Etsha
12 Oya lo nshi shɔ, nkumekanga Hɛrɔdɛ akatatɛ mpɛnyahɛnya anto amɔtshi wa l’etshumanelo.+ 2 Nde akadiake Jakɔba y’ɔnango Joani+ la lokuwa la ta.+ 3 Lam’akandɛnyi dia dikambo sɔ diakangɛnyangɛnya ase Juda, nde akande ndo Petero. (Ɔsɔ aki lo nshi ya Mapa waha la Wodoya.)+ 4 Nde akawonde, akawodje lo lokanu+ ndo akakitsha elui 4 w’asɔlayi dia mbolamaka. Olui l’olui waki l’asɔlayi 4, ndo nde akalangaka mbotondja* la ntondo k’anto l’ɔkɔngɔ wa dambo di’Elekanelo. 5 Ɔnkɔnɛ Petero akatshikala lo lokanu, koko ase etshumanelo wakalɔmbaka Nzambi wolo lo dikambo diande.+
6 L’otsho wa lushi laki Hɛrɔdɛ suke la mbotondja, Petero akalale okelekami mɔlɔla 2 l’atei w’asɔlayi 2 wakoolamaka ndo alami wakalamaka soko dia lokanu. 7 Koko nyolonge, ondjelo wa Jehowa* akemala laawɔ+ ndo osase wakahɛtɛ lo luudu la lokanu. Nde akanyinginya Petero lo lohandju, akawemula, awotɛ ate: “Emɔ esadi!” Ko mɔlɔla wakakelekɔ oma l’anya ande.+ 8 Ondjelo akawotɛ ate: “Lɔta ahɔndɔ* la sabata.” Nde akasale dui sɔ. Ko ondjelo akawotɛ nto ate: “Lɔta dihɔndɔ diayɛ dia laadiko kele ondjele.” 9 Ko Petero akatombe oma lo luudu la lokanu ndo akatawoyelaka, koko nde kombeya dia akambo wakasalemaka l’ekimanyielo ka ondjelo waki mɛtɛ. Nde akafɔnyaka dia nde aki lo mɛna ɛnɛlɔ. 10 Vɔ wakalekana olui wa ntondo w’alami ndo wa 2, ko wakakome la soko diaki la lokuke la mbolo diakatɔlaka otsha l’osomba, ko lokuke lakadihɔ lɔamɛ. L’ɔkɔngɔ wa vɔ ntomba, vɔ wakasembɔ lo shinga mɔtshi, ko mbala kakɔ ɔtɔi ondjelo akootshike. 11 Ko Petero akakashimɔ ndo akate ate: “Kakianɛ, dimi lamboshikikɛ dia Jehowa* akatomi ondjelo ande ndo nde akatshungodi oma l’anya wa Hɛrɔdɛ ndo oma lo kɛnɛ tshɛ kakalongamɛka ase Juda.”+
12 L’ɔkɔngɔ wa nde nshikikɛ dikambo sɔ, nde akatshu lo luudu la Mariya wa nyango Joani lakawelɛka nto Makɔ,+ lɛnɛ akasangana ndo akalɔmbaka olui w’anto. 13 Lam’akandakɔkɔla lo lokuke la soko dia lokombo, ose olimu ɔmɔtshi wa womoto lokombo lande Roda akaye ndjenda. 14 Ndo lam’akandoke dui dia Petero, nde aki l’ɔngɛnɔngɛnɔ wa mamba ko nde kondjihola lokuke, koko akalawɔ otsha l’etei dia tota ɔnɛ Petero mbele la soko. 15 Vɔ wakawotɛ vate: “Wɛ ekɔ lo mɛna tɔbɛdi.” Koko nde akatetemala nshikikɛ kɛnɛ kakandate. Ko vɔ wakate ɔnɛ: “Ɔsɔ ekɔ ondjelo ande.” 16 Koko Petero akatetemala nkɔkɔla. Lam’akawadihola lokuke, vɔ wakawɛnyi ndo wakaambe efula. 17 Ko nde akawaɛnya la lonya dia vɔ mbɔlama ndo nde akawatɛ akambo tshɛ wendana la woho wakootondja Jehowa* oma lo lokanu ndo nde akate ate: “Nyotote Jakɔba+ la anangɛso akambo asɔ.” Ko nde akatombe ndo akatshu dihole dikina.
18 Lam’akahotɔ wonya, lofunge la mamba lakonge le asɔlayi wambɔna kɛnɛ kambokomɛ Petero. 19 Hɛrɔdɛ akooyange ahole tshɛ ndo lam’ele nde kombɛna, nde akalombosha alami ndo akate dia vɔ mbasha dilanya.+ Ko nde akaholɔ oma la Judeya otsha la Kayisariya ndo akatotshikala lɛkɔ lo tshanda mɔtshi.
20 Hɛrɔdɛ akomalɛ* ase Tura la ase Sidɔna. Ko vɔ tshɛ kaamɛ wakaye le nde ndo l’ɔkɔngɔ wa vɔ mbetawoya Balasto laki l’ɔkɛndɛ wa mendaka awui wa la ngelo wa nkumekanga,* vɔ wakayange wɔladi nɛ dia wodja awɔ wakakondjaka mbo ya ndɛ oma lo wodja waki nkumekanga. 21 Lushi lɔmɔtshi lakashikikɛma, Hɛrɔdɛ akalɔtɛ ahɔndɔ wa lowandji, akadjasɛ lo dihole dia kilombo ndo akawasha sawo dia lo sɛkɛ. 22 Ko anto wakasangana wakatatɛ mbuta la dui dia wolo vate: “Ɔsɔ ekɔ dui dia nzambi, koko aha dui di’onto!” 23 Mbala kakɔ ɔtɔi, ondjelo wa Jehowa* akɔɔkɔmɔla, nɛ dia nde kombisha Nzambi lotombo. Ɔnkɔnɛ, nkuso yakawɔtɔ lo demba ko nde akavu.
24 Ko ɔtɛkɛta wa Jehowa* wakatetemala mpama ndo pandjɔnɛ.+
25 L’ɔkɔngɔ wa Barnabasɛ+ nde la Saolo nshidiya nkahanya diangɔ la Jɛrusalɛma,+ vɔ wakakalola ndo wakatshu kaamɛ la Joani+ lakelamɛka nto Makɔ.