2 Ɛkɔndɔ

32 L’ɔkɔngɔ w’akambo asɔ ndo w’etsha wa kɔlamelo ɛsɔ,+ Sɛnakɛribɛ nkumekanga k’Asuriya akaye ndo akɔtwɛ Juda la ta. Nde akadinge esomba wodingami la mpele ndo akalange mbola mpele dia nde mbɔsa esomba akɔ.+

2 Lam’akɛnyi Hɛzɛkiya dia Sɛnakɛribɛ amboya ndo ekɔ lo nanga ndɔsha Jɛrusalɛma, 3 l’ɔkɔngɔ wa nde mimbola ewandji ande la andɔshi ande wa ta kanyi, nde akɔshi yɛdikɔ ya ntedia tɛkɔ dia ashi diaki l’andja w’osomba,+ ko vɔ wakoosukɛ. 4 Anto efula wakatshumana, ko wakatedia tɛkɔ tshɛ ndo ɛkɛdi wakakɛlaka lo wodja, wata vate: “Lande na kahomba nkumi ya dikanga y’Asuriya ndjotana ashi tɔɔ?”

5 Ndo nto, la eshikikelo tshɛ, nde akake ehele k’otondo kakanyukɔ ndo akadiya totshoto lɔkɔ, ko nde akasale ehele kekina l’andja. Nde akalɔngɔsɔla ndo Milo*+ ka l’Osomba wa Davidɛ, ndo nde akasale dihomɔ dia ta* ndo dingawo efula ka mamba. 6 Oma laasɔ, nde akasɔnɛ ewandji w’asɔlayi dia namaka anto ndo akaasanganya lo sɛkɛ dia la soko dia osomba ko akaakeketsha,* ata ate: 7 “Nyoyale la dihonga ndo nyokeketale. Tanyokake wɔma ndo tanyatɛke asolo l’ɔtɛ wa nkumekanga k’Asuriya+ la leemba tshɛ lele la nde, nɛ dia wanɛ wele la so wekɔ efula ndeka wanɛ wele la nde.+ 8 Nde ekɔ la lonya l’emunyi,* koko sho tekɔ la Jehowa Nzambi kaso dia tokimanyiya ndo tɔlwɛ ata.”+ Ko anto wakakeketshama la ɛtɛkɛta wa Hɛzɛkiya nkumekanga ka Juda.+

9 L’ɔkɔngɔ wa laasɔ, etena kaki Sɛnakɛribɛ nkumekanga k’Asuriya la Lakishi+ la wolo ande tshɛ wa diambo,* nde akatome ekambi ande la Jɛrusalɛma le Hɛzɛkiya nkumekanga ka Juda la ase Juda tshɛ waki la Jɛrusalɛma+ dia tota ɔnɛ:

10 “Sɛnakɛribɛ nkumekanga k’Asuriya kata ate: ‘Lo na ayaɛkɛnyu katonyotshikala la Jɛrusalɛma etena kamboyodingama?+ 11 Shi Hɛzɛkiya ekɔ lo nyokesa ndo ekɔ lo nanga nyokimɔ dia nyu mvɔ la ndjala ndo la mposa k’ashi lo mbuta ɔnɛ: “Jehowa Nzambi kaso ayototshungola oma l’anya wa nkumekanga k’Asuriya”?+ 12 Shi Hɛzɛkiya akɔ waamɛ ɔnɛ kakanya ahole wa la diko+ ndo dilambwelo+ dia Nzambi kanyu,* ko nde mbutɛ Juda la Jɛrusalɛma ate: “Nyokusamake la ntondo ka elambwelo 1 ndo lɔkɔ mbahombanyu tshumbaka elambo”?+ 13 Onde nyu hanyeye kɛnɛ kakamasalɛ dimi la watshɛmi anto tshɛ wa lo wedja?+ Onde nzambi ya wedja akɔ yaki la akoka wa ntshungola wedja awɔ oma l’anya ami?+ 14 L’atei wa nzambi tshɛ ya lo wedja ɛsɔ wakalanya watshɛmi, nzambi kakɔna kaki la akoka wa ntshungola wodja ande oma lo anya ami, katonga Nzambi kanyu la akoka wa nyotshungola oma lo anya ami?+ 15 Ɔnkɔnɛ, tanyetawɔke dia Hɛzɛkiya nyokesa ndo nyonganyiya ngasɔ!+ Tanyowetawɔke, nɛ dia ndooko nzambi ka wodja ɔmɔtshi kana ka diolelo dimɔtshi kaki la akoka wa ntshungola wodja ande oma lo anya ami ndo oma lo anya wa watshɛmi. Kete hoke Nzambi kanyu! Onde nde kayonyotshungola oma lo anya ami?’”+

