Rɔmɔ
8 Ɔnkɔnɛ, wanɛ wele kaamɛ la Kristo Yeso hawanyema. 2 Nɛ dia ɔlɛmbɛ wa nyuma kasha lɔsɛnɔ kaamɛ la Kristo Yeso wakanyotshungola+ oma lo ɔlɛmbɛ wa pɛkato la nyɔi. 3 Kɛnɛ kaki Ɛlɛmbɛ kokoka nsala+ nɛ dia vɔ waki wɔdu+ l’ɔtɛ wa demba, Nzambi akakisale lo ntoma Ɔnande hita+ lo efanelo ka demba dia atshi wa pɛkato+ ndo lo dikambo dia pɛkato, akaanya pɛkato lo demba, 4 dia wadjango wosembwe wa lo Ɛlɛmbɛ kotshama le so+ sho wanɛ wakɛndakɛnda aha lo ndjela demba, koko lo ndjela nyuma.+ 5 Nɛ dia wanɛ wasɛna lo ndjela demba kanyiyaka akambo wa lo demba,+ koko wanɛ wasɛna lo ndjela nyuma kanyiyaka akambo wa lo nyuma.+ 6 Dikambo nkanyiya akambo wa lo demba nembetshiyaka nyɔi,+ koko nkanyiya akambo wa lo nyuma nembetshiyaka lɔsɛnɔ ndo wɔladi.+ 7 Nɛ dia nkanyiya akambo wa lo demba nembetshiyaka otunyi wa Nzambi+ nɛ dia dikambo sɔ hadiɔtɔnɛ la ɛlɛmbɛ wa Nzambi, ndo hadiokoke mbɔtɔnɛ la wɔ. 8 Ɔnkɔnɛ, wanɛ wasɛna lo ndjela demba hawokoke ngɛnyangɛnya Nzambi.
9 Koko nyu nyekɔ lo nsɛna, aha lo ndjela demba koko lo ndjela nyuma,+ naka mɛtɛ nyuma kaki Nzambi kekɔ le nyu. Ko naka onto keema la yimba* ya Kristo, kete nde bu onto ande. 10 Ko naka Kristo ekɔ kaamɛ la nyu,+ kete demba diambovɔ lo dikambo dia pɛkato, koko nyuma kekɔ lɔsɛnɔ lo dikambo dia losembwe. 11 Ko naka nyuma ka ɔnɛ lakolola Yeso oma lo nyɔi kekɔ le nyu, kete ɔnɛ lakolola Kristo Yeso oma lo nyɔi+ ayosha alemba anyu wavɔ lɔsɛnɔ+ lo tshimbo ya nyuma kande kele le nyu.
12 Ɔnkɔnɛ analengo, sho tekɔ la didjango, aha otsha le demba dia nsɛna lo ndjela demba,+ 13 nɛ dia naka nyu nsɛna lo ndjela demba, kete lo mɛtɛ nyayovɔ, ko naka l’ekimanyielo ka nyuma, nyu ndjaka etsha wa demba,+ kete nyayɔsɛna.+ 14 Nɛ dia anto tshɛ walɔmbɔma la nyuma ka Nzambi wekɔ mɛtɛ ana wa Nzambi.+ 15 Dikambo nyu konongola nyuma ka lɔhɔmbɔ kanyosha wɔma nto, koko nyakalongola nyuma kanyetɛ ana. L’ekimanyielo ka nyuma kakɔ mbataso la dui dia wolo shate: “Aba,* Papa!”+ 16 Nyuma tɔamɛ shikikɛka kaamɛ la nyuma kaso+ dia tekɔ ana wa Nzambi.+ 17 Ko naka tekɔ ana, kete tekɔ ndo ekitɔ: Ɛɛ, ekitɔ wa Nzambi, koko ekitɔ+ kaamɛ la Kristo dia sho nsowa kaamɛ+ la nde dia sho ndjotombɔma kaamɛ+ la nde.
