2 Nkumi ya dikanga

10 Ahaba+ aki l’ana w’apami 70 la Samariya. Ko Jehu akafunde mikanda ndo akatome la Samariya, le ewandji wa la Jezɛrɛlɛ, le dikumanyi+ ndo le wanɛ wakalamaka ana wa Ahaba* ate: 2 “Lam’ayonyolongola mukanda ɔnɛ, ana wa nkumɛnyu kawonge kaamɛ la nyu, kaamɛ ndo pusupusu ya ta, mfalasa, osomba ɔmɔtshi wodingami la mpele ndo dihomɔ dia ta. 3 L’atei w’ana wa nkumɛnyu, kanyɔsɔnɛ ɔna loleki dimɛna ndo loleki ɔlɔlɔ* kele kanyowodjashiya lo kiti ka lowandji ka she. Oma laasɔ, ko nyu ndɔsha dikambo dia luudu la nkumɛnyu.”

4 Koko vɔ wakoke wɔma ko wakate vate: “Naka nkumi ya dikanga 2 kokoka nshika ekolo la ntondo kande,+ kete hoke sho?” 5 Ko omendji wa luudu l’owandji,* nguvɛrnɛrɛ k’osomba, dikumanyi ndo alami wakatomɛ Jehu dikɛndji ɔnɛ: “Sho tekɔ ekambi ayɛ ndo tayosala kɛnɛ tshɛ katotɛyɛ. Hatotetɛ ndooko onto nkumekanga. Sala kɛnɛ tshɛ kele ɔlɔlɔ lo washo ayɛ.”

6 Oma laasɔ, nde akaafundɛ mukanda wa 2 ate: “Naka nyekɔ anto ami ndo naka nyu nangaka kitanyiyami, kete nyombela ɛtɛ w’ana w’apami wa nkumɛnyu ndo kanyoye le mi loyi wonya wa nganɛ la Jezɛrɛlɛ.”

Ana w’apami 70 wa nkumekanga waki le anto wa lokumu wa l’osomba wakawaodiaka. 7 Kam’akakome mukanda akɔ le wɔ, vɔ wakɔshi ana wa nkumekanga ko wakaadiake, apami+ 70 ndo vɔ wakadje ɛtɛ awɔ lo asaka ko wakootomɛwɔ la Jezɛrɛlɛ. 8 Ɔkɛndji akakome ko akawotɛ ate: “Vɔ wambela ɛtɛ w’ana wa nkumekanga.” Ko nde akate ate: “Nyowakitsha lo elui 2 la soko di’osomba polo la pindju.” 9 Lam’akandatombe la pindju, nde akemala la ntondo k’anto tshɛ ko akate ate: “Nyu keema la onongo.* Lo mɛtɛ, dimi lakɔtwɛ nkumɛmi sheke ndo lakoodiake;+ ko odiaki anto anɛ tshɛ? 10 Ɔnkɔnɛ nyeye dia ndooko dui diaki Jehowa diendana la kɛnɛ kakate Jehowa lo dikambo di’ase luudu la Ahaba diahatokotshama,*+ ndo Jehowa ambosala kɛnɛ kakandate lo tshimbo y’okambi ande Elidja.”+ 11 Ndo nto, Jehu akadiake ase luudu la Ahaba tshɛ wakatshikala la Jezɛrɛlɛ, kaamɛ la anto ande wa lokumu tshɛ, asekande ndo ɛlɔmbɛdi+ ande polo ndo ndooko onto ande lakatshikala la lɔsɛnɔ.+

12 Oma laasɔ, nde akonɛɛ ko akatshu la Samariya. Luudu la alami w’ɛkɔkɔ* lakawakelekaka ɛkɔkɔ laki lo mboka. 13 Jehu akahomana la anango Ahaziya+ nkumekanga ka Juda laawɔ, ko nde akawambola ate: “Nyu waa na?” Vɔ wakate vate: “Sho tekɔ anango Ahaziya ndo tekɔ lo tatshu dia tombola kana ana wa nkumekanga ndo ana wa nyango nkumekanga wekɔ tshɛ ki.” 14 Mbala kakɔ ɔtɔi nde akate ate: “Nyowande wasɛna!” Ko vɔ wakawande wasɛna ndo wakaadiake suke la difuku di’ashi dia lo luudu la alami w’ɛkɔkɔ, apami 42. Nde kotshika kaanga onto l’atei awɔ la lɔsɛnɔ.+

15 Lam’akandonɛɛ oma laawɔ, nde akahomana la Jɛhɔnadaba+ ɔna Rɛkabɛ+ lakayayaka dia ndjohomana la nde. Lam’akandawosha mɔyɔ,* nde akawotɛ ate: “Onde otema ayɛ wekɔ tshɛ* le mi oko wele otema ami kaamɛ la otema ayɛ?”

Jɛhɔnadaba akakadimola ate: “Eelo.”

Jehu akate ate: “Naka ngasɔ, ombisha lonya layɛ.”