16 Ekambi ande wakatɛkɛta kɔlɔ efula lo dikambo dia Jehowa Nzambi ka mɛtɛ ndo dikambo dia Hɛzɛkiya okambi ande. 17 Ndo nto, nde akafunde mikanda+ dia ntɛnga Jehowa Nzambi k’Isariyɛlɛ+ ndo dia ntɛkɛta kɔlɔ lo dikambo diande ɔnɛ: “Oko nzambi y’ase wedja wa lo wedja ekina yaki kokoka ntshungola anto awɔ oma l’anya ami,+ Nzambi ka Hɛzɛkiya hatotshungola anto ande oma l’anya ami.” 18 Vɔ wakatetemalaka mbelɛ la dui dia wolo l’ɔtɛkɛta w’ase Juda otsha le ase Jɛrusalɛma waki l’omamu w’ehele dia mbaotsha wɔma ndo mbawata asolo la oyango wa vɔ ndjɔsa osomba.+ 19 Vɔ wakatɛkɛta kɔlɔ dikambo dia Nzambi ka Jɛrusalɛma woho wakawatɛkɛta kɔlɔ dikambo dia nzambi y’anto wa la nkɛtɛ yele olimu w’anya w’anto. 20 Koko nkumekanga Hɛzɛkiya nde la omvutshi Isaya+ ɔna Amɔza wakatetemala nɔmba lo dikambo sɔ ndo wakalelaka wenda l’olongo dia nyanga ekimanyielo.+

21 Ko Jehowa akatome ondjelo ndo akadiake andɔshi wa ta+ wa wolo tshɛ, ɛnɔmbɔdi ndo ewandji wa mpango ka nkumekanga k’Asuriya, ko nde akakalola otsha lo wodja ande ele la nsɔnyi. L’ɔkɔngɔ diko, nde akɔtɔ lo luudu* la jambizambi yande, ko anande amɔtshi wakoodiake lɔkɔ la lokuwa la ta.+ 22 Ɔnkɔnɛ, Jehowa akashimbɛ Hɛzɛkiya nde l’ase Jɛrusalɛma oma l’anya wa Sɛnakɛribɛ nkumekanga k’Asuriya, ndo oma l’anya w’anto akina tshɛ, ko akawasha momuya lo bɛkɛ diakɔ tshɛ. 23 Ko anto efula wakela Jehowa weshasha la Jɛrusalɛma ndo wakela Hɛzɛkiya nkumekanga ka Juda+ diangɔ dia amɛna; ndo l’ɔkɔngɔ wa laasɔ, wedja tshɛ wakɔɔlɛmiyaka efula.

24 Lo nshi shɔ, Hɛzɛkiya akandama la hemɔ ndo aki suke la mvɔ, ko nde akalɔmbɛ Jehowa+ ndo nde akookadimola ndo akawosha djembetelo.+ 25 Koko Hɛzɛkiya kokadimola la lowando tshɛ lo ɔlɔlɔ wakawoosalɛ, nɛ dia otema ande wakayala la lotamanya, ko nkɛlɛ ka Nzambi kakaye le nde, le Juda ndo le Jɛrusalɛma. 26 Koko Hɛzɛkiya akatshike ndjadiya lo otema,+ akayakitshakitsha nde l’ase Jɛrusalɛma ko nkɛlɛ ka Jehowa kondja le wɔ lo nshi ya Hɛzɛkiya.+

27 Hɛzɛkiya akayonga la ɔngɔnyi efula ndo la lotombo;+ nde akayasalɛ mvudu ya waombelo+ dikambo dia mfɛsa, paonyi, mbɔkɔ y’oshinga wolo, esɔ ka balasama, dingawo ndo dikambo dia diangɔ tshɛ dia nɛmɔ. 28 Nde akasale ndo apɛngɛ dia mombaka diangɔ dia ntɔngɔ, wanu w’eyoyo ndo esɔ, kaamɛ ndo nkoto ya weho tshɛ wa dongalonga ndo nkoto y’ɛkɔkɔ. 29 Ndo nto, nde akayahikɛ esomba ndo akayala la lokema la dongalonga, ɛkɔkɔ ndo ngɔmbɛ, nɛ dia Nzambi akawosha diangɔ efula ka mamba. 30 Hɛzɛkiya kakatedia kiɔkɔ y’ashi+ ya la diko ya Ngihɔna+ ko nde ndjiɛtɔya otsha lo owɛstɛ otsha l’Osomba wa Davidɛ,+ ndo Hɛzɛkiya akatondoyaka lo olimu ande tshɛ. 31 Koko lam’akatomama tɛɛmba awui taki ewandji wa la Babilɔna dia towombola lo kɛnɛ kendana la djembetelo+ yakɛnama lo wodja, Nzambi ka mɛtɛ akootshike ndamɛ dia mbodja+ lo ohemba+ la oyango wa mbeya kɛnɛ tshɛ kaki lo otema ande.+

32 Lo kɛnɛ kendana l’etenyi kekina k’ɔkɔndɔ wa Hɛzɛkiya ndo etsha ande wa ngandji ka kɔlamelo,+ awui asɔ fundama lo ɛnɛlɔ k’omvutshi Isaya+ ɔna Amɔza, lo Dibuku dia Nkumi ya dikanga ya Juda ndo y’Isariyɛlɛ.+ 33 Oma laasɔ, Hɛzɛkiya aketama dia momuya kaamɛ la watshɛnde ndo wakookundɛ lo dihole diadɛ otsha lo waombo w’ana w’apami wa Davidɛ;+ ase Juda tshɛ ndo ase Jɛrusalɛma wakawosha kɛnɛmɔ lam’akandavu. Ko ɔnande Manase akayala nkumekanga lo dihole diande.