18 Nɛ dia dimi mbɔsaka dia asui wa l’etena kɛnɛ wekɔ anyanya lo mbɛdika la lotombo layanga mɛnama le so.+ 19 Nɛ dia ditongami diekɔ lo nongamɛ l’asolo walomɔlomɔ woshwelo w’ana wa Nzambi.+ 20 Nɛ dia ditongami diakalɛndjama lo akambo w’anyanya,+ aha la lolango la diɔ, koko oma le Ɔnɛ lakadilɛndja, l’ɔtɛ w’elongamelo 21 k’ɔnɛ: Ditongami diɔ lawɔ diayotshungɔ+ oma lo lɔhɔmbɔ l’ɛhɔndɛlɔ ndo diayonga la lotshungɔ la lotombo la ana wa Nzambi. 22 Nɛ dia sho mbeyaka dia ditongami tshɛ diekɔ lo ntetemala nkuma akumu kaamɛ ndo diekɔ lo nsowa kaamɛ polo ndo kakianɛ. 23 Aha laasɔ ato, koko ndo sho lawɔ wanɛ wele la elowa wa ntondo, mbuta ate nyuma, ɛɛ, tekɔ lo nkuma akumu l’etei kaso+ etena kakongaso la asolo walomɔlomɔ dia sho mbɔsama oko ana,+ etshungwelo k’oma lo alemba aso diɛsɛ la oshinga w’etshungwelo. 24 Nɛ dia sho takashimbamɛ diɛsɛ la elongamelo kɛsɔ, koko elongamelo kɛnama keema elongamelo nɛ dia naka onto ekɔ lo mɛna ɛngɔ kɛmɔtshi, onde nde kilongamɛka? 25 Ko naka sho tekɔ lo nongamɛ+ kɛnɛ kahatɛnyi,+ kete sho tetemalaka kikongɛɛ la asolo walomɔlomɔ la ekikelo+ tshɛ.
26 Woho akɔ waamɛ mbele, nyuma tokimanyiyaka lo wɛɔdu aso;+ nɛ dia okakatanu ele hateye kɛnɛ kahombaso nɔmba etena keso la ohomba, koko nyuma tɔamɛ nɔmbaka lo dikambo diaso etena kakiyanaso efula ko hatoyeya ka mbuta. 27 Koko, ɔnɛ latɔsɛdingolaka etema+ mbeyaka kɛnɛ kalanga nyuma mbuta, nɛ dia tɔ nɔmbaka kɛnɛ kɔtɔnɛ la Nzambi dikambo dia ekilami.
28 Sho mbeyaka dia Nzambi salaka di’akambo tshɛ nkamba kaamɛ lo wahɔ w’anto woka Nzambi ngandji, wanɛ wakelamɛ lo ndjela sangwelo diande,+ 29 nɛ dia wanɛ wakandadje yimba ntondo, nde akashikikɛ la ntondo dia vɔ kengama lo ndjela efanelo ka Ɔnande,+ dia nde monga ɔna enondo+ l’atei wa anango+ efula. 30 Ndo nto, wanɛ wakandashikikɛ la ntondo+ mbele nto wanɛ wakandelɛ,+ ndo wanɛ wakandelɛ mbele nto wanɛ wakandɔshi oko anto w’ɛlɔlɔ.+ Ndo wanɛ wakandɔshi oko anto w’ɛlɔlɔ mbele nto wanɛ wakandatombola.+
31 Ko ayotota l’akambo asɔ? Naka Nzambi ekɔ lo wedi aso, akɔna ayokoka tɔlɔsha?+ 32 Lam’ele nde kopandja kaanga Ɔnande hita, koko akookimɔ dikambo diaso sho tshɛ,+ shi la ngandji tshɛ nde la ɔnande wayotosha diangɔ dikina tshɛ? 33 Onto akɔna ayofunda ɛsɔnami+ waki Nzambi? Nzambi kawaɔsa oko anto w’ɛlɔlɔ.+ 34 Onto akɔna ayowawanya? Kristo Yeso kele ɔnɛ lakavu, eelo, ndo nto lakolɔ, lele lo lonya l’omi la Nzambi+ ndo latɔlɔmbɛ.+
35 Akɔna ayotokakitola oma lo ngandji ka Kristo?+ Onde asui kana lɔkɔnyɔ kana ɛhɛnyɔhɛnyɔ kana ndjala kana otaka* kana waale kana lokuwa la ta?+ 36 Oko wakadiafundama ɔnɛ: “L’ɔtɛ ayɛ mbadiakemaso lushi l’otondo, tambɔsama oko ɛkɔkɔ watawatɔlɛ dia todiakema.”+ 37 Koko lo akambo asɔ tshɛ, ɔnɛ latoka ngandji tokimanyiyaka dia sho mbidja otshumba+ lo akambo asɔ tshɛ. 38 Nɛ dia dimi lekɔ la eshikikelo dia oyadi nyɔi kana lɔsɛnɔ kana andjelo kana mandji kana akambo wa kakianɛ kana akambo wokoya kana wolo+ 39 kana wemema kana ɔhɔngɔ kana ɛngɔ kɛmɔtshi kakatongama, ndooko ɛngɔ kayokoka tokakitola oma lo ngandji ka Nzambi kele le Kristo Yeso Nkumɛso.