2 Samuɛlɛ
1 L’ɔkɔngɔ wa nyɔi ka Saolo, lam’akakalola Davidɛ oma la tɔlɛndja* ase Amalɛka, Davidɛ akatshikala la Zikilangɛ+ l’edja ka nshi 2. 2 Lushi la 3, pami kɛmɔtshi akaye oma lo mpango ka Saolo ele l’ahɔndɔ wambatatɛ ndo akatɛ ditshu l’ɔtɛ. Lam’akandakome le Davidɛ, nde akayakɔsha la nkɛtɛ ndo akakusama.
3 Davidɛ akawombola ate: “Oma lende ayaaye?” Nde akakadimola ate: “Oma lo mpango k’ase Isariyɛlɛ kayamalawɔ.” 4 Davidɛ akawombola ate: “Lam’alangayɛ, ombutɛ, ngande waketshi akambo?” Ko nde akate ate: “Anto wambotolawɔ oma lo ta ndo anto efula wakakalemi, wakavwe. Kaanga Saolo nde la ɔnande Jɔnatana wakavwe.”+ 5 Ko Davidɛ akambola ɔlɔngɔ akɔ wakawela losango ate: “Ngande weyayɛ dia Saolo nde la ɔnande Jɔnatana wakavwe?” 6 Ɔlɔngɔ akɔ akakadimola ate: “Oko ahoma, dimi laki lo Dikona dia Ngiliboa,+ mɛnyi ko Saolo ɛkami lo dikɔnga diande ndo pusupusu la ambahemi wa mfalasa wakakomi lalende.+ 7 Lam’akandakadimwe ndo lam’akandamɛnyi, nde akambele ko lakatshi nte: ‘Dimi ɔnɛ!’ 8 Nde akamimbodi ate: ‘Wɛ na?’ Dimi lakookadimodi nte: ‘Dimi lekɔ ose Amalɛka.’+ 9 Ko nde akatshi ate: ‘Lam’alangayɛ, ombaheme laadiko kele ondjake, nɛ dia lekɔ la paa k’efula, koko leke la lɔsɛnɔ.’ 10 Ko dimi lakawahemi laadiko ndo lakoodiaki,+ nɛ dia lakeyaki dia nde hayokoka nsɛna nto l’ɔkɔngɔ wa nde ndjakɔsha ndo ndjahomuya ngasɔ. Oma laasɔ, dimi lakɔshi dɛmbɔ dia nkoso* diaki l’ɔtɛ ande ndo ɔkɔma waki lo lonya lande, ko lakela lanɛ le yɛ wɛ nkumɛmi.”
11 Ko Davidɛ akaatshatsha ahɔndɔ ande ndo apami tshɛ waki kaamɛ la nde wakaatshatsha ahɔndɔ awɔ. 12 Vɔ wakayakiyanya efula, wakalele ndo wakakile mbo ya ndɛ+ polo la dikɔlɔ l’ɔtɛ wa Saolo, l’ɔtɛ wa ɔnande Jɔnatana, l’ɔtɛ w’anto waki Jehowa ndo l’ɔtɛ wa nkumbo k’Isariyɛlɛ,+ nɛ dia vɔ wakadiakema la lokuwa la ta.
13 Davidɛ akambola ɔlɔngɔ wakawela losango lakɔ ate: “Wɛ ose na?” Nde akate ate: “Dimi ɔna ɔngɛndangɛnda ɔmɔtshi w’ose Amalɛka.” 14 Ko Davidɛ akawotɛ ate: “Lande na kahayoki wɔma mbahɛ okitami wa Jehowa+ lonya dia mbodiaka?” 15 Ko Davidɛ akelɛ ɔlɔngɔ a pami ɔmɔtshi ndo akawotɛ ate: “Sukana kele kɔmɔlande.” Nde akɔɔkɔmɔla ko nde akavu.+ 16 Davidɛ akawotɛ ate: “Dikila diayɛ diekɔ l’ɔtɛ ayɛ hita, nɛ dia onyɔ ayɛ hita wakakofundji lo mbuta ɔnɛ: ‘Dimɛ kakadiaki okitami wa Jehowa.’”+
17 Oma laasɔ, Davidɛ akembe lembo l’otanda* lɔnɛ dikambo dia Saolo nde la ɔnande Jɔnatana+ 18 ndo akate dia ase Juda pombaka mbeka lembo lakɔ l’otanda lelamɛ ɔnɛ “Ota” lofundami lo dibuku dia Jashara+ ɔnɛ:
19 “Isariyɛlɛ le, olangala ambokalema odo lo ahole anyu wa la diko.+
Ande woho wambɔkɔ kanga wolo lee!
20 Tanyotake dui diakɔ la Ngata;+
Tanyodisanyake lo toshinga ta Ashikɛlɔna,
Diaha ana wa wamato w’ase Filistiya ngɛnangɛna,
Diaha ana wa wamato wakote apami waki kominya mpota nembɔlembɔ l’ɔlɔ.
21 Akona wa la Ngiliboa+ le,
Lɔpɔpɔ kana mvula atɔlɔke le nyu,
Dikambɔ dianyu diatotondjake weshasha w’ekila,+
Nɛ dia engawo ka kanga wolo kambɔnywama lɛkɔ,
Engawo kaki Saolo kaya bu nto engawo k’okitami w’esɔ.
22 Oma lo dikila dia wanɛ wakadiakema, oma lo wata w’akanga wa wolo,
Ota waki Jɔnatana kokalolaka ɛkɔngɔkɔngɔ,+
Ndo lokuwa la ta laki Saolo kokalolaka aha la ntondoya.+
23 Saolo nde la Jɔnatana+ wakalanganaka ndo wakokanaka ngandji* lam’akiwɔ la lɔsɛnɔ,
Ndo lo nyɔi, vɔ kokakitɔna.+
24 Ana wa wamato w’Isariyɛlɛ le, nyolele Saolo,
Ɔnɛ lakanyɔlɔtshaka ahɔndɔ wa beela k’efula ndo wa nɛmɔ,
Ɔnɛ lakadjaka dɛngalɛnga dia paonyi lo ahɔndɔ anyu.
25 Ande woho wambotɔkɔ ose wolo lo ta lee!
Odo wa Jɔnatana wambokalema lo ahole anyu wa la diko!+
26 Jɔnatana ɔnalengo le, lekɔ la lɔkɔnyɔ lo dikambo diayɛ;
Wɛ aki la nɛmɔ di’efula le mi.+
Ngandji kayɛ le mi kaki diambo ndeka ngandji ka wamato.+
27 Ande woho wambɔkɔ kanga wolo lee!
Ndo woho wambolanyema dihomɔ dia ta!”