju, 21 nɛ dia la lokondo lanyu ndo la ahɛka anyu, nyu nyakatetemala ntshindjiya ndo la nseke yanyu nyu nyakatetemala mbitshanya wɛnɛ tshɛ waki la hemɔ edja ndo nyambadianganya kɛɛ vwa. 22 Dimi layoshimbɛ ɛkɔkɔ ami ndo vɔ hawotonga ɛngɔ kandama nto;+ dimi layosambola lam’asa ɔkɔkɔ la ɔkɔkɔ. 23 Dimi layotondja olami w’ɛkɔkɔ ɔmɔtshi dia mbalama,+ okambi ami Davidɛ,+ ko nde ayowaleshaka. Nde ndamɛ ayowaleshaka ndo nde ayoyala olami awɔ.+ 24 Ndo dimi Jehowa layoyala Nzambi kawɔ,+ ndo okambi ami Davidɛ owandji l’atei awɔ.+ Dimi Jehowa dimɛ kambɔtɛkɛta.

25 “‘“Dimi layodja sheke ya wɔladi kaamɛ la wɔ+ ndo dimi layotshanya nyama ya mpango ya l’okonda+ oma lo wodja, dia vɔ mbidjasɛ lo lotui tshitshi l’oswe ndo ndala djɔ lo ekonda.+ 26 Dimi layowaetɛ ndo layetɛ dihole diosukanyi la kionakona yami ɔtshɔkɔ,+ ndo dimi layosala dia mvula ndɔ lo etena kahombama. Ɛtshɔkɔ wayɔlɔka oko mvula.+ 27 Esongo wa lo dikambɔ wayɔtɔ elowa awɔ ndo nkɛtɛ yayotondja diangɔ diayɔ+ ndo vɔ wayodjasɛ lo lotui tshitshi lo wodja. Ko vɔ wayohomba mbeya dia dimi kele Jehowa lam’ayomɔkɔla esembe awɔ+ ndo lam’ayomaatshungola oma le wanɛ wakawande mfumbe. 28 Vɔ hawotonga nto ɛngɔ ka nyama minda le wedja ndo nyama ya mpango ya la nkɛtɛ hayotowalɛ, ndo vɔ wayodjasɛ lo lotui tshitshi, ko ndooko onto layowaotsha wɔma.+

29 “‘“Dimi layowakitshɛ ekambɔ ka lokumu,* ndo vɔ hawotovɔ ndjala nto lo wodja,+ ndo vɔ hawotoshama nsɔnyi nto oma le wedja.+ 30 Ko vɔ wayohomba mbeya dia dimi Jehowa Nzambi kawɔ lekɔ kaamɛ la wɔ ndo dia vɔ luudu la Isariyɛlɛ wekɔ anto ami,’+ mbata Nkum’Olongo Nkumadiɔndjɔ Jehowa.”’

31 “‘Koko nyu ɛkɔkɔ+ ami, ɛkɔkɔ wakokɛmi, nyu nyekɔ tsho anto ndo dimi kele Nzambi kanyu,’ mbata Nkum’Olongo Nkumadiɔndjɔ Jehowa.”