Danyɛlɛ

3 Nkumekanga Nɛbukadinɛza akasale lohingu* la paonyi laki l’otale wa kubita 60* ndo woke wa kubita 6.* Nde akaliemɛ l’oswe wa Dura lo prɔvɛnsɛ ka Babilɔna. 2 Oma laasɔ, nkumekanga Nɛbukadinɛza akatome dui dia vɔ ntshumanya waa satrapɛ, waa prefɛ, waa nguvɛrnɛrɛ, andaki, amombi wa falanga, toshushi, asambodi ndo ɛnɔmbɔdi tshɛ wa lo prɔvɛnsɛ dia vɔ ndja lo osapwelo wa lohingu lakemɛ nkumekanga Nɛbukadinɛza.

3 Ɔnkɔnɛ, waa satrapɛ, waa prefɛ, waa nguvɛrnɛrɛ, andaki, amombi wa falanga, toshushi, asambodi ndo ɛnɔmbɔdi tshɛ wa lo prɔvɛnsɛ wakasangana lo osapwelo wa lohingu lakemɛ nkumekanga Nɛbukadinɛza. Ko vɔ wakemala la ntondo ka lohingu lakemɛ Nɛbukadinɛza. 4 Ombidi wa mbeka akewoya la dui dia wolo ate: “Wambonyodjangɛ, nyu anto, wedja ndo elui w’ɛtɛkɛta, 5 dia lam’ayonyoka wondjo wa dimama, hionge, lɔngɔmbi, lɔsɛsɛ l’atshuku 3, ehomahoma k’eshinga, mpolo ndo dihomahoma dikina tshɛ dia mishiki, nyu pombaka nkusama ndo ntɛmɔla lohingu la paonyi lakemɛ nkumekanga Nɛbukadinɛza. 6 Onto tshɛ lahatokusama ndo lahatɔtɛmɔla ayokashema mbala kakɔ ɔtɔi lo nkuka ka dja.”+ 7 Ɔnkɔnɛ, lam’akoke anto tshɛ wondjo wa dimama, hionge, lɔngɔmbi, lɔsɛsɛ l’atshuku 3, ehomahoma k’eshinga ndo dihomahoma dikina tshɛ dia mishiki, anto tshɛ wedja tshɛ ndo elui w’ɛtɛkɛta tshɛ wakakusama ndo wakatɛmɔla lohingu la paonyi lakemɛ nkumekanga Nɛbukadinɛza.

8 L’etena kɛsɔ, ase Kaladiya amɔtshi wakatombe la ntondo ko wakatɔsɔngwɛ* ase Juda. 9 Vɔ wakatɛ nkumekanga Nɛbukadinɛza vate: “Nkumekanga le, olombake pondjo. 10 Wɛ nkumekanga akadjanga dia onto tshɛ layoka wondjo wa dimama, hionge, lɔngɔmbi, lɔsɛsɛ l’atshuku 3, ehomahoma k’eshinga, mpolo ndo dihomahoma dikina tshɛ dia mishiki, pombaka nkusama ndo ntɛmɔla lohingu la paonyi; 11 ndo ɔnɛ onto tshɛ lahatokusama ndo lahatɔtɛmɔla, pombaka mbikashema lo nkuka ka dja.+ 12 Koko, ekɔ ase Juda amɔtshi wakayasɔnɛ dia nɔmbɔla prɔvɛnsɛ ka Babilɔna: Shadrakɛ, Meshakɛ ndo Abɛdɛ-Nɛngɔ.+ Nkumekanga le, anto asɔ hawokɔlɛnya. Vɔ hawokambɛ nzambi yayɛ ndo wambotona dia ntɛmɔla lohingu la paonyi lakayemɛ.”

13 Ko Nɛbukadinɛza akadɔdɔ la nkɛlɛ ndo akadjanga dia vɔ ndja la Shadrakɛ, Meshakɛ ndo Abɛdɛ-Nɛngɔ. Ko wakaye l’apami asɔ la ntondo ka nkumekanga. 14 Nɛbukadinɛza akawatɛ ate: “Shadrakɛ, Meshakɛ ndo Abɛdɛ-Nɛngɔ, onde mɛtɛ mbahanyakambɛ nzambi+ yami ndo mbamonyotona dia ntɛmɔla lohingu la paonyi lakamemɛ? 15 Kakianɛ, naka nyamboka wondjo wa dimama, hionge, lɔngɔmbi, lɔsɛsɛ l’atshuku 3, ehomahoma k’eshinga, mpolo ndo dihomahoma dikina tshɛ dia mishiki, naka nyekɔ suke dia nkusama ndo ntɛmɔla lohingu lakamemɛ, kete kawɔ. Ko naka nyu ntona ntɛmɔla, nyayokashema mbala kakɔ ɔtɔi lo nkuka ka dja. Naa nzambi kakoka nyotshungola oma l’anya ami?”+

