Isaya
6 L’ɔnɔnyi wakavu+ nkumekanga Uziya, dimi lakɛnyi Jehowa odjashi lo kiti ka lowandji ka la diko+ ndo kodiyami, ndo nsɔsɔ y’okutu ande yakalole lo tɛmpɛlɔ. 2 Asarafu wakemala la diko diande; osarafu la osarafu aki la ahafu 6. Osarafu* tshɛ akakombe elungi kande la ahafu 2, akakombe ekolo ande la ahafu 2 ndo akafumbɔka la ahafu 2.
3 Ko ɔmɔtshi akawelɛ okina ate:
“Ekila, ekila, ekila mbele Jehowa kanga lolembelembe.+
Nkɛtɛ k’otondo ndola tɔɔ la lotombo lande.”
4 Ndo ekimedi wa nkuke ya lo asoko wakasukasuka la londjo la ombeka* akɔ, ndo luudu lakalole tɔɔ la edinga.+
5 Ko dimi lakate nte: “Ande dimi kandji lee!
Dimi laya oko odo,*
Nɛ dia dimi lekɔ onto lele la ɛlɔmɔ wa mindo,+
Ndo dimi lekɔ lo mbidjasɛ l’atei w’anto wele la ɛlɔmɔ wa mindo;
Nɛ dia washo ami wambɛna Nkumekanga, Jehowa kanga lolembelembe ndamɛ!”
6 Ko osarafu ɔmɔtshi akafumbɔ oya le mi okime dikalanga dia dja+ lo lonya lande diakandɔshi la manu oma lo elambwelo.+ 7 Nde akasakanya onyɔ ami ko akate ate:
“Eenda, ɛngɔ kɛnɛ kambosakanya ɛlɔmɔ ayɛ.
Onongo ayɛ wambonyɛma
Ndo pɛkato kayɛ kambokombama.”
8 Oma laasɔ, dimi lakoke dui dia Jehowa diata ɔnɛ: “Akɔna ayomotoma ndo ayototshwɛ na?”+ Ko dimi lakate nte: “Dimi ɔnɛ, ontome!”+
9 Ko nde akankadimola ate: “Tshɔka tote anto anɛ wate:
‘Nyu nyayoka mbala ko mbala,
Koko hanyotoshihodia;
Nyu nyayɛna mbala ko mbala,
Koko hanyotokondja ndooko ewo.’+
10 Etɛ etema w’anto anɛ lonyu,+
Etɛ atoyi awɔ lohokotui,+
Ndo diha washo awɔ,
Diaha vɔ mɛna la washo awɔ
Ndo mboka la atoyi awɔ,
Diaha etema awɔ nshihodia
Diaha vɔ ndjokadimɔ ko nkɔnɔ.”+
11 Ko dimi lakate nte: “Jehowa le, polo l’etena kakɔna?” Ko nde akate ate:
“Polo ndo esomba wambohandjɔ la elanyelo aha la onto mbidjasɛ lɔkɔ
Ndo mvudu yaya bu la anto
Ndo wodja wambolanyema ndo waya tɔngɔ to;+
12 Edja ndo Jehowa ambanganya apami etale+
Ndo olawelo wa lo wodja wambonga wolo efula.
13 “Koko etenyi ka dikumi ɔtɔi kayonga lɔkɔ ndo tɔ kayotshumbama, oko osongo wa woke ndo oko osongo wa ɔakɛ wele l’ɔkɔngɔ wa vɔ pembɔma wambotshikala ehekele; lɔtɔngɔ* l’ekila kayonga ehekele kawɔ.”