1 Kɔrɛtɔ
2 Ɔnkɔnɛ analengo, lam’akamaye le nyu, dimi kondja dia ndjonyambiya la ɛtɛkɛta+ kana la lomba lami etena kakamanyewoya sheke y’ekila+ yaki Nzambi. 2 Nɛ dia dimi lakɔshi yɛdikɔ yaha mbeya dikambo dikina oma le nyu, onyake dia Yeso Kristo lakadiakema lo otamba.+ 3 Ndo dimi lakaye le nyu lo wɔdu, lele la wɔma ndo lasaka lokomba efula. 4 Lo ɛtɛkɛta ami ndo kɛnɛ kakamasambishaka komonga la ɛtɛkɛta wa lomba wetawoya, koko la ɔkɛnɛmwɛlɔ wa nyuma ndo wa wolo,+ 5 diaha mbetawɔ kanyu monga oma lo lomba l’anto, koko oma lo wolo wa Nzambi.
6 Tekɔ lo ntɛkɛta dikambo dia lomba le wanɛ wambotshunda,+ koko aha dia lomba la dikongɛ nɛ di’akambo* kana la emboledi wa dikongɛ nɛ di’akambo wahomba ndanyema.+ 7 Koko tekɔ lo ntɛkɛta dikambo dia lomba laki Nzambi lo sheke y’ekila,+ lomba lakashɛma lele Nzambi akatashikike la ntondo ka akongɛ w’akambo dikambo dia lotombo laso. 8 Ndooko omboledi wa lo dikongɛ nɛ di’akambo* weya+ lomba lɔsɔ, nɛ dia otondongaka vɔ wakalieye, tshike vɔ kondjaka* Nkumadiɔndjɔ ka lotombo. 9 Koko oko wakadiafundama ɔnɛ: “Sso kɔmɛna ndo toyi komboka ndo akambo wakalɔngɔsɔlɛ Nzambi wanɛ wawoka ngandji+ kombidjama l’otema w’onto.” 10 Nɛ dia Nzambi sho mbakandasholɛ akambo akɔ+ l’ekimanyielo ka nyuma kande,+ dikambo nyuma nyangiayangiaka akambo tshɛ, kaanga akambo wa lotshimola waki Nzambi.+
11 Nɛ dia onto akɔna eya akambo w’onto laadiko dia nyuma kele l’etei kande? Woho akɔ waamɛ mbele, ndooko onto lambeya akambo waki Nzambi onyake nyuma kaki Nzambi. 12 Sho konongola yimba y’andja ɔnɛ, koko takalongola nyuma k’oma le Nzambi+ dia mbeya akambo wakatosha Nzambi la lolango lande ndamɛ. 13 Ndo akambo akɔ mbataso, aha la ɛtɛkɛta wetsha lomba l’anto,+ koko la ɛtɛkɛta wetsha nyuma+ etena kalembetshiyaso* akambo wa lo nyuma la ɛtɛkɛta wa lo nyuma.
14 Koko onto la lo demba hetawɔ akambo wa nyuma kaki Nzambi, nɛ dia vɔ wekɔ enginya le nde; ndo nde hakoke mbaeya, nɛ dia vɔ sɛdingɔmaka lo yoho ya lo nyuma. 15 Koko onto lele la lonyuma sɛdingolaka akambo tshɛ+ ndo ndooko onto lawɔsɛdingola ndamɛ. 16 Nɛ dia “akɔna ambeya yimba ya Jehowa,* dia nde mbeetsha?”+ Koko sho tekɔ la yimba ya Kristo.+