Luka
24 Lushi la ntondo la lo lomingu, vɔ wakatshu la yosose la diombo* la diangɔ di’opumu diakawalɔngɔsɔla.+ 2 Koko vɔ wakatane dive diakangitwe oma lo diombo,*+ 3 ndo lam’akawɔtɔ, vɔ kotana odo wa Nkumadiɔndjɔ Yeso.+ 4 Lam’akawakananaka lo dikambo sɔ, nyolonge, apami 2 wakemala lalewɔ wɔlɔtshi ahɔndɔ wa ngaingai. 5 Wamato asɔ wakandama la wɔma ndo wakakɔlɛ ɛtɛ awɔ otsha lo nkɛtɛ, apami akɔ wakawatɛ vate: “Lande na kayanganyu onto lasɛna l’atei w’edo?+ 6 Nde bu lanɛ, nde akolwe. Nyohɔ kɛnɛ kakandanyotɛ lam’akinde la Ngalileya, 7 ate: Ɔna onto pombaka kimɔma l’anya w’atshi wa pɛkato, ndjakema l’otamba ndo mbolɔ lushi la 3.”+ 8 Ko vɔ wakohɔ ɛtɛkɛta ande ɛsɔ,+ 9 ndo wakakalola oma la diombo,* ko wakatotɛ apɔstɔlɔ 11 ndo ambeki akina tshɛ+ akambo asɔ tshɛ. 10 Wamato akɔ waki: Mariya w’ose Mangadala, Joana la Mariya wa nyango Jakɔba. Ndo nto, wamato akina waki kaamɛ la wɔ wakatotɛ apɔstɔlɔ akambo asɔ. 11 Koko vɔ wakɔshi dia ɔsɔ ekɔ awui wa wotata ndo vɔ kombetawɔ kɛnɛ kakawatɛ wamato asɔ.
12 Ko Petero akemala, akalawɔ otsha la diombo* ndo lam’akandanyama dia nengɛ, nde akɛnyi paka ahɔndɔ wa linɛnɛ ato. Ko nde akatshu, ataambe ndamɛ lo kɛnɛ kakatombe.
13 Koko nyolonge, lushi lakɔ lɔsɔ, ambeki ande 2 wakatatshɔka otsha la Emayo, ngelo kakangana la Jɛrusalɛma milɛ* oko 7, 14 ndo vɔ wakatasawolaka lam’asawɔ lo kɛnɛ kendana l’akambo tshɛ wakete.
15 Lam’akawatasawolaka ndo lam’akawatakɛtshanyaka akambo akɔ, Yeso ndamɛ akaye lalewɔ ndo akatatɛ nsamba la wɔ. 16 Koko washo awɔ wakashimbama dia mbeeya.+ 17 Nde akawambola ate: “Akambo akɔna asɔ watanyakɛtshanya lo mboka lam’asanyu?” Ko vɔ wakemala, wele la dungi di’ɔkɛyi. 18 Kleɔpasɛ, ɔmɔtshi la l’atei awɔ akookadimola ate: “Onde wɛ ɔngɛndangɛnda keyɛ la Jɛrusalɛma mbahayeye* akambo wambotomba lɛkɔ nshi nyɛ?” 19 Nde akawambola ate: “Akambo akɔna asɔ?” Vɔ wakookadimola vate: “Akambo wendana la Yeso y’ose Nazarɛtɛ,+ ɔnɛ lakɛnya dia nde aki omvutshi wa wolo oma lo etsha ndo ɛtɛkɛta la ntondo ka Nzambi ndo k’anto tshɛ;+ 20 ewandji aso w’ɛlɔmbɛdi la emboledi wakookimɔ dia vɔ mbofundɛ nyɔi+ ndo wakɔkɔkɔla nsɛti l’otamba. 21 Koko sho takalongamɛka dia nde mbakahombe ntshungola Isariyɛlɛ.+ Eelo, laadiko dia laasɔ, ɔnɛ ekɔ lushi la 3 ntatɛ lam’akatombe akambo asɔ. 22 Ndo nto, wamato amɔtshi w’oma l’atei aso wakatambiyisha, nɛ dia vɔ wakatshwe la yosose la diombo*+ 23 ndo lam’ele vɔ hawotanyi odo ande, vɔ wakayota ɔnɛ wakɛnyi andjelo 2 wakawate dia nde ekɔ la lɔsɛnɔ. 24 Oma laasɔ, amɔtshi wa l’atei aso wakatshwe la diombo*+ ko wakatotana paka oko wakatshi wamato, koko vɔ hawowɛnyi.”
