Luka

19 Oma laasɔ, Yeso akɔtɔ la Jeriko ndo akatenyanya. 2 Pami kɛmɔtshi kakawelɛka Zakɛyo aki lɛkɔ; nde aki owandji w’afutshanyi w’elambo ndo aki la ɔngɔnyi efula. 3 Nde akayangaka dia mɛna woho w’onto waki Yeso shɔ, koko nde kokoka mbɛɛna l’ɔtɛ w’olui w’anto, nɛ dia nde aki mondo. 4 Ɔnkɔnɛ, nde akalawɔ la ntondo ndo akatodɛ l’osongo wa lokumu* dia nde mbɛɛna, nɛ dia Yeso akahombe mbeta lo mboka kakɔ. 5 Lam’akakome Yeso laawɔ, nde akaalɛ l’olongo ndo akawotɛ ate: “Zakɛyo holɔ yema esadi, nɛ dia layanga tohanga lakayɛ ɛlɔ.” 6 Ko nde akaholɔ esadi ndo akatoolongola l’ɔngɛnɔngɛnɔ oko ɔngɛndangɛnda. 7 Lam’akɛnyi anto tshɛ dikambo sɔ, vɔ tshɛ wakangunanguna, wata vate: “Nde ambotshɔ tohanga laka otshi wa pɛkato.”+ 8 Ko Zakɛyo akemala ndo akatɛ Nkumadiɔndjɔ ate: “Nkumadiɔndjɔ, layanga mbisha ase wola k’ahende ɔtɔi ka diangɔ diami ndo ɛngɔ tshɛ kakamɔshi* le onto lo mbokesa, layanga mbokaloyɛtɔ ndodia lo 4.”+ 9 Ko Yeso akawotɛ ate: “Panda kambɔtɔ lo luudu lɔnɛ ɛlɔ, nɛ dia ndo wɛ kele ɔna Abrahama. 10 Nɛ dia Ɔna onto akaye ndjoyanga ndo ndjoshimbɛ wanɛ wakashishɔ.”+

11 Lam’akawahokamɛka akambo asɔ, nde akawaoke wɛɛla okina, nɛ dia nde aki suke la nkoma la Jɛrusalɛma ndo vɔ wakafɔnyaka ɔnɛ Diolelo dia Nzambi diakahombe mɛnama ko etena kɛsɔ.+ 12 Ko nde akate ate: “Pami kɛmɔtshi ka lokumu aki suke la minda lɔkɛndɔ otsha lo wodja ɔmɔtshi w’etale+ dia tahenyama l’okudi wa nkumekanga ko nde nkalola. 13 Nde akelɛ ase olimu ande 10, akawasha mina* 10 ndo akawatɛ ate: ‘Nyonde okanda la yɔ polo lam’ayomoya.’+ 14 Koko ase wodja ande wakoohetshaka ndo wakatome atomami l’ɔkɔngɔ ande dia tota ɔnɛ: ‘Sho hatolange pami kɛnɛ monga nkumekanga kaso.’

15 “L’ekomelo, lam’akandakalola l’ɔkɔngɔ wa nde mbahema l’okudi* wa nkumekanga, nde akelɛ ase olimu ande wakandasha falanga* dia mbeya wahɔ wakawakondja lo okanda awɔ.+ 16 Ko ose olimu wa ntondo akaye ndo akate ate: ‘Owandji, mina yayɛ yamboota nkina 10.’+ 17 Nde akawotɛ ate: ‘Wɛ ambosala dimɛna ndo wɛ ekɔ ose olimu w’ɔlɔlɔ! Lam’ele wɛ ambɛnya kɔlamelo yayɛ lo kiambokambo ya tshitshɛ, onga owandji w’esomba 10.’+ 18 Ose olimu wa 2 akaye ndo akate ate: ‘Owandji, mina yayɛ yamboota nkina 5.’+ 19 Nde akatɛ ndo ɔsɔ ate: ‘Wɛ lawɔ onga owandji w’esomba 5.’ 20 Koko, okina akaye ndo akate ate: ‘Owandji, mina kayɛ kakamalame lo dihɔndɔ tɔ kɛnɛ. 21 Dimi lakakoke wɔma, nɛ dia wɛ ekɔ kanga awui wolo. Wɛ tɔsaka kɛnɛ kakiyɛ komomba ndo wɛ tonaka kɛnɛ kakiyɛ komonɛ.’+ 22 Nde akawotɛ ate: ‘Wɛ ose olimu wa kɔlɔ, lambokolombosha lo ndjela ɛtɛkɛta ayɛ. Wɛ akeyaka dia dimi lekɔ kanga awui wolo, latɔsaka kɛnɛ kakimi komomba ndo latonaka kɛnɛ kakimi komonɛ.+ 23 Ko lande na kakiyɛ kototshika falanga* yami lo bankɛ, ko lam’ayomoya dimi ndjoyɔsa la wahɔ?’

