Jɛrɛmiya
7 Ɔtɛkɛta wa Jehowa wakaye le Jɛrɛmiya ɔnɛ: 2 “Emala lo soko dia luudu la Jehowa kele ewoya losango lɔnɛ laawɔ: ‘Nyohokame ɔtɛkɛta wa Jehowa, nyu ase Juda tshɛ wanɛ wɔtɔ lo asoko anɛ dia ndjokusamɛ Jehowa. 3 Jehowa kanga lolembelembe, Nzambi k’Isariyɛlɛ kata ate: “Nyɔlɔngɔsɔlɛ mboka yanyu ndo etsha anyu, ko dimi layonyotshika dia nyu ntetemala mbidjasɛ lo dihole nɛ.+ 4 Tanyoyaɛkɛke lo ɛtɛkɛta wa kashi ndo tanyotake ɔnɛ: ‘Ɔnɛ ekɔ* tɛmpɛlɔ ka Jehowa, tɛmpɛlɔ ka Jehowa, tɛmpɛlɔ ka Jehowa!’+ 5 Nɛ dia naka nyu mɛtɛ ntshikitanya mboka yanyu ndo etsha anyu; naka nyu mɛtɛ nsukɛ losembwe lam’asa onto la osekande;+ 6 naka hanyosoya angɛndangɛnda, ana wa tshike* ndo wadi waki edo;+ naka hanyɔkɛdia dikila diaha la onongo lo dihole nɛ; ndo naka nyu hanyoyele tozambizambi tokina dia ndjasalɛ kɔlɔ;+ 7 kete dimi layonyotshika dia nyu ntetemala mbidjasɛ lo dihole nɛ, lo wodja wakamasha watshɛnyu pondjo pondjo.”’”*
8 “Koko nyu nyekɔ lo ndjaɛkɛ lo ɛtɛkɛta wa kashi,+ vɔ hawotonyokondjiyɛ ndooko wahɔ. 9 Onde nyu koka mbiva,+ ndjaka, nsala loseka, ntshiba lo kashi,+ nambola Baala elambo*+ ndo ndjela tozambizambi tahanyeye, 10 oma laasɔ ko nyu ndja ndjemala la ntondo kami lo luudu lɔnɛ lele la lokombo lami ndo mbuta ɔnɛ: ‘Sho tayoshimbamɛ,’ kaanga mbasalanyu awui wa wɔnɔnyi asɔ tshɛ? 11 Onde luudu lɔnɛ lele la lokombo lami laya wooko w’apɔtwanyi lo washo anyu?+ Dimi dimɛ lambɛna dikambo sɔ,” mbata Jehowa.
12 “‘Koko, kakianɛ nyotshu lo dihole diami la Shilo,+ lɛnɛ akamakitsha lokombo lami ntondo,+ kele nyotende kɛnɛ kakamadisalɛ l’ɔtɛ wa kɔlɔ ka wodja ami w’Isariyɛlɛ.+ 13 Koko nyu nyakatetemala nsala akambo asɔ tshɛ,’ mbata Jehowa, ‘ndo kaanga mbakamanyotɛka mbala la mbala,* nyu kompokamɛ.+ Dimi lakatetemala nyelɛ, koko nyu kombetawɔ.+ 14 Ɔnkɔnɛ dimi layosalɛ luudu lele la lokombo lami,+ lɔnɛ layaɛkɛnyu lɔkɔ+ ndo dihole nɛ diakamanyosha nyu la watshɛnyu, oko wakamasalɛ Shilo.+ 15 Dimi layonyotshanya oma lo washo ami, oko wakamatshanya anangɛnyu tshɛ, tokanula tshɛ ta Efrayimɛ.’+
16 “Koko wɛ, tɔlɔmbake lo wahɔ w’anto anɛ. Tolelake, tosalake dɔmbɛlɔ kana sɛngasɛngami lo wahɔ awɔ,+ nɛ dia dimi hantokohokamɛ.+ 17 Onde wɛ hɛnyi kɛnɛ kasalawɔ lo esomba wa Juda ndo lo toshinga ta la Jɛrusalɛma? 18 Ana wekɔ lo ntshumanya nkunyi, ambutshi w’apami wekɔ lo mpɛtsha dja, ndo wadi wekɔ lo nsɔha ofushi dia nsala ekate wa nambola Nkumekanga ka womoto ka l’Olongo,*+ ndo vɔ wekɔ lo pongolɛ tozambizambi tokina elambo wa lotɛ dia mbokiyami nkɛlɛ.+ 19 ‘Onde dimi mbasalɛwɔ kɔlɔ?’* mbata Jehowa. ‘Onde aha vɔamɛ, dikambo dia nsɔnyi kawɔ hita?’+ 20 Ɔnkɔnɛ, Nkum’Olongo Nkumadiɔndjɔ Jehowa kata ate: ‘Eenda, nkɛlɛ kami ndo odudu ami wayohongɔ lo dihole nɛ,+ le onto ndo le nyama, lo esongo wa l’okonda ndo lo elowa w’oma lo nkɛtɛ; tɔ kayotshumba ndo hatodimala.’+
