Ondaki
4 Dimi lakakadimola yimba yami nto otsha lo etsha tshɛ wa dihɛnyɔki wasalema l’ɛse olongo. Dimi lakɛnyi asɔyi w’asoyami, ko ndooko onto lakikɔ dia mbasamba.+ Ndo asoyanyi awɔ waki la wolo, ko ndooko onto lakikɔ dia mbasamba. 2 Ndo dimi lakandola edo wamboshilaka mvɔ lo dihole dia wanɛ wasɛna weke la lɔsɛnɔ.+ 3 Ndo l’atei awɔ tshɛ ɔnɛ loleki dimɛna ele ɔnɛ lahatotɔ,+ lahatɛnyi etsha wa kɔlɔ wasalema l’ɛse olongo.+
4 Ndo dimi lakɛnyi welo w’efula* ndo diewo dia nkamba olimu diaya oma lo shɛmanedi yele lam’asa anto;+ dui sɔ nto diekɔ anyanya oko onto latatshanya lɔpɛpɛ.
5 Kanga enginya kɔmaka anya ande etena katashishɔ demba diande.*+
6 Ndeka dimɛna monga la yema ya diomuyelo tshitshɛ* lo dihole dia monga la olimu efula* wa wolo ko tatshanyaka lɔpɛpɛ.+
7 Dimi lakadje yimba yami lo ɛnyɛlɔ kekina kele anyanya l’ɛse olongo: 8 Ekɔ onto ɔmɔtshi lele ndamɛ, bu la ɔngɛnyi, bu la ɔna ndo bu la ɔnango, koko olimu ande tshɛ wa wolo bu l’ekomelo. Washo ande hawolotshama la ɛngɔnyi.+ Ko onde nde ndjambolaka ɔnɛ: ‘Akɔna akambɛmi olimu wa wolo ɔnɛ kayadimami* diangɔ di’ɛlɔlɔ’?+ Dui sɔ nto diekɔ anyanya ndo olimu wa shɔkɔ.+
9 Anto 2 ndeka onto 1,+ nɛ dia vɔ wekɔ la difuto* dia dimɛna l’ɔtɛ w’olimu awɔ wa wolo. 10 Nɛ dia naka ɔmɔtshi l’atei awɔ ambɔkɔ, okina kokaka nkimanyiya osekande. Ko kakɔna kayotomba naka onto ambɔkɔ ko nde bu la onto lookimanyiya?
11 Ndo nto, naka anto 2 mbetama kaamɛ, vɔ wayɔhɛtshahɛtshanyaka, ko ngande wakoka onto lele ndamɛ ndjahɛtshahɛtsha? 12 Onto ɔmɔtshi mbeyaka nɛndja onto lele ndamɛ, koko anto 2 wele kaamɛ kokaka mboleka wolo. Ndo oshinga wele la ɛkɔdi 3 hawokoke mpembɔ esadi.
13 Ose wola wele ɔna la lomba ndeka opalanga wele nkumekanga k’enginya,+ ɔnɛ laya bu la yimba efula dia mpokamɛ ɔhɛmwɛlɔ.+ 14 Nɛ dia nde* tombaka oma lo lokanu dia tonga nkumekanga,+ kaanga mbele lo lowandji l’onto akɔ nde akotɔ wola.+ 15 Dimi lakasɛdingola wanɛ tshɛ wele la lɔsɛnɔ weteta l’ɛse olongo, mbidja ndo woho weta akambo le ɔhɛna wa dikɛnda wakita onto okina. 16 Kaanga mbele wanɛ tshɛ woosukɛ bu la ekomelo, wanɛ waya l’ɔkɔngɔ hawotowɔngɛnangɛna.+ Dui sɔ nto diekɔ anyanya oko onto latatshanya lɔpɛpɛ.