Ɛzɛkiyɛlɛ
18 Ɔtɛkɛta wa Jehowa wakaye le mi nto ɔnɛ: 2 “Kakɔna kalembetshiya yokedi yakamba la nyu lo wodja wa Isariyɛlɛ y’ɔnɛ: ‘Ambutshi w’apami mbakale elowa w’ehudi, koko wanyu w’ana mbambonga ɔkɛkɛ’?+
3 “‘Lo mɛtɛ oko wemi la lɔsɛnɔ,’ mbata Nkum’Olongo Nkumadiɔndjɔ Jehowa, ‘nyu hanyototetemala mbuta ɛtɛkɛta ɛsɔ lo Isariyɛlɛ. 4 Eenda, anima* tshɛ wami mbewɔ. Oyadi anima w’ombutshi wa pami kana wa ɔna, wami mbewɔ. Anima* wasala pɛkato mbayovɔ.
5 “‘Tɔshi dia onto ɔmɔtshi ekɔ ɔlɔlɔ ndo salaka kɛnɛ kosembwe ndo kele ɔlɔlɔ. 6 Nde hale elambo wa ɔtɛmwɛlɔ wa dikishi lo akona;+ nde hendɛ le dikishi dia nyɛtɛɛtɛ* dia lo luudu la Isariyɛlɛ; nde hasale loseka* la wadi a kana+ ndo heyana la womoto lo nshi yɛnande dikila;+ 7 nde hasɔkisha onto ɔmɔtshi,+ koko nde kaloyaka kɛnɛ kakawosha onto lokolende dibasa ɔkɔlɛ;+ nde have onto,+ koko nde mbishaka ɔnɛ lele la ndjala+ mbo ya ndɛ yande ndo kombaka ɔnɛ lele otakataka dihɔndɔ;+ 8 nde hasɔndjana diangɔ la wahɔ kana falanga la wahɔ w’efula,+ koko nde hasale akambo la shɔnɔdi;+ nde sambolaka la losembwe la mɛtɛ lam’asa onto la wonyande;+ 9 ndo nde tetemalaka nkɛndakɛnda lo wadjango ami ndo ndjelaka tɛdikɔ tami ta dombo dia nsala akambo la kɔlamelo. Onto ɔsɔ ekɔ onto ɔlɔlɔ ndo nde mɛtɛ ayotshikala la lɔsɛnɔ,’+ mbata Nkum’Olongo Nkumadiɔndjɔ Jehowa.
10 “‘Ko tɔshi dia nde ambota ɔna lele wovi+ kana ondjakanyi*+ kana lasala dui dimɔtshi l’atei wa akambo akina wayela 11 (kaanga mbele she kosala dui dimɔtshi l’atei wa akambo asɔ,) nde ndɛka elambo w’ɔtɛmwɛlɔ wa dikishi lo akona, salaka loseka la wadi a kana, 12 sɔkishaka ɔnɛ lele lo dihombo ndo ose wola,+ mbɔsaka diangɔ lo wovi, hakaloya ɔkɔlɛ, mendɛka le dikishi dia nyɛtɛɛtɛ,+ ndjashaka lo ditshelo dia wɔnɔnyi,+ 13 sɔndjanaka falanga la wahɔ+ w’efula ndo diangɔ la wahɔ, kete ɔna ɔsɔ hatotshikala la lɔsɛnɔ. L’ɔtɛ wa akambo asɔ tshɛ wa wɔnɔnyi wakandasale, nde mɛtɛ ayodiakema. Dikila diande diayonga l’ɔtɛ ande.
14 “‘Ko tɔshi dia papa kɛmɔtshi ekɔ la ɔna lɛna pɛkato tshɛ yasala she ndo kaanga kayɛnande, nde hasale akambo asɔ. 15 Nde hale elambo wa ɔtɛmwɛlɔ wa dikishi lo akona; nde hendɛ le dikishi dia nyɛtɛɛtɛ dia lo luudu la Isariyɛlɛ; nde hasale loseka la wadi a kana; 16 nde hasɔkisha ndooko onto; nde hɔshi ɛngɔ kakawakimɔ ɔkɔlɛ; nde hɔshi ndooko ɛngɔ lo wovi; nde mbishaka ɔnɛ lele la ndjala mbo ya ndɛ yande ndo kombaka ɔnɛ lele otakataka dihɔndɔ; 17 nde hasoya ose wola; nde hasɔndjana falanga la wahɔ w’efula kana diangɔ la wahɔ; ndo nde ndjelaka tɛdikɔ tami ta dombo ndo kɛndakɛndaka lo wadjango ami. Onto ɔsɔ hatovɔ l’ɔtɛ wa munga ka she. Nde mɛtɛ ayotshikala la lɔsɛnɔ. 18 Ko lam’ele she akasalaka akambo la okadi, akave ɔnango ndo akasale kɛnɛ kele kɔlɔ l’atei wa anto ande, nde ayovɔ l’ɔtɛ wa munga kande.