24 “Ko nde akatɛ anto wakemala laawɔ ate: ‘Nyɔɔhɔtɔlɛ mina kele le nde ndo nyokisha ɔnɛ lele la mina 10.’+ 25 Ko vɔ wakawotɛ vate: ‘Owandji, nde ekɔ la mina 10!’ . . . 26 Ko nde akate ate: ‘Lambonyotɛ nte, onto tshɛ lele la ɛngɔ kɛmɔtshi, wayowokotshɛ dikina, koko onto tshɛ laha la ɛngɔ, wayowɔhɔtɔla ndo kɛnɛ kele la nde.+ 27 Ndo nto, atunyi ami wanɛ wakatone dia dimi monga nkumekanga, nyowaela lanɛ ndo nyaadiake la ntondo kami.’”

28 L’ɔkɔngɔ wa nde mbuta akambo asɔ, nde akatetemala la lɔkɛndɔ lande otsha la Jɛrusalɛma. 29 Lam’akawakome suke la Bɛtɛfangɛ ndo la Bɛtaniya, lo dikona dielɛwɔ Dikona di’esongo w’Ɔlivɛ,+ nde akatome ambeki ande 2,+ 30 akawatɛ ate: “Nyotshu lo ngelo kɛnanyu la ntondo kengo ndo kam’ayonyɔtɔ lɔkɔ, nyayotana ɔsɔngɔ wa mponda kele onto atahemaka lɔkɔ okelekami. Kanyokikelekole ko nyu ndja la tɔ lanɛ. 31 Ndo naka onto ambonyombola ate: ‘Lande na kakikelekolanyu?’ Kanyowote nyate: ‘Nkumadiɔndjɔ mbele l’ohomba atɔ.’” 32 Ko wanɛ wakatomama wakatshu, wakatotana oko wakawatɛ+ Yeso. 33 Lam’akawakelekolaka ɔsɔngɔ wa mponda akɔ, akanga atɔ wakawatɛ ɔnɛ: “Lande na kakelekolanyu mponda kɛnɛ?” 34 Vɔ wakate vate: “Nkumadiɔndjɔ mbele l’ohomba atɔ.” 35 Ko vɔ wakakitɔlɛ le Yeso ndo wakahɛ ahɔndɔ awɔ wa laadiko laadiko diatɔ, ko wakadjashiya Yeso laadiko diatɔ.+

36 Lam’akandatatshɔka, anto wakatalaka ahɔndɔ awɔ wa laadiko lo mboka.+ 37 Kam’akandakome suke la otadimbo waholɔ oma lo Dikona di’esongo w’Ɔlivɛ, leemba l’ambeki ande tshɛ wakatatɛ ngɛnangɛna ndo ntombola Nzambi la dui dia wolo l’ɔtɛ w’akambo wa diambo wakawɛnyi, 38 wata vate: “Ɔnɛ layaye oko Nkumekanga lo lokombo la Jehowa* atshɔkwame! Wɔladi wayale l’olongo ndo lotombo le Nzambi lele laadiko di’elongo!”+ 39 Koko, Afarisɛ amɔtshi waki l’atei w’olui w’anto wakawotɛ vate: “Ombetsha, hangwɛ ambeki ayɛ.”+ 40 Ko nde akaakadimola ate: “Lambonyotɛ nte, naka vɔ mbɔlama, kete ave anɛ wayoda ekoko.”

41 Lam’akinde suke la nkoma, nde akɛnyi osomba ndo akalele lo dikambo diawɔ,+ 42 ata ate: “Otoyoshihodia ɛlɔ kɛnɛ akambo wendana la wɔladi lee . . . koko kakianɛ vɔ wamboshɛma lo washo ayɛ.+ 43 Nɛ dia nshi yekɔ lo ndjaye yele atunyi ayɛ wayoka lokombo la dikundji dia lɔsɔngɔla lo otshimbedi ayɛ, wayokotshimba ndo wayokodinga* lo bɛkɛ tshɛ.+ 44 Vɔ wayokɔkɔsha lo nkɛtɛ,+ wɛ la anayɛ ndo vɔ hawototshika le yɛ ndooko dive laadiko dia dive,+ nɛ dia wɛ koshihodia etena kakawakembola.”

45 Ko nde akɔtɔ lo tɛmpɛlɔ ndo akatshanya anto wakasondjaka+ lɔkɔ, 46 awatɛ ate: “Akafundama ɔnɛ: ‘Luudu lami layelamɛ luudu la dɔmbɛlɔ,’+ koko nyu nyambolietɛ wooko w’apɔtwanyi.”+

47 Nde aketshaka lushi la lushi lo tɛmpɛlɔ. Ko ewandji w’ɛlɔmbɛdi, afundji la ɛnɛnɛ wakayangaka dia mbodiaka;+ 48 koko vɔ kokondja woho wa nsala dikambo sɔ, nɛ dia anto tshɛ wakemalaka lalende ndo wakoohokamɛka.+