Ɛnyɛlɔ
1 Woshwelo* wa Yeso Kristo wakawosha+ Nzambi dia mɛnya ekambi ande+ akambo wahomba salema keema edja. Ndo nde akatome ondjelo ande, ko lo tshimbo ya ondjelo akɔ, nde akɛnya akambo akɔ lo tolembetelo le okambi ande Joani,+ 2 ɔnɛ lakasambisha ɔtɛkɛta wakakimɔ Nzambi ndo kɛnɛ kakate Yeso Kristo, eelo, akambo tshɛ wakandɛnyi. 3 Ɔngɛnɔngɛnɔ le ɔnɛ ladia la dui dia wolo ndo wanɛ woka ɛtɛkɛta wa prɔfɛsiya kɛnɛ ndo wakitanyiya akambo wofundami lɔkɔ,+ nɛ dia etena kakashikikɛma kaya suke.
4 Dimi Joani lambofundɛ tshumanelo+ 7 diele lo prɔvɛnsɛ ka Aziya nte:
Nyoyale la ɔlɔlɔ waheyama mbɛdika ndo wɔladi w’oma le “Ɔnɛ lekɔ, lakikɔ ndo layaye”+ ndo w’oma le nyuma+ 7 yele la ntondo ka kiti kande ka lowandji, 5 ndo w’oma le Yeso Kristo, “Ɔmɛnyi wa Kɔlamelo,”+ “enondo wa wanɛ wolɔ oma lo nyɔi,”+ ndo “Omboledi wa nkumi ya dikanga ya la nkɛtɛ.”+
Nde latoka ngandji+ ndo lakatotshungola oma lo pɛkato yaso l’ekimanyielo ka dikila diande hita,+ 6 ndo nde akatetɛ diolelo,+ ɛlɔmbɛdi+ wa Nzambi kande ndo She, ɛɛ, lotombo ndo wolo wayalake le nde pondjo pondjo! Aamɛɛ.
7 Nyolonge, nde ekɔ lo ndjaye lo wange+ ndo washo tshɛ wayowɛna, ndo wanɛ wakawongola dikɔnga; ndo waoho tshɛ wa la nkɛtɛ wayoyatshatsha la lonyangu lo dikambo diande.+ Ɛɛ, Aamɛɛ.
8 Jehowa* Nzambi kata ate: “Dimi kele Alfa la Omega,*+ Ɔnɛ lekɔ ndo lakikɔ ndo layaye, Kanga-Wolo-Tshɛ.”+
9 Dimi Joani, ɔnangɛnyu ndo ɔnɛ lasowa+ kaamɛ la nyu ndo layolɛ kaamɛ la nyu lo diolelo+ ndo lakikɛ+ kaamɛ la nyu oko weso ambeki wa Yeso,+ laki lo disɛnga dielamɛ Patɛmɔsɛ, dia mbuta awui wa Nzambi ndo nsambisha awui wendana la Yeso. 10 Lo wolo wa nyuma dimi kakatanema lo lushi la Nkumadiɔndjɔ, ko lakoke dui dia wolo diele oko dia dimama l’ɔkɔngɔ ami 11 diata ɔnɛ: “Funda kɛnɛ kɛnayɛ lo wɔɔmbɔ kele tomawɔ lo tshumanelo 7 nɛ: L’Ɛfɛsɔ,+ la Simirnɛ,+ la Pɛrgamɛ,+ la Tiyatira,+ la Saradi,+ la Filadɛlfiya+ ndo la Laodikiya.”+
12 Dimi lakɛwɔ dia menda onto lakambutɛka awui asɔ. Lam’akamakadimɔ, dimi lakɛnyi dikundji 7 di’atala dia paonyi,+ 13 ndo l’atei wa dikundji diakɔ di’atala kaki onto ɔmɔtshi lele oko ɔna onto+ ɔlɔtshi dihɔndɔ di’otale tsho ndo ɔlɔtshi oya wa paonyi lo ntolo. 14 Ndo nto, ɔtɛ ande ndo divo dia l’ɔtɛ ande diaki wɛma fifɔ oko loonge ndo washo ande waki oko loombe la dja,+ 15 ndo ekolo ande waki oko nkonga ka pudipudi+ kambololɔ lo nkuka ndo dui diande diaki oko dia dihelela dia wolo di’ashi. 16 Nde akakimɛ tɔɔtɔ 7+ lo lonya lande l’omi ndo lokuwa+ la ta l’otale la mpɛmɔ wedi 2 lakayatombaka oma l’onyɔ ande ndo elungi kande kaki oko wonya etena kawalɛ yanyi wolo.+ 17 Lam’akamawɛnyi, dimi lakakɔ oko odo l’ekolo ande.
Ko nde akasembola lonya lande l’omi, akaminanda ndo akambutɛ ate: “Tokake wɔma. Dimi kele la Ntondo+ ndo la Ndjihelo,+ 18 ndo ɔnɛ lasɛna.+ Dimi lakavu,+ ko ohenda, dimi lekɔ la lɔsɛnɔ pondjo pondjo+ ndo lekɔ la nsapi ya nyɔi ndo ya Diombo.*+ 19 Ɔnkɔnɛ, funda akambo wakayɛnyi, akambo wekɔ ndo akambo wayosalema l’ɔkɔngɔ. 20 Lo kɛnɛ kendana la sheke y’ekila ya tɔɔtɔ 7 takayɛnyi lo lonya lami l’omi la dikundji 7 di’atala dia paonyi: Tɔɔtɔ 7 nembetshiyaka andjelo wa tshumanelo 7 ndo dikundji 7 di’atala nembetshiyaka tshumanelo 7.+