25 Ko nde akawatɛ ate: “Nyu wanɛ wele bu la tomba ndo wahetawɔ esadi akambo tshɛ wakate amvutshi le, 26 onde komonga dimɛna dia Kristo mpomana l’akambo asɔ+ ndo mbɔtɔ lo lotombo+ lande?” 27 Ko nde akaalembetshiya akambo wendana la nde wele lo Afundelo tshɛ, ntatɛ oma le Mɔsɛ ndo Amvutshi+ tshɛ.
28 L’ekomelo, lam’akawakome suke la ngelo kakawatatshɔka, nde akasale oko onto latatshu otsha lo dihole di’etale. 29 Koko vɔ wakawotɛ la kiɔkɔmɛ tshɛ vate: “Tshikala kaamɛ la so, nɛ dia taya dikɔlɔ ndo wonya aya suke la mbidja.” Ko nde akɔtɔ ndo akatshikala la wɔ. 30 Lam’akandalɛka* kaamɛ la wɔ, nde akɔshi mapa, akasale dɔmbɛlɔ, akoohembola ndo akawashawɔ.+ 31 Ko washo awɔ wakadihɔ dimɛna ndo vɔ wakaweye, ko nde akashishɔ oma la ntondo kawɔ.+ 32 Oma laasɔ, vɔ wakatanɛ vate: “Onde etema aso hawonandemi efula etena kakandayasawolaka la so lo mboka, lam’akandayatodiholɛka* Afundelo dimɛna?” 33 Ko wonya akɔ vɔ wakonɛ, wakakalola la Jɛrusalɛma ndo wakatotana apɔstɔlɔ ande 11 kaamɛ l’anto akina wosanganyi, 34 wata vate: “Lo mɛtɛ, Nkumadiɔndjɔ ambolɔ ndo nde akɛnami le Simɔna!”+ 35 Ko vɔ wakaakɔndɔlɛ kɛnɛ kakete lo mboka ndo woho wakawaweye lam’akandahembolaka mapa.+
36 Etena kakawataka akambo asɔ, Yeso ndamɛ akemala l’atei awɔ ndo akawatɛ ate: “Wɔladi wayale la nyu.”+ 37 Koko lam’ele vɔ wakandama la sase dia wɔma ndo wakoke wɔma, vɔ wakafɔnya dia wambɛna edimu. 38 Ko nde akawatɛ ate: “Lande na kahandjɔnyu wɔɔngɔ ndo lande na kenyu la taamu l’etema anyu? 39 Nyende anya la ekolo ami ɛnɛ, toko dimɛ ɔnɛ! Nyominande ndo nyomende, edimu bu l’emunyi la weka woho wamɛnanyu ɔnɛ.” 40 Lam’akandate ngasɔ, nde akawaɛnya anya la ekolo ande. 41 Koko lam’akawangɛnangɛnaka ndo akawambaka tsho, laasɔ ko watetawɔ, nde akawambola ate: “Onde nyu keema la yangɔ ya ndɛ lanɛ?” 42 Ko vɔ wakawosha etenyi ka lose la lofumba, 43 ko nde akɔshi ndo akale la ntondo kawɔ.
44 Oma laasɔ, nde akawatɛ ate: “Etena kakimi kaamɛ la nyu,+ dimi lakanyotɛ nte, akambo tshɛ wakafundama lo Ɛlɛmbɛ wa Mɔsɛ, lo Amvutshi ndo lo Esambo lo dikambo diami pombaka kotshama.”+ 45 Ko nde akadihola timba tawɔ dimɛna dia vɔ nshihodia Afundelo,+ 46 ndo nde akawatɛ ate: “Ngasɔ mbakadiafundama ɔnɛ Kristo pombaka nsowa ndo mbolɔ oma lo nyɔi lushi la 3,+ 47 ndo lo lokombo lande mbahomba esambishelo salema lo wedja tshɛ+ dia anto ndjatshumoya ko vɔ dimanyiyama pɛkato yawɔ,+ ntatɛ oma la Jɛrusalɛma.+ 48 Nyu pombaka monga ɛmɛnyi w’akambo asɔ.+ 49 Nyolonge, layonyotomɛ kɛnɛ kakalake Papa. Koko nyotshikale l’osomba edja ndo lam’ayonyolodiama la wolo w’oma l’olongo.”+
50 Ko nde akaalɔmbɔla otsha la Bɛtaniya, akedia anya ndo akaatshɔkɔla. 51 Etena kakandaatshɔkɔlaka, nde akakakitɔna la wɔ ndo akɔsama otsha l’olongo.+ 52 Ko vɔ wakɔɔlɛmiya* ndo wakakalola la Jɛrusalɛma l’ɔngɛnɔngɛnɔ w’efula.+ 53 Ndo vɔ wakatanemaka tena tshɛ lo tɛmpɛlɔ watombola Nzambi.+