2 Ɛkɔndɔ

9 Nkumekanga ka womoto ka Shɛba+ akoke lokumu laki Sɔlɔmɔna, ko nde akaye la Jɛrusalɛma dia ndjohemba Sɔlɔmɔna la ambola w’okandokando.* Nde akaye la olui wa woke efula w’anto kaamɛ la kamɛlɔ yakayɛmbaka esɔ ka balasama ndo lokema la paonyi+ la mbɔkɔ y’oshinga wolo. Nde akɔtɔ le Sɔlɔmɔna ko akasawola la nde akambo tshɛ waki lo otema ande.+ 2 Ko Sɔlɔmɔna akakadimola ambola ande tshɛ. Ndooko dui diaki wolo le* Sɔlɔmɔna dia nde mbolembetshiya.

3 Lam’akɛnyi nkumekanga ka womoto ka Shɛba lomba laki la Sɔlɔmɔna,+ luudu lakandake,+ 4 mbo ya ndɛ yaki lo mɛsa ande,+ edjaselo k’ekambi ande, woho wakakitshaka ekambi ande diangɔ lo mɛsa ndo ɛlɔtɔ awɔ, wanɛ wakawodjɛka wanu lo dikɔhɔ ndo elambo wa lotshumba wakandalambolaka mbala la mbala lo luudu la Jehowa,+ nde akakome ewo.* 5 Ɔnkɔnɛ nde akatɛ nkumekanga ate: “Kɛnɛ kakamoke oma lo wodja ami lo dikambo dia kɛnɛ kasalayɛ* ndo lo dikambo dia lomba layɛ kaki mɛtɛ. 6 Koko dimi kombetawɔ kɛnɛ kakamoke polo lam’oyemi ndo lam’amomɛna la washo ami hita.+ Eenda, vɔ kombutɛmi kaanga k’ahende ɔtɔi ka lomba layɛ l’efula.+ Wɛ ndeka kɛnɛ kakamoke la fwa.+ 7 Diɛsɛ le anto ayɛ ndo diɛsɛ le ekambi ayɛ wemala la ntondo kayɛ wonya tshɛ dia pokamɛka lomba layɛ! 8 Jehowa Nzambi kayɛ atombɔme, nde lambokɔngɛnangɛna lo kokitsha lo kiti kande ka lowandji oko nkumekanga dikambo dia Jehowa Nzambi kayɛ. Lam’ele Nzambi kayɛ nangaka Isariyɛlɛ,+ dia vɔ ntetemala pondjo pondjo mbakandakɔsɔnɛ oko nkumekanga kawɔ dia wɛ nsala akambo la losembwe ndo la sambo k’ɔlɔlɔ.”

9 Oma laasɔ, nde akasha nkumekanga talata* 120 ya paonyi+ ndo esɔ ka balasama efula ka mamba kaamɛ la mbɔkɔ y’oshinga wolo. Ndooko lushi lakɔtɔ esɔ ka balasama ngasɔ nto oko kɛnɛ kakasha nkumekanga ka womoto ka Shɛba nkumekanga Sɔlɔmɔna.+

10 Ndo nto, ekambi waki Hirama ndo ekambi waki Sɔlɔmɔna wanɛ wakela paonyi oma la Ɔfira+ wakela ndo esongo w’okolongo la mbɔkɔ y’oshinga wolo.+ 11 Nkumekanga akasale esukɔ wa luudu la Jehowa+ ndo wa luudu* la nkumekanga+ kaamɛ ndo nsɛsɛ la dihomahoma di’eshinga dikambo dia amembi+ la esongo w’okolongo. Ndooko lushi lakɛnama diangɔ sɔ ngasɔ ntondo lo wodja wa Juda.

12 Nkumekanga Sɔlɔmɔna nde lawɔ akasha nkumekanga ka womoto ka Shɛba kɛnɛ tshɛ kakandakombola ndo kakandalɔmbɛ oleki* kɛnɛ kakandela nkumekanga. Oma laasɔ, nde akonɛɛ ko akakalola lo wodja ande kaamɛ l’ekambi ande.+

13 Paonyi yakawelaka Sɔlɔmɔna lo ɔnɔnyi yaki la wotsho wa talata 666 ya paonyi,+ 14 laadiko dia nyɛ yakayaka oma le amundji w’okanda ndo oma le wanɛ wakasondjaka, oma le nkumi ya dikanga tshɛ y’ase Arabiya ndo oma le nguvɛrnɛrɛ ya lo wodja yakelaka paonyi la mfɛsa le Sɔlɔmɔna.+

