Ondaki
3 Dikambo tshɛ diekɔ la etena kadiɔ,
Dui tshɛ diasalema l’ɛse olongo diekɔ la etena kadiɔ:
2 Etena ka mbotɔ la etena ka mvɔ;
Etena ka monɛ la etena ka monola kɛnɛ kakonɛma;
3 Etena ka ndjaka la etena ka nkɔnɔya;
Etena ka mpandjola la etena ka mbika;
4 Etena ka ndela la etena ka mbɔla;
Etena ka monga la lonyangu la etena ka nnɔ lokombe;*
5 Etena ka mbikasha ave la etena ka ntshumanya ave;
Etena ka nkumbatɛ la etena ka mbewɔ nkumbatɛ;
6 Etena ka nyanga la etena ka nshisha;
Etena ka momba la etena ka mbikasha;
7 Etena ka mbatshatsha+ la etena ka ntɛla;
8 Etena ka nanga la etena ka mpetsha;+
Etena ka ta la etena ka wɔladi.
9 Kakɔna kakondja onto lakamba oma lo welo ande tshɛ?+ 10 Dimi lakɛnyi olimu wakasha Nzambi ana w’anto dia vɔ kambaka. 11 Nde akasale ɛngɔ tshɛ dimɛna lo etena katɔ.+ Nde akadje ndo kanyi ya pondjo lo etema awɔ; koko anto haweyaki pondjo olimu wa Nzambi ka mɛtɛ wakandasale oma lo etatelo polo l’ekomelo.
12 Dimi lakayokoma lo mbuta dia ndooko ɛngɔ kele dimɛna le wɔ oleki ngɛnangɛna ndo nsala ɔlɔlɔ lo lɔsɛnɔ+ lawɔ, 13 ndo dia onto tshɛ pombaka ndɛ, nnɔ ndo ngɛnangɛna l’ɔtɛ wa olimu ande tshɛ wa wolo. Ɔsɔ ekɔ woshasha wa Nzambi.+
14 Dimi lambeya dia kɛnɛ tshɛ kakasale Nzambi ka mɛtɛ kayotshikalaka pondjo. Ndooko ka nkotsha kana ka minya oma lɔkɔ. Nzambi ka mɛtɛ akakisale ngasɔ dia anto mbooka wɔma.+
15 Kɛnɛ tshɛ kasalema kamboshilaka salema, ndo kɛnɛ kayosalema kamboshilaka salema;+ koko Nzambi ka mɛtɛ nyangaka kɛnɛ katawesama.*
16 Dimi lakɛnyi nto dikambo nɛ l’ɛse olongo: Akambo wa kɔlɔ waki lo dihole dia losembwe ndo akambo wa kɔlɔ waki lo dihole dia sambo k’ɔlɔlɔ.+ 17 Ko dimi lakate l’otema ami nte: “Nzambi ka mɛtɛ ayolombosha onto ɔlɔlɔ ndo kanga kɔlɔ,+ nɛ dia dikambo tshɛ ndo etsha tshɛ wekɔ la etena kawɔ.”
18 Dimi lakate nto l’otema ami lo dikambo dia ana w’anto dia Nzambi ka mɛtɛ ayowaɛdika ndo ayowaɛnya dia vɔ wekɔ oko waa nyama, 19 nɛ dia kɛnɛ kakomɛ onto kakomɛ ndo nyama; vɔ tshɛ dui ɔtɔi mbaakomɛ.+ Oko wavɔ ɔmɔtshi mbavɔ okina; ndo vɔ tshɛ wekɔ la lomu ɔtɔi.+ Ɔnkɔnɛ onto haleki nyama, nɛ dia tshɛ ekɔ anyanya. 20 Vɔ tshɛ tshɔka lo dihole diakɔ ɔtɔi.+ Vɔ tshɛ wakaye oma lo ditshu+ ndo vɔ tshɛ kalolaka lo ditshu.+ 21 Akɔna eeya kana lomu l’onto mbidɛka la diko ndo kana lomu la nyama polɔka lo nkɛtɛ?+ 22 Ndo dimi lakɛnyi dia ndooko dui diele dimɛna le onto oleki ngɛnangɛna lo olimu ande,+ nɛ dia ɔsɔ kele difuto* diande; dikambo akɔna akoka mbokimanyiya dia mɛna kɛnɛ kayotomba l’ɔkɔngɔ wa nde ambotshɔ?+