Ko nde akawosha lonya lande ndo Jehu akawodiya lalende lo pusupusu. 16 Oma laasɔ, nde akate ate: “Yete kaamɛ la mi kele tende woho wahametawɔ di’onto nsɛmanɛ la* Jehowa.”+ Ko vɔ wakawahenya lalende lo pusupusu kande ka ta. 17 Oma laasɔ, nde akakome la Samariya ko akadiake ase luudu la Ahaba tshɛ wakatshikala la Samariya polo nde mbashila oshiki,+ lo ndjela ɔtɛkɛta wa Jehowa wakandatɛ Elidja.+

18 Ndo nto, Jehu akasanganya anto tshɛ ko akawatɛ ate: “Ahaba akatɛmɔlaka Baala yema tshitshɛ,+ koko Jehu ayowɔtɛmɔla lo yɛdikɔ y’efula. 19 Ɔnkɔnɛ, nyele amvutshi tshɛ wa Baala,+ atɛmɔdi ande tshɛ ndo ɛlɔmbɛdi+ ande tshɛ lalemi. Tanyetawɔke dia kaanga 1 ntshikala, nɛ dia lekɔ la olambo wa woke wa nambola Baala. Onto tshɛ lahatonga laawɔ, hatotshikala la lɔsɛnɔ.” Koko Jehu akasalaka akambo la lokeso dia ndjaka atɛmɔdi wa Baala.

20 Jehu akatetemala mbuta ate: “Nyewoya* losanganya la laande dikambo dia Baala.” Ko vɔ wakaliewoya. 21 L’ɔkɔngɔ wa laasɔ, Jehu akatome dui lo Isariyɛlɛ w’otondo, ko atɛmɔdi tshɛ wa Baala wakaye. Ndooko kaanga 1 lakatshikala laki kondja. Vɔ wakɔtɔ lo luudu* la Baala,+ ko luudu la Baala lakalole oma lo koma nyɛ polo lo koma kina. 22 Nde akatɛ ɔnɛ lakalamaka dihole diengolawɔ ahɔndɔ ate: “Tondja ahɔndɔ dikambo dia atɛmɔdi wa Baala tshɛ.” Ko nde akaatondjɛ ahɔndɔ. 23 Oma laasɔ, Jehu nde la Jɛhɔnadaba+ ɔna Rɛkabɛ wakɔtɔ lo luudu la Baala. Ko nde akatɛ atɛmɔdi wa Baala ate: “Nyoshishime dimɛna dia menda kana ndooko ɔtɛmɔdi wa Jehowa lanɛ, paka atɛmɔdi wa Baala ato.” 24 L’ekomelo, vɔ wakɔtɔ dia nambola elambo wa lotshumba ndo elambo ekina. Jehu akemadia apami ande 80 l’andja ndo akate ate: “Naka 1 ɔmɔtshi l’atei wa wanɛ wamomokimɔ lo anya anyu ambolawɔ, kete nsɛnɔ yanyu mbayonga lo dihole dia lɔsɛnɔ lande.”*

25 Kam’akandashidiya nambola olambo wa lotshumba, Jehu akatɛ alami* ndo ewandji w’asɔlayi ate: “Nyɔtɔ kele nyaadiake! Tanyetawɔke dia kaanga onto 1 ndawɔ!”+ Ko alami ndo ewandji w’asɔlayi wakaadiake la lokuwa la ta ndo wakawaokɛ l’andja, ko wakatetemala polo lo dihole di’ekila* dia l’etei ka luudu la Baala. 26 Oma laasɔ, vɔ wakatondja dimɛta dia l’ave+ diaki lo luudu la Baala, ko wakaditshumbe tshɛ.+ 27 Vɔ wakanyukola kimɛta ka l’ave+ ka Baala ndo vɔ wakanyukola luudu la Baala,+ ko wakalietɛ nkomba oko welɔ polo ndo ɛlɔ.

28 Ngasɔ mbakanya Jehu ɔtɛmwɛlɔ wa Baala oma l’Isariyɛlɛ. 29 Koko Jehu kotshika pɛkato yakakonya Jɛrɔbɔama ɔna Nebatɛ Isariyɛlɛ dia nsala lo kɛnɛ kendana la yana ya ngɔmbɛ ya paonyi yaki la Bɛtɛlɛ ndo la Danɛ.+ 30 Ɔnkɔnɛ Jehowa akatɛ Jehu ate: “Lam’ele wɛ ambosala dimɛna ndo ambosala kɛnɛ kele ɔlɔlɔ lo washo ami lo nkotsha kɛnɛ tshɛ kaki lo otema ami kakamalange salɛ ase luudu la Ahaba,+ nɔnga 4 y’anayɛ wayodjasɛ lo kiti ka lowandji ka lo Isariyɛlɛ.”+ 31 Koko Jehu kondjalama dia nkɛndakɛnda lo Ɛlɛmbɛ wa Jehowa Nzambi k’Isariyɛlɛ la otema ande tshɛ.+ Nde kotshika pɛkato yakakonya Jɛrɔbɔama Isariyɛlɛ dia nsala.+

32 Lo nshi shɔ, Jehowa akatatɛ mbata* Isariyɛlɛ tɛtshi tɛtshi. Hazaɛlɛ akatetemala mbalɔsha lo ɛtshi ka nkɛtɛ k’Isariyɛlɛ+ k’otondo, 33 oma lo Jɔrdana lo ɛstɛ, ɛtshi ka nkɛtɛ ka Ngiliyadɛ k’otondo, mbuta ate k’aseka Ngada, aseka Rubɛna ndo aseka Manase,+ oma la Aroɛrɛ wele suke la Okidi wa Aranɔna polo la Ngiliyadɛ ndo la Bashana.+

34 Etenyi kekina k’ɔkɔndɔ wa Jehu, kɛnɛ tshɛ kakandasale ndo wolo ande tshɛ, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ? 35 Oma laasɔ, Jehu aketama dia momuya kaamɛ la watshɛnde ndo wakookundɛ la Samariya, ko ɔnande Jɛhɔahaza+ akayala nkumekanga lo dihole diande. 36 Jehu akolɛ Isariyɛlɛ oma la Samariya l’edja k’ɛnɔnyi 28.