Etsha

21 L’ɔkɔngɔ wa nkakitɔna la wɔ, sho takete dia ndjale ko takasembɔ tɔɔ la lɔkɛndɔ ndo takakome la Kɔsɛ, la wedi a pindju takakome la Rodɛsɛ ndo oma lɛkɔ, takakome la Patara. 2 Lam’akatatane masuwa wakatatenyanyaka otsha la Fenikiya, takɔtɔ lɔkɔ ko takatshu. 3 Lam’akatɛnyi disɛnga dia Kupiro, takaditshike lo lonya la lɔmɔsɔ* ndo takatshu la masuwa otsha la Suriya ndo takatemala la Tura, lɛnɛ akahombe tɔlɔngɔma diangɔ diaki lo masuwa lɛkɔ. 4 Sho takayange ambeki ndo takaatane ko takatshikala nshi 7 lɛkɔ. Koko l’ekimanyielo ka nyuma, vɔ wakatɛ Pɔɔlɔ la kiɔkɔmɛ tshɛ diaha nde mama ekolo la Jɛrusalɛma.+ 5 L’ɔkɔngɔ wa sho ntshikala lɛkɔ l’edja ka nshi shɔ, takatombe ndo takatetemala la lɔkɛndɔ, koko vɔ tshɛ, kaamɛ la wamato ndo ana wakatotshindɛ polo l’andja w’osomba. Takake adwe ndo takalɔmbɛ l’omamu w’ashi, 6 takalakana la wɔ. Oma laasɔ, takɔtɔ lo masuwa ndo vɔ wakakalola otsha lawakawɔ.

7 Sho takashidiya lɔkɛndɔ laso oma la Tura ndo takakome la Pɔtɔlɛmayi, ko takasha anangɛso mɔyɔ ndo takatshikala kaamɛ la wɔ lushi 1. 8 La wedi a pindju, takonɛ ndo takakome la Kayisariya ndo takɔtɔ lo luudu laki osambisha Filipɛ, ɔmɔtshi l’atei w’apami 7+ wakasɔnama ko takahange lakande. 9 Pami kɛsɔ aki la ana wa wamato 4 wahatatshukama* wakataka prɔfɛsiya.+ 10 Koko l’ɔkɔngɔ wa sho ntshikala laawɔ nshi kambe, omvutshi ɔmɔtshi w’oma la Judeya lokombo lande Angabo+ akaye. 11 Ko nde akaye le so ndo akɔshi oya waki Pɔɔlɔ ko akayakeleka l’ekolo ndo l’anya ndo akate ate: “Nyuma k’ekila kekɔ lo mbuta ɔnɛ: ‘Nganɛ mbayokeleka ase Juda kanga oya ɔnɛ la Jɛrusalɛma+ ndo mbayondokimɔma l’anya w’ase wedja.’”+ 12 Lam’akatoke ngasɔ, sho la wanɛ waki lo dihole sɔ takatatɛ nsɛngasɛnga Pɔɔlɔ diaha nde ntshɔ la Jɛrusalɛma. 13 Koko Pɔɔlɔ akate ate: “Lande na kalelanyu ndo kayanganyu ntɛwɔla* yɛdikɔ yami? Nyeye dia dimi lekɔ suke dia mindama lo lokanu ndo dia mvɔ la Jɛrusalɛma lo lokombo la Nkumadiɔndjɔ Yeso.”+ 14 Lam’ele nde kombetawɔ, sho takatshike mboshimba* ndo takate shate: “Lolango la Jehowa* latshame.”

15 L’ɔkɔngɔ wa nshi shɔ, takayalɔngɔsɔla dia ntshɔ ko takonɛ otsha la Jɛrusalɛma. 16 Koko ambeki amɔtshi w’oma la Kayisariya wakatshu kaamɛ la so dia tɔtɔla laka Manasɔna k’ose Kupiro laki l’ɔnɔngɔ w’ambeki wa ntondo lɛnɛ akatahombe tohanga. 17 Lam’akatakome la Jɛrusalɛma, anangɛso wakatolongola l’ɔngɛnɔngɛnɔ. 18 Koko la wedi a pindju, Pɔɔlɔ akatshu la so le Jakɔba+ ndo dikumanyi tshɛ diaki laawɔ. 19 Ko nde akawasha mɔyɔ ndo akatatɛ mbakɔndɔlɛ akambo tshɛ wakasalɛ Nzambi ase wedja lo tshimbo y’olimu ande.

