Tokedi

11 Kilɔ ya lokeso* yekɔ wɔnɔnyi le Jehowa,

Koko wotsho* wa kokele mbɔngɛnyangɛnyaka.+

 2 Lam’atoyaka otako, nsɔnyi katoyelaka,+

Koko lomba lekɔ kaamɛ la akanga w’okitshakitsha.+

 3 Olowanyi w’anto w’ɛlɔlɔ kawalɔmbɔla,+

Koko lokeso la akanga w’okadi layowalanya.+

 4 Ɔngɔnyi* hawotonga la wahɔ lo lushi la nkɛlɛ,+

Koko losembwe kayotsha anto oma lo nyɔi.+

 5 Losembwe la onto laha la onongo sembolaka mboka kande,

Koko kanga kɔlɔ ayɔkɔ l’ɔtɛ wa kɔlɔ+ kande hita.

 6 Losembwe l’anto w’ɛlɔlɔ layowatsha,+

Koko akanga w’okadi wayondama la nsaki+ yawɔ hita.

 7 Etena kavɔ kanga kɔlɔ, elongamelo kande shishɔka;

Ndo elongamelo kohikami lo wolo ande shishɔka.+

 8 Onto ɔlɔlɔ pandɔka oma lo asui,

Ndo kanga kɔlɔ mbɔsaka dihole+ diande.

 9 La onyɔ ande, ɔtɔlɔki* tɔlaka wonyande lo elanyelo,

Koko ewo mbitshaka+ anto w’ɛlɔlɔ.

10 Ɔlɔlɔ w’anto w’ɛlɔlɔ ngɛnyangɛnyaka osomba,

Ndo etena kalanyema akanga wa kɔlɔ, ekoko w’ɔngɛnɔngɛnɔ+ mongaka.

11 L’ɔtɛ w’ɔtshɔkɔ w’anto w’ɛlɔlɔ osomba mbidiyamaka,+

Koko onyɔ w’akanga wa kɔlɔ mbohandjolaka.+

12 Onto tshɛ lele bu la ekanelo k’ɔlɔlɔ* petshaka* wonyande,

Koko onto lele la shɛnɔdi ya mɛtɛ mbɔlamaka ki.+

13 Omamanyishi mbetetaka dia mbishola sawo dia sheke,+

Koko onto lasungana mbɛkɛ otema* namaka sheke.*

14 Naka ɛlɔmbwɛlɔ ka dimɛna* bu, anto nkɔka,

Koko dikambo ndowanaka* lam’ele andaki*+ efula.

15 Onto tshɛ layakimɔ osunge le ɔngɛndangɛnda, ndooko onyake ayodiɛnɛ,+

Koko onto tshɛ lewɔ* nsutshasutsha anya lo diokanelo ayonga lo ekokelo.

16 Womoto lele la waonga w’ɛlɔlɔ* kondjaka lotombo,+

Koko akanga wa hiadi kondjaka ɛngɔnyi.

17 Onto ɔlɔlɔ* ndjakondjɛka wahɔ,*+

Koko kanga esehe ndjaelaka ekakatanu.*+

18 Kanga kɔlɔ nongolaka difuto dia lokeso,+

Koko ɔnɛ lonɛ losembwe nongolaka difuto dia mɛtɛ.+

19 Ɔnɛ lasukɛ losembwe la wolo tshɛ ekɔ lo mboka k’otsha lo lɔsɛnɔ,+

Koko ɔnɛ latoyelaka kɛnɛ kele kɔlɔ ekɔ lo mboka k’otsha lo nyɔi.

20 Wanɛ wele la etema wa wɛngɛngɛ wekɔ wɔnɔnyi le Jehowa,+

Koko wanɛ waha la onongo lo mboka kawɔ mbɔngɛnyangɛnyaka.+

21 Onga la eshikikelo dia:* Onto a kɔlɔ hatohandɔ dilanya,+

Koko ana w’anto w’ɛlɔlɔ wayohandɔ.

22 Oko zama dia paonyi lo ɔhɛmbɛ wa nsombo

Ngasɔ mbele womoto l’olangala latona ekanelo k’ɔlɔlɔ.

23 Nsaki k’anto w’ɛlɔlɔ konyaka lo ɔlɔlɔ,+

Koko kɛnɛ kalongamɛ akanga wa kɔlɔ konyaka lo nkɛlɛ.

24 Onto ɔmɔtshi kahaka la lokaho tshɛ* ndo komɛka lo monga la diangɔ efula;+

Okina nyimaka anto kɛnɛ kahombande nkaha koko nde mongaka wola.+

25 Kanga* lokaho ayɔngɔna,*+

Ndo ɔnɛ lashana ashi wa nnɔ* wayowosha ndo nde lawɔ.+

26 Anto wayodja ɔnɛ ladimana mbo ya ndɛ mananu,

Koko vɔ wayɔtshɔkɔla ɔnɛ layisondja.

27 Onto layanga la etete tshɛ dia nsala ɔlɔlɔ nyangaka lokolo l’ɔlɔ,+

Koko onto layanga kɛnɛ kele kɔlɔ, kɛsɔ mɛtɛ mbayowokomɛ.+

28 Ɔnɛ layaɛkɛ lo ɛngɔnyi ande ayɔkɔ,+

Koko anto w’ɛlɔlɔ wayofuka oko sɔngusɔngu ya akatshi.+

29 Onto tshɛ lela ekakatanu* le ase luudu lande hita ayokita lɔpɛpɛ,+

Ndo enginya ayonga ose olimu wa kanga otema wa lomba.

30 Elowa w’onto ɔlɔlɔ wele osongo wa lɔsɛnɔ,+

Ndo onto lakondja anima* ekɔ kanga lomba.+

31 Lo mɛtɛ naka onto ɔlɔlɔ la la nkɛtɛ futamaka,

Kete hoke kanga kɔlɔ ndo otshi wa pɛkato!+