21 “Jehowa kanga lolembelembe, Nzambi k’Isariyɛlɛ kata ate: ‘Nyotshu otsha la ntondo, nyokotsha elambo anyu wa lotshumba w’etondo lo elambo anyu ekina ndo nyole emunyi nyuamɛ.+ 22 Nɛ dia lushi lakamatondja watshɛnyu oma lo wodja w’Edjibito, dimi kɔtɛkɛta la wɔ kana mbadjangɛ lo kɛnɛ kendana la elambo wa lotshumba w’etondo ndo elambo.+ 23 Koko dimi lakawadjangɛ nte: “Nyokitanyiya dui diami, ko dimi layonga Nzambi kanyu ndo nyu nyayonga anto ami.+ Nyu pombaka nkɛndakɛnda lo mboka tshɛ yadjangami, dia akambo tshɛ ndowana le nyu.”’+ 24 Koko vɔ kompokamɛ kana mpokɛ toyi;+ ko vɔ wakakɛndakɛnda lo dikongelo* diawɔ vɔamɛ, la ɛtɛ wolo tshɛ vɔ wakayele etema awɔ wa kɔlɔ+ ndo vɔ wakakalola ɛkɔngɔkɔngɔ lo dihole dia ntshɔ otsha la ntondo, 25 oma ko lushi lakatombe watshɛnyu oma lo wodja w’Edjibito polo ndo ɛlɔ.+ Ɔnkɔnɛ, dimi lakatetemala nyotomɛ ekambi ami tshɛ amvutshi, lo mbatoma lushi tshɛ, mbala la mbala.*+ 26 Koko vɔ wakatone pokamɛmi, ndo vɔ kopokɛ toyi diawɔ.+ Vɔ waki ɛtɛ wolo,* ndo vɔ wakasalaka akambo wa kɔlɔ efula ndeka watshɛwɔ!
27 “Wɛ ayowatɛ ɛtɛkɛta ɛsɔ tshɛ,+ koko vɔ hawotokohokamɛ; wɛ ayowaelɛ, koko vɔ hawotoketawɔ. 28 Ndo wɛ ayota lo dikambo diawɔ ɔnɛ: ‘Ɔnɛ ele wodja waki kokitanyiya dui dia Jehowa Nzambi kawɔ ndo wakatone mbetawɔ ohokwelo. Kɔlamelo yakashishɔ ndo yɔ hayodimɔma l’atei awɔ.’*+
29 “Nya divo diayɛ diahanyemaka,* kashadiɔ, ndo emba lembo l’otanda* lo tokonakona ta hwe, nɛ dia Jehowa ambɔsɛka ndo ambokalɛ lɔlɔnga lɔnɛ lakawomadia. 30 ‘Nɛ dia ase Juda wakasale kɛnɛ kele kɔlɔ lo washo ami,’ mbata Jehowa. ‘Vɔ wakakitsha dikishi diawɔ dia wɔnɔnyi lo luudu lele la lokombo lami, dia lidja mindo.+ 31 Vɔ wakahike ahole wa la diko wa Tɔfɛta kele lo Okidi w’Ɔna Hinɔmɛ,*+ dia ntshumba anawɔ w’apami ndo anawɔ wa wamato lo dja,+ dui diakimi kombidjanga ndo diahatayalaka ndooko lushi l’otema ami.’*+
32 “‘Ɔnkɔnɛ eenda, nshi yekɔ lo ndjaye,’ mbata Jehowa, ‘yahawatowelɛ nto ɔnɛ Tɔfɛta kana Okidi w’Ɔna Hinɔmɛ,* koko Okidi wa Ediakelo. Vɔ wayokundɛka edo la Tɔfɛta polo lam’ayoshila ahole.+ 33 Ndo edo w’anto anɛ wayonga mbo ya ndɛ ya tofudu ta l’olongo ndo ya nyama ya la nkɛtɛ, ko ndooko onto layoyiotsha wɔma.+ 34 Dimi layokomiya londjo l’ɔngɛnɔngɛnɔ ndo londjo l’ɔlɔ, dui dia otshuki ndo dui dia otshukami+ lo esomba wa Juda ndo lo toshinga ta Jɛrusalɛma, nɛ dia wodja wayolanyema.’”+