Ɛzɛkiyɛlɛ
3 Oma laasɔ, nde akambutɛ ate: “Ɔna onto, lɛka kɛnɛ kele la ntondo kayɛ.* Lɛka wɔɔmbɔ ɔnɛ kele tshɔka tote luudu la Isariyɛlɛ.”+
2 Ɔnkɔnɛ dimi lakasɛ onyɔ ami, ko nde akandesha wɔɔmbɔ akɔ. 3 Nde akambutɛ ate: “Ɔna onto, lɛka wɔɔmbɔ ɔnɛ wamomokosha ndo lodia dikundju diayɛ la wɔ.” Ko dimi lakatatɛ mbɔlɛ, ko vɔ wakayala mpɛ oko osanga lo onyɔ ami.+
4 Nde akambutɛ ate: “Ɔna onto, tshɔka l’atei wa luudu la Isariyɛlɛ kele towate ɛtɛkɛta ami. 5 Nɛ dia wɛ hatomami le anto watɛkɛta ɔtɛkɛta wahokɛma kana ɔtɛkɛta wahayeye, koko le luudu la Isariyɛlɛ. 6 Wɛ hatomami le anto efula watɛkɛta ɔtɛkɛta wahokɛma kana ɔtɛkɛta wahayeye, wɔnɛ wele wɛ hakoke nshihodia tɔtɛkɛta tawɔ. Otomokotoma le wɔ, vɔ wotokohokamɛ.+ 7 Koko luudu la Isariyɛlɛ layotona kohokamɛ, nɛ dia vɔ hawolange pokamɛmi.+ Wanɛ tshɛ wele lo luudu la Isariyɛlɛ wekɔ ɛtɛ wolo ndo etema wolo.+ 8 Eenda, dimi lambetɛ elungi kayɛ wolo oko dungi diawɔ ndo okoko ayɛ wolo oko ekoko+ awɔ. 9 Dimi lambetɛ okoko ayɛ oko diyama, wolo ndeka dive dia silɛksɛ.+ Towaokake wɔma ndo tatɛke asolo l’ɔtɛ wa dungi diawɔ,+ nɛ dia vɔ wekɔ luudu la atɔmbɔki.”
10 Nde akambutɛ ate: “Ɔna onto, hokamɛ ɛtɛkɛta ami tshɛ wakotɛmi ndo djawɔ lo otema. 11 Tshɔka l’atei wa anto ayɛ*+ wele mfumbe kele tosawole la wɔ. Towate wate: ‘Ɔnkɔnɛ mbata Nkum’Olongo Nkumadiɔndjɔ Jehowa,’ oyadi vɔ mpokamɛ kana vɔ ntona dia mpokamɛ.”+
12 Oma laasɔ, nyuma kɛmɔtshi kakamɛmbɛ+ ndo dimi lakoke dui dia wolo oma lo ɔkɔngɔ ami diata ɔnɛ: “Lotombo la Jehowa latombɔme oma lo dihole diande.” 13 Lohelo la ahafu wa ditongami diasɛna lakokɛ etena kakawasakanaka,+ oma laasɔ ko lohelo la etshimbi+ ndo wondjo wa dui dia wolo. 14 Nyuma kakamɛmbɛ ndo kakambɔshi, ko lakatshu lo ololo ndo lo nkɛlɛ ka yimba yami, ndo lonya la Jehowa lakambahema wolo. 15 Ko dimi lakatshu le anto waki mfumbe la Tɛlɛ-Abiba, le wanɛ wakadjasɛka suke la ɔkɛdi wa Kebara+ ndo lakatodjasɛ lɛkɔ lɛnɛ akawadjasɛka;+ ndo dimi lakadjasɛ l’atei awɔ nshi 7 lele la ohokosanu.
16 L’ekomelo ka nshi 7, ɔtɛkɛta wa Jehowa wakaye le mi ɔnɛ:
17 “Ɔna onto, dimi lambokɔsɔna djamu ya luudu la Isariyɛlɛ;+ ndo lam’ayoyoka ɔtɛkɛta w’oma lo onyɔ ami, wɛ pombaka mbewolɛmiwɔ.+ 18 Lam’ayomotɛ kanga kɔlɔ nte: ‘Wɛ mɛtɛ ayovɔ,’ koko wɛ hawewola ndo wɛ hatɛkɛta la oyango wa mbewola kanga kɔlɔ dia nde nkadimɔ oma lo mboka kande ka kɔlɔ dia nde ntshikala la lɔsɛnɔ,+ nde ayovɔ l’ɔtɛ wa munga kande nɛ dia nde ekɔ kanga kɔlɔ,+ koko dimi layokɔlɔmba dikila diande.*+ 19 Ko naka wɛ mbewola kanga kɔlɔ ko nde hakadimɔ oma lo kɔlɔ kande ndo oma lo mboka kande ka kɔlɔ, nde ayovɔ l’ɔtɛ wa munga kande, koko wɛ mɛtɛ ayoshimbɛ lɔsɛnɔ*+ layɛ hita. 20 Koko naka onto ɔlɔlɔ ambotshika nsala ɔlɔlɔ ko ambosala kɛnɛ kele kɔlɔ,* dimi layokitsha otamba wa ntakanya la ntondo kande ndo nde ayovɔ.+ Naka wɛ kombewola, nde ayovɔ l’ɔtɛ wa pɛkato kande ndo etsha ande w’ɛlɔlɔ hawotohɔma nto, koko dimi layokɔlɔmba dikila diande.*+ 21 Ko naka wɛ ambewola onto ɔlɔlɔ diaha nde nsala pɛkato, ko nde hasadi pɛkato, nde mɛtɛ ayotshikala la lɔsɛnɔ nɛ dia wɛ akawewola,+ ndo wɛ ayoshimbɛ lɔsɛnɔ* layɛ hita.”
22 Ko lonya la Jehowa lakaye le mi lɛkɔ, ndo nde akambutɛ ate: “Onɛɛ, tshɔka otsha lo okidi, ko dimi layotɔtɛkɛta la yɛ lɛkɔ.” 23 Ɔnkɔnɛ, dimi lakonɛɛ ko lakatshu otsha lo okidi. Mɛnyi ko lotombo la Jehowa lɛkɔ,+ oko lotombo lakamɛnyi suke la ɔkɛdi wa Kebara,+ ko dimi lakayakɔsha ekukumadi. 24 Ko nyuma kakɔtɔ le mi ndo kakamemadia lo ekolo+ ami, ko nde akambutɛ ate:
“Tshɔka, toyadihe l’etei ka luudu layɛ. 25 Koko wɛ ɔna onto, vɔ wayokodja ɛkɔdi ndo wayokokeleka la wɔ diaha wɛ ntomba oma l’atei awɔ. 26 Ndo dimi layosala dia lolemi layɛ nkakatɛ la diko di’onyɔ ayɛ, ko wɛ ayonga lomi, wɛ hatonga la akoka wa mbahangwɛ, nɛ dia vɔ wekɔ luudu la atɔmbɔki. 27 Koko etena kayomɔtɛkɛta la yɛ, dimi layofola onyɔ ayɛ, ndo wɛ pombaka mbatɛ+ wate: ‘Ɔnkɔnɛ mbata Nkum’Olongo Nkumadiɔndjɔ Jehowa.’ Ɔnɛ lahokamɛ+ ahokame, ndo ɔnɛ latona mpokamɛ atone, nɛ dia vɔ wekɔ luudu+ la atɔmbɔki.