20 Lam’akawoke akambo asɔ, vɔ wakatatɛ ntombola Nzambi, ko wakawotɛ vate: “Ɔnangɛso Pɔɔlɔ, wɛ ekɔ lo mɛna dia nunu di’ase Juda waya ambetawudi, ndo vɔ tshɛ wekɔ lo ndjela Ɛlɛmbɛ+ l’ohetoheto tshɛ. 21 Koko vɔ wakoke vate vate lo dikambo diayɛ ɔnɛ wɛ ambetsha ase Juda tshɛ wele l’atei w’ase wedja wetshelo w’ɛtɔlɔki wendana la Mɔsɛ, awatɛ diaha vɔ minya anawɔ mpota ndo diaha vɔ ndjela mbekelo yakashikikɛma.+ 22 Ko ahomba salema lo dikambo sɔ? Lo mɛtɛ vɔ wayoka dia wɛ ekɔ lanɛ. 23 Ɔnkɔnɛ, sala dui nɛ diakotɛso: Tekɔ la apami 4 wakatshike dɔkɔlɔkɔ. 24 Ɔsa apami akɔ ndo yaɛdia kaamɛ la wɔ lo ndjela ɛlɛmbɛ ndo futa kɛnɛ kahombama dia vɔ minya avo. Ko anto tshɛ wayeya dia vate vate yakawoke lo dikambo diayɛ bu mɛtɛ ndo ɔnɛ wɛ ekɔ lo nkɛndakɛnda lo yoho ya dimɛna ndo wɛ ekɔ lo nkitanyiya Ɛlɛmbɛ.+ 25 Lo dikambo dia ambetawudi w’ase wedja, takawatomɛ mukanda wɛnya yɛdikɔ yakatɔshi dia vɔ pombaka nsɛka diangɔ diakawalambola dikishi,+ dikila,+ nyama y’esena*+ ndo awui wa mindo wa dieyanelo.”*+

26 Ko la wedi a pindju, Pɔɔlɔ akɔshi apami akɔ, akayaɛdia kaamɛ la wɔ+ lo ndjela ɛlɛmbɛ, ko nde akɔtɔ lo tɛmpɛlɔ dia mbewoya etena kakahombe nshi ya wɛdiamelo ɔsɔ nshila ndo etena kakahombe nambɔma olambo dikambo dia ɔmɔmɔ la l’atei awɔ.

27 Lam’aki nshi 7 suke la nshila, ase Juda w’oma la Aziya wakawɛnyi lo tɛmpɛlɔ ndo wakatatɛ mbidja ofukutanu l’atei w’olui w’anto, ko vɔ wakawonde, 28 wata la dui dia wolo vate: “Ase Isariyɛlɛ, nyoyotokimanyiya! Pami ketsha anto tshɛ l’ahole tshɛ akambo wa kɔlɔ lo dikambo dia wodja aso, dia Ɛlɛmbɛ aso ndo dia dihole nɛ nde ɔnɛ. Ndo kɛnɛ koleki tshɛ ele, nde ambɔtshiya ase Ngirika lo tɛmpɛlɔ ndo ambodja dihole di’ekila nɛ mindo.”+ 29 Nɛ dia vɔ wakawɛnyi ntondo nde la Tɔrɔfimo+ k’ose Ɛfɛsɔ l’osomba, ko wakafɔnya dia Pɔɔlɔ ambowɔtshiya lo tɛmpɛlɔ. 30 Ofukutanu wakɔtɔ l’osomba w’otondo ndo anto wakatshumana, ko wakakimɛ Pɔɔlɔ ndo wakootondja l’andja wa tɛmpɛlɔ. Mbala kakɔ ɔtɔi nkuke yakadihama. 31 Lam’akawayangaka dia mbodiaka, lokumu lakakome le kɔmanda k’olui w’asɔlayi ɔnɛ Jɛrusalɛma y’otondo yaya l’ofukutanu. 32 Ko nde akɔshi asɔlayi la ewandji awɔ ko wakatshu la lowango otsha le wɔ. Lam’akawɛnyi kɔmanda k’asɔlayi kaamɛ la asɔlayi, vɔ wakatshike nkɔmɔla Pɔɔlɔ.

33 Oma laasɔ, kɔmanda k’asɔlayi akasukana, akookimɛ ndo akate dia vɔ mbokeleka mɔlɔla 2,+ ko nde akawombola eende ndo kɛnɛ kakandasale. 34 Koko, anto amɔtshi l’atei w’olui w’anto wakahangɔhangɔka woho ɔnɛ, akina woho okina. Lam’ele kɔmanda kokoka mboka ndooko dui di’oshika l’ɔtɛ wa lofunge, nde akate dia vɔ ntshɔ la nde lo mpango k’asɔlayi. 35 Lam’akandakome lo kibandola, asɔlayi wakawɛmbɛ nɛ dia olui w’anto waki ngala efula, 36 dikambo olui w’anto wakayatetemalaka mbayela wayahangɔhangɔ vate: “Diakande!”

37 Lam’akiwɔ suke la mbɔɔtshiya lo mpango k’asɔlayi, Pɔɔlɔ akatɛ kɔmanda k’asɔlayi ate: “Onde dimi koka kotɛ dui dimɔtshi?” Nde akate ate: “Onde wɛ koka ntɛkɛta lo Grɛkɛ? 38 Shi wɛ kele ose Edjibito lakatɔmbɔsha anto atete nshi efula, ndo lakalɔmbɔla apami nunu nɛi (4 000) waki la tokuwa otsha l’oswe?” 39 Ko Pɔɔlɔ akate ate: “Lo mɛtɛ, dimi lekɔ ose Juda+ la la Taraso+ ka la Kilikiya, osomba weyama efula. Ɔnkɔnɛ, lambokɔlɔmba dia wɛ mbishami lotshungɔ dia dimi mbutɛ anto dui.” 40 L’ɔkɔngɔ wa kɔmanda mbosha lotshungɔ, Pɔɔlɔ akemala lo kibandola, akɛnya anto la lonya dia vɔ mbɔlama. Lam’akɔlama anto yɔɔ, nde akawatɛ lo ɔtɛkɛta wa Hɛbɛru+ ate: