2 Nkumi ya dikanga

2 Lam’aki Jehowa suke la mbɔsa Elidja+ otsha l’olongo* lo lɔpɛpɛ la wolo,+ Elidja nde la Elisha+ wakonɛɛ oma la Ngilingalɛ.+ 2 Elidja akatɛ Elisha ate: “Lam’alangayɛ, tshikala lanɛ nɛ dia Jehowa ambontoma otsha la Bɛtɛlɛ.” Koko Elisha akate ate: “Lo mɛtɛ oko wele Jehowa la lɔsɛnɔ ndo oko weyɛ* la lɔsɛnɔ, dimi hantokotshika.” Ko vɔ wakaholɔ otsha la Bɛtɛlɛ.+ 3 Oma laasɔ, ana w’amvutshi* waki la Bɛtɛlɛ wakaye le Elisha ko wakawotɛ vate: “Onde wɛ mbeyaka dia ɛlɔ Jehowa ayanga mbɔsa nkumɛyɛ diaha nde monga nto owandji ayɛ?”+ Ko nde akate ate: “Dimi lakashidi mbeya. Nyɔlame.”

4 Oma laasɔ, Elidja akawotɛ ate: “Elisha, lam’alangayɛ, tshikala lanɛ nɛ dia Jehowa ambontoma otsha la Jeriko.”+ Koko nde akate ate: “Lo mɛtɛ oko wele Jehowa la lɔsɛnɔ ndo oko weyɛ* la lɔsɛnɔ, dimi hantokotshika.” Ko vɔ wakakome la Jeriko. 5 Ana w’amvutshi waki la Jeriko wakasukana le Elisha ko wakawotɛ vate: “Onde wɛ mbeyaka dia ɛlɔ Jehowa ayanga mbɔsa nkumɛyɛ diaha nde monga nto owandji ayɛ?” Ko nde akate ate: “Dimi lakashidi mbeya. Nyɔlame.”

6 Oma laasɔ, Elidja akawotɛ ate: “Lam’alangayɛ, tshikala lanɛ nɛ dia Jehowa ambontoma otsha lo Jɔrdana.” Koko nde akate ate: “Lo mɛtɛ oko wele Jehowa la lɔsɛnɔ ndo oko weyɛ* la lɔsɛnɔ, dimi hantokotshika.” Ko vɔ akɔ 2 wakatshu. 7 Ndo ana w’amvutshi akɔ 50 wakatshu, ko wakatemala dia mendaka lo tshalola etena kakawemala vɔ akɔ 2 l’omamu wa Jɔrdana. 8 Oma laasɔ, Elidja akɔshi dihɔndɔ diande di’omvutshi,+ akadiɔmbɛ ko akadikɔmɔla lo ashi, ko ashi wakatɔna otsha lo lonya la lɔmɔsɔ ndo otsha lo lonya l’omi, ko vɔ akɔ 2 wakatehɔ lo nkɛtɛ y’ofumbo.+

9 Kam’akawatehɔ, Elidja akatɛ Elisha ate: “Ɔnɔmbɛ kɛnɛ kalangayɛ dimi kosalɛ ntondo ka dimi mbɔsama oma laleyɛ.” Ko Elisha akate ate: “Lam’alangayɛ, onde dimi koka nongola nyuma+ kayɛ ndodia lo 2?”*+ 10 Nde akakadimola ate: “Wɛ ambɔlɔmba dikambo dia wolo. Naka wɛ ayɔmɛna lam’ayomɔsama oma laleyɛ, kete diayosalema ngasɔ le yɛ. Ko naka wɛ hamɛnyi, kete diɔ hadiotosalema.”

11 Lam’akawatakɛndakɛndaka, watasawola etena kakawatakɛndakɛndaka, mbala kakɔ ɔtɔi pusupusu ka dja ndo mfalasa ya dja+ yakaakakitola vɔ 2, ko Elidja akadɛ otsha l’olongo* lo lɔpɛpɛ la wolo.+ 12 Etena kakendaka Elisha, nde akataka la dui dia wolo ate: “Papa lɛ, papa lɛ! Pusupusu k’Isariyɛlɛ ndo ambahemi ande wa mfalasa!”+ Lam’akinde hayokoka mbɛɛna, nde akakimɛ ahɔndɔ ande ko akawate lo 2.+ 13 L’ɔkɔngɔ wa laasɔ, nde akatɔngɔna dihɔndɔ di’omvutshi+ diaki Elidja diakakɔ oma le nde, ko nde akakalola ndo akayemala l’omamu wa Jɔrdana. 14 Oma laasɔ, nde akɔshi dihɔndɔ di’omvutshi diaki Elidja diakakɔ oma le nde, akadikɔmɔla lo ashi ndo akate ate: “Lende ele Jehowa, Nzambi k’Elidja?” Lam’akandadikɔmɔla lo ashi, ashi wakatɔna otsha lo lonya la lɔmɔsɔ ndo otsha lo lonya l’omi, ko Elisha akatehɔ.+

15 Lam’akawɛnyi ana w’amvutshi wa la Jeriko oma lo tshalola, vɔ wakate vate: “Nyuma kaki Elidja kaya le Elisha.”+ Ko vɔ wakatshu tohomana la nde ndo wakakusama la nkɛtɛ la ntondo kande. 16 Vɔ wakawotɛ vate: “Apami 50 wele la akoka vɔ anɛ kaamɛ l’ekambi ayɛ. Lam’alangayɛ, etawɔ dia vɔ ntshɔ toyanga nkumɛyɛ. Ondo nyuma* ka Jehowa kakawɛmbi ndo kakatowokɛ lo dikona dimɔtshi kana lo okidi+ ɔmɔtshi.” Koko nde akate ate: “Tanyaatomake.” 17 Koko vɔ wakatetemala mbeembiya polo ndo nde hayeya ka ntsha, ko nde akate ate: “Nyaatome.” Vɔ wakatome apami 50, ko wakatooyanga l’edja ka nshi 3, koko vɔ kombɛna. 18 Lam’akawakalola le nde, nde akatshikalaka la Jeriko.+ Oma laasɔ, nde akawatɛ ate: “Onde dimi konyotɛ diaha nyu ntshɔ?”

19 L’ɔkɔngɔ diko, apami wa l’osomba wakatɛ Elisha vate: “Nkumɛso koka mɛna dia osomba wekɔ lo dihole dia dimɛna,+ koko ashi wekɔ kɔlɔ ndo nkɛtɛ yekɔ ekomba.”* 20 Ko nde akate ate: “Nyombela djɔngalɔnga y’oyoyo ndo nyodje lɛɛhɔ lɔkɔ.” Ko vɔ wakawelayɔ. 21 Oma laasɔ, nde akatshu lo kiɔkɔ y’ashi akɔ, akokɛ lɛɛhɔ lɔkɔ+ ndo akate ate: “Jehowa kata ate: ‘Dimi lambɔkɔnɔla ashi anɛ. Vɔ hawotela nyɔi kana mbetɛ ekomba nto.’”* 22 Ko ashi akɔ wakakɔnɔ polo ndo ɛlɔ, lo ndjela ɔtɛkɛta wakatama lo tshimbo y’Elisha.

23 Nde akonɛɛ oma lɛkɔ, ko akatshu otsha la Bɛtɛlɛ. Lam’akandatatshɔka lo mboka, ana amɔtshi wakaye oma l’osomba, ko wakatatɛ mbowɔla+ ndo vɔ wakataka vate: “Tshɔka, wɛ kanga diwandji! Tshɔka, wɛ kanga diwandji!” 24 L’ekomelo, nde akakadimɔ, akawaende ko akawadje mananu lo lokombo la Jehowa. Oma laasɔ, ndjaondo 2 ya wadi+ yakatombe oma l’okonda, ko yakaatshatsha ana 42.+ 25 Nde akatetemala la lɔkɛndɔ oma laawɔ otsha lo Dikona dia Karamɛlɛ,+ ndo oma lɛkɔ, nde akakalola la Samariya.