16 Shadrakɛ, Meshakɛ ndo Abɛdɛ-Nɛngɔ wakakadimola nkumekanga vate: “Nɛbukadinɛza le, sho bu l’ohomba wa kosha okadimwelo lo dikambo sɔ. 17 Naka dui sɔ pombaka salema, Nzambi kaso kakambɛso ekɔ la akoka wa totshungola oma lo nkuka ka dja ndo totshungola oma lo anya+ ayɛ, wɛ nkumekanga. 18 Ko oyadi kaanga nde hasadi ngasɔ, nkumekanga le, eya dia sho hatotokambɛ nzambi yayɛ kana ntɛmɔla lohingu la paonyi lakayemɛ.”+

19 Ko Nɛbukadinɛza akomalɛ Shadrakɛ, Meshakɛ ndo Abɛdɛ-Nɛngɔ efula ndo ɛnamelo k’elungi kande kakatshikitana* otsha le wɔ, ko nde akadjanga dia vɔ mpɛtsha nkuka ka dja mbala 7 ndeka woho watowokihɛtshaka. 20 Nde akadjangɛ apami amɔtshi wa wolo oma l’atei w’asɔlayi ande dia vɔ nkeleka Shadrakɛ, Meshakɛ ndo Abɛdɛ-Nɛngɔ ko mbakasha lo nkuka ka dja.

21 Ɔnkɔnɛ, wakakeleka apami asɔ wɔlɔtshi ekutu awɔ, ahɔndɔ awɔ, tofulɛ tawɔ ndo ahɔndɔ awɔ akina tshɛ, ko wakawakasha lo nkuka ka dja. 22 Lam’ele didjango dia nkumekanga diaki wolo efula ndo nkuka kakahɛtɛ lo yoho ya laande, apami wakatatshɔka la Shadrakɛ, Meshakɛ ndo Abɛdɛ-Nɛngɔ wakavu la nyombe ya dja. 23 Koko apami asɔ 3: Shadrakɛ, Meshakɛ ndo Abɛdɛ-Nɛngɔ wakakɔ lo nkuka ka dja wokelekami.

24 Ko nkumekanga Nɛbukadinɛza akoke wɔma ndo mbala kakɔ ɔtɔi nde akemala ndo akambola ɛlɔhɛ ande wa laadiko ate: “Shi apami 3 mbakatakeleki ndo mbakatoki lo dja?” Vɔ wakakadimola nkumekanga vate: “Eelo, nkumekanga.” 25 Nde akate ate: “Ohonyenda, lekɔ lo mɛna apami 4 wakɛndakɛnda aha la kelekama l’atei wa dja, ndo vɔ hawosaleme kɔlɔ ndo pami ka 4 fɔnaka la ɔna aki waa nzambi.”

26 Nɛbukadinɛza akasukana la lokuke la nkuka ka dja ndo akate ate: “Shadrakɛ, Meshakɛ ndo Abɛdɛ-Nɛngɔ, nyu ekambi wa Nzambi+ Kaheme-Tshɛ, nyotombe, nyoye lanɛ!” Shadrakɛ, Meshakɛ ndo Abɛdɛ-Nɛngɔ wakatombe oma l’atei wa dja. 27 Ko waa satrapɛ, waa prefɛ, waa nguvɛrnɛrɛ ndo ɛlɔhɛ wa laadiko waki nkumekanga, wanɛ wakatshumana lɛkɔ+ wakɛnyi dia dja hayosale alemba w’apami akɔ ndooko dikambo;*+ kaanga divo dia l’ɛtɛ awɔ halongodi, ahɔndɔ awɔ hawotshikitanyi ndo ndooko kaanga nsolo ka dja le wɔ.

28 Ko Nɛbukadinɛza akate ate: “Nzambi ka Shadrakɛ, Meshakɛ ndo Abɛdɛ-Nɛngɔ+ lakatomi ondjelo ande dia ndjotshungola ekambi ande atombɔme. Vɔ wakayaɛkɛ le nde ndo vɔ hawokitanyiyisha didjango dia nkumekanga ndo waketawe mvɔ* lo dihole dia kambɛ kana ntɛmɔla nzambi kekina laadiko dia Nzambi+ kawɔ. 29 Ɔnkɔnɛ, dimi lambotondja didjango dia anto tshɛ, wodja kana olui w’ɔtɛkɛta wayɔtɛkɛta kɔlɔ lo dikambo dia Nzambi ka Shadrakɛ, Meshakɛ ndo Abɛdɛ-Nɛngɔ wayohembɔma anya la ekolo ndo mvudu yawɔ yayonga nkomba y’anto tshɛ; nɛ dia ndooko nzambi kekina kele l’akoka wa ntshungola oko nde.”+

30 Oma laasɔ, nkumekanga akadiya* Shadrakɛ, Meshakɛ ndo Abɛdɛ-Nɛngɔ lo ahole wa laadiko lo prɔvɛnsɛ ka Babilɔna.+