15 Nkumekanga Sɔlɔmɔna akasale dingawo dia weke 200 la paonyi+ ka losanganya (tɔshɛkɛlɛ* 600 ta paonyi ka losanganya takikɔ lo engawo l’engawo),+ 16 ndo dingawo dia totshitshɛ* 300 la paonyi ka losanganya (mina* 3 ya paonyi yakikɔ lo engawo l’engawo). Oma laasɔ, nkumekanga akadidje lo luudu lelamɛ ɔnɛ Luudu l’Okonda wa Lɛbanɔna.+

17 Ndo nto, nkumekanga akasale kiti ka woke ka lowandji ka la ewanga ndo akakite paonyi ka pudipudi lɔkɔ.+ 18 Wadelo 6 wakikɔ otsha lo kiti kakɔ ndo kihona k’ekolo ka paonyi kakamamatanyema la kiti kakɔ ka lowandji, ndo tɔ kaki la ahole wa nkitsha anya lo wedi akɔ 2 ndo difanelo 2 dia ntambwɛ+ yemadi diaki lo emamu w’ahole wa nkitsha anya. 19 Difanelo dia ntambwɛ+ 12 yemadi diakikɔ lo wadelo akɔ 6, ntambwɛ 1 lo koma ya edelo tshɛ lo wadelo akɔ 6. Ndooko diolelo dikina diakasale ɛngɔ ka ngasɔ. 20 Diangɔ tshɛ dia nkumekanga Sɔlɔmɔna diakawadjaka dinɔnɔ diakasalema la paonyi ndo diangɔ tshɛ dia lo luudu lelamɛ ɔnɛ Luudu l’Okonda wa Lɛbanɔna diakasalema la paonyi ka pudipudi. Ndooko ɛngɔ kakasalema la mfɛsa, nɛ dia mfɛsa akɔsamaka oko ɛngɔ k’anyanya lo nshi ya Sɔlɔmɔna.+ 21 Dikambo masuwa wa nkumekanga wakatshɔka otsha la Tarashishi+ kaamɛ la ekambi waki Hirama.+ Mbala 1 lo ɛnɔnyi 3 tshɛ, masuwa wa Tarashishi wakayaka wayɛmbɛ paonyi, mfɛsa, ewanga,+ nkema ndo ntshumba y’ɛtɛnga.

22 Ɔnkɔnɛ, nkumekanga Sɔlɔmɔna akaleke nkumi ya dikanga tshɛ ya la nkɛtɛ ɔngɔnyi ndo lomba.+ 23 Ndo nkumi ya dikanga ya lo nkɛtɛ k’otondo yakayangaka dia nsawola la* Sɔlɔmɔna dia mpokamɛ lomba lakadje Nzambi ka mɛtɛ l’otema ande.+ 24 Vɔ tshɛ, onto l’onto akayaka la woshasha, mbuta ate diangɔ dia mfɛsa, diangɔ dia paonyi, ahɔndɔ,+ dihomɔ dia ta, esɔ ka balasama, mfalasa ndo mfalo. Ngasɔ mbakadiasalemaka ɔnɔnyi l’ɔnɔnyi. 25 Sɔlɔmɔna aki la nkoto nunu nɛi (4 000) dikambo dia mfalasa yande la pusupusu, ndo mfalasa*+ nunu dikumi la pende (12 000), ko nde akayilame lo esomba wa pusupusu ndo la Jɛrusalɛma+ suke la nkumekanga. 26 Nde akolɛ nkumi ya dikanga tshɛ, oma lo Ɔkɛdi* polo lo ɛtshi ka nkɛtɛ k’ase Filistiya ndo polo l’olelo w’Edjibito.+ 27 Nkumekanga akakonya mfɛsa efula oko mbɔkɔ la Jɛrusalɛma ndo abaya w’olondo efula oko esongo wa lokumu wele la Shɛfɛla.+ 28 Vɔ wakelaka Sɔlɔmɔna mfalasa oma l’Edjibito+ ndo oma lo wedja ekina tshɛ.

29 Lo kɛnɛ kendana l’etenyi kekina k’ɔkɔndɔ wa Sɔlɔmɔna,+ oma l’etatelo polo l’ekomelo kawɔ, shi awui asɔ fundama l’atei w’ɛtɛkɛta w’omvutshi Natana,+ lo prɔfɛsiya ka Ahidja+ ose Shilo ndo l’ɔkɔndɔ wa waɛnɛlɔ wa Ido+ ɔmɛnyi wa waɛnɛlɔ wendana la Jɛrɔbɔama+ ɔna Nebatɛ? 30 Sɔlɔmɔna akolɛ Isariyɛlɛ w’otondo oma la Jɛrusalɛma l’edja k’ɛnɔnyi 40. 31 Oma laasɔ, Sɔlɔmɔna aketama dia momuya kaamɛ la watshɛnde, ko wakookundɛ l’Osomba wa Davidɛ dia she.+ Ko ɔnande Rɛhɔbɔama akayala nkumekanga lo dihole diande.+