19 “Koko nyu nyayota nyate: “Lande na kahɛmbɛ ɔna onongo l’ɔtɛ wa munga ka she?” Lam’ele ɔna ambosala kɛnɛ kosembwe ndo kele ɔlɔlɔ, ambolama wadjango ami tshɛ ndo ambaakitanyiya, nde mɛtɛ ayotshikala la lɔsɛnɔ.+ 20 Anima* wasala pɛkato mbayovɔ.+ Ɔna hatɛmba onongo l’ɔtɛ wa munga ka she ndo she hatɛmba onongo l’ɔtɛ wa munga k’ɔnande. Ɔlɔlɔ w’onto ɔlɔlɔ wayonga paka le nde ndamɛ ndo kɔlɔ ka kanga kɔlɔ kayonga le nde ndamɛ.+
21 “‘Ko naka kanga kɔlɔ ambokadimɔ oma lo pɛkato yande tshɛ yakandasale ndo ambolama wadjango ami ndo osala kɛnɛ kosembwe ndo kele ɔlɔlɔ, nde mɛtɛ ayotshikala la lɔsɛnɔ. Nde hatovɔ.+ 22 Ndooko kɔlɔ kakandasale kayadiema* lo dikambo diande+ nto. Nde ayotshikala la lɔsɛnɔ l’ɔtɛ wasalande kɛnɛ kele ɔlɔlɔ.’+
23 “‘Onde dimi ngɛnangɛnaka mɛtɛ nyɔi k’onto a kɔlɔ?’+ mbambola Nkum’Olongo Nkumadiɔndjɔ Jehowa. ‘Shi dimi ndeka nanga dia nde nkadimɔ oma lo mboka yande ndo nde ntshikala la lɔsɛnɔ?’+
24 “‘Koko naka onto ɔlɔlɔ ambotshika nsala ɔlɔlɔ ko ambosala kɛnɛ kele kɔlɔ, lo nsala akambo tshɛ wa wɔnɔnyi wasala kanga kɔlɔ, onde nde ayotshikala la lɔsɛnɔ? Ndooko etsha w’ɛlɔlɔ wakandasale wayohɔma nto.+ L’ɔtɛ wamondoshisha kɔlamelo ndo l’ɔtɛ wa pɛkato kamondosala, nde ayovɔ.+
25 “‘Koko nyu nyayota nyate: “Mboka ka Jehowa keema osembɔki.”+ Luudu la Isariyɛlɛ le, nyohokame lam’alanganyu! Onde mboka kami kele keema osembɔki?+ Shi mboka yanyu mbele keema esembɔki?+
26 “‘Naka onto ɔlɔlɔ ambotshika nsala ɔlɔlɔ ko ambosala kɛnɛ kele kɔlɔ ndo ambovɔ l’ɔtɛ wa dikambo sɔ, nde ayovɔ l’ɔtɛ wa kɔlɔ kande hita.
27 “‘Naka kanga kɔlɔ ambokadimɔ oma lo kɔlɔ kakandasale ndo ambotatɛ nsala kɛnɛ kosembwe ndo kele ɔlɔlɔ, nde ayoshimbɛ lɔsɛnɔ*+ lande hita. 28 Lam’ayondɛna ndo lam’ayondokadimɔ oma lo kɔlɔ tshɛ yakandasale, nde mɛtɛ ayotshikala la lɔsɛnɔ. Nde hatovɔ.
29 “‘Koko luudu la Isariyɛlɛ layota ɔnɛ: “Mboka ka Jehowa keema osembɔki.” Luudu la Isariyɛlɛ+ le, onde mɛtɛ mboka yami mbele keema esembɔki? Shi mboka yanyu mbele keema esembɔki?’
30 “‘Ɔnkɔnɛ, luudu la Isariyɛlɛ le, dimi layolombosha onto tshɛ la l’atei anyu lo ndjela mboka yande,’+ mbata Nkum’Olongo Nkumadiɔndjɔ Jehowa. ‘Nyokadimɔ, ɛɛ, nyokadimɔ tshɛ lo tshɛ oma lo kɔlɔ yanyu diaha yɔ monga otamba wa ntakanya wanyela onongo. 31 Nyonya kɔlɔ tshɛ yakanyasale+ ndo nyokondja* otema w’oyoyo la yimba y’oyoyo,+ nɛ dia, lande na kahombanyu mvɔ,+ luudu la Isariyɛlɛ le?’
32 “‘Dimi hangɛnangɛna nyɔi ka onto ɔmɔtshi,’+ mbata Nkum’Olongo Nkumadiɔndjɔ Jehowa. ‘Ɔnkɔnɛ, nyokadimɔ ko nyayotshikala la lɔsɛnɔ.’”+