Isaya
50 Jehowa kata ate:
“Lende ele mukanda w’odiakelo+ wa diwala waki nyangɛnyu lakamakɛndja?
Kana l’atei w’anto wonkole abasa, le na akamanyosondja?
Nyende, l’ɔtɛ wa munga yanyu+ hita mbakanyasondjama,
Ndo l’ɔtɛ wa kɔlɔ yanyu hita mbakawakɛndja nyangɛnyu.+
2 Ko lande na kaki ndooko onto lam’akamaye?
Lande na kele ndooko onto lakankadimola lam’akamelɛ?+
Onde lonya lami lekɔ mondo dia ntshungola,
Kana onde dimi bu la wolo wa mbitsha?+
Nse ya lɔkɔ pɔndaka nɛ dia ashi bu,
Ndo yɔ mvɔka l’ɔtɛ wa mposa k’ashi.
3 Dimi ndɔtshaka olongo la wodjima wa tshududu,+
Ndo dimi mbetɛka dikoto olangitshi awɔ.”
4 Nkum’Olongo Nkumadiɔndjɔ Jehowa akambisha lolemi la anto wetshama,*+
Dia dimi mbeya woho wa nkadimola* ɔnɛ lambɔlɛmba la tshɛkɛta ya dimɛna.*+
Nde memulakami pindju tshɛ;
Nde memulaka toyi diami dia mpokamɛ oko anto wetshama.+
5 Nkum’Olongo Nkumadiɔndjɔ Jehowa akadihola toyi diami,
Ndo dimi komonga ɔtɔmbɔki.+
Dimi kokadimɔ lo lɛkɛ lokina.+
6 Dimi lakasha wanɛ wankɔmɔla ɔkɔngɔ ami
Ndo atama ami le wanɛ wakola ndɛdu.
Dimi kombishɛ elungi kami oma lo akambo washa nsɔnyi ndo oma lo nsɔyi.+
7 Koko Nkum’Olongo Nkumadiɔndjɔ Jehowa ayonkimanyiya.+
Diakɔ diahamatoka nsɔnyi.
Diakɔ diamomoshikikɛ elungi kami oko dive dia silɛksɛ,+
Ndo dimi mbeyaka dia hatoshama nsɔnyi.
8 Ɔnɛ lanyindja ekɔ suke.
Nyɛsɔ temale kaamɛ.*
Akɔna ele la dikambo dia fundami?
Nde asukane lalemi.
9 Eenda, Nkum’Olongo Nkumadiɔndjɔ Jehowa ayonkimanyiya.
Akɔna ayota dia dimi lekɔ la onongo?
Eenda, vɔ tshɛ wayokasɔ oko dihɔndɔ.
Wɛdiya wayowalɛ.
10 Akɔna l’atei anyu ooka Jehowa wɔma
Ndo ahokamɛ dui dia okambi ande?+
Akɔna akakɛndakɛnda lo wodjima wa tshududu aha la yema ya osase?
Nde ayaɛkɛ lo lokombo la Jehowa ndo ayasuke le* Nzambi kande.
11 “Nyende, nyu wanɛ tshɛ wahɛtsha dja,
Wafumboya tosase ta dja,
Nyɔkɛndɛkɛndɛ lo osase wa dja yanyu,
L’atei wa tosase ta dja tambonyɔhɛtsha.
Kɛnɛ kayonyolongola oma lo lonya lami tɔ kɛnɛ:
Nyu nyayetama l’atei w’asui.