Jɔbɔ
5 “Lam’alangayɛ, elɛ! Onde onto ɔmɔtshi ayokokadimola?
Le okilami akɔna wayoyɛlɛ?
2 Nɛ dia kumbɛkumbɛ yayodiaka kanga enginya,
Ndo ɔkɔmiya wayodiaka ɔnɛ laha la yimba.
3 Dimi lakɛnyi kanga enginya asɔnga edio,
Koko dihole diande dia edjaselo diakadjama mananu la shashimoya.
4 Anande bu lo ekokelo,
Ndo vɔ wambominɔma la soko dia osomba,+ ko ndooko onto laashimbɛ.
5 Ɔnɛ lele la ndjala ndɛka kɛnɛ kanande,
Kiɔsaka kaanga oma l’atei w’atɛndɛ,
Ndo diangɔ diande diambondama lo djonga.
6 Nɛ dia akambo wa kɔlɔ hawotombe oma lo ditshu,
Ndo paa hatombe oma lo nkɛtɛ.
7 Dikambo onto akotɔ dia mɛnaka paa,
Lo mɛtɛ oko watofumbɔka shase ya dja l’olongo.
8 Koko dimi lotɔlɔmba Nzambi,
Ndo dimi lotota dikambo diami le Nzambi,
9 Le Ɔnɛ lasala akambo wa weke ndo wahamanema mfundo,
Akambo wa diambo waheyama mbadia.
10 Nde atɔlɔshaka mvula la nkɛtɛ
Ndo atotomaka ashi lo dikambɔ.
11 Nde atodiyaka mbolambola,
Ndo nde atodiyaka okalema otsha lo panda.
12 Nde atofukutanyaka tokanyi t’akanga wa mayɛlɛ,
Diaha olimu w’anya awɔ ndowana.
13 Nde atondaka akanga wa tomba lo lokeso+ lawɔ hita,
Dia tokanyi t’akanga wa mayɛlɛ ndanyema.
14 La yanyi ya tɛɛ, vɔ pomanaka la wodjima,
Ndo vɔ mamambaka la midi wate kana l’otsho.
15 Nde shimbɛka oma lo lokuwa la ta la l’onyɔ awɔ,
Lo nshimbɛ ose wola oma l’anya wa kanga wolo,
16 Ko mbolambola mongaka la elongamelo,
Koko enyɔ w’anto wa kɔlɔ wambodihama.
17 Eenda, diɛsɛ le onto lahangwemɛ oma le Nzambi;
Ɔnkɔnɛ, totonake ohokwelo wa Kanga-Wolo-Tshɛ!
18 Nɛ dia nde mbishaka paa, koko nde mɔmbaka mpota;
Nde mbɔkɔlaka, koko nde kɔnɔlaka la anya ande.
19 Nde ayokoshimbɛ oma lo mpokoso 6,
Kaanga ka 7 hatokosalɛ kɔlɔ.
20 Nde ayokotshungola oma lo nyɔi lo nshi ya ndjala ka kasha,
Ndo oma lo wolo wa lokuwa la ta lo nshi ya ta.
21 Wɛ ayokokamɛ oma lo lofimbɔ la lolemi,+
Ndo lam’ayoya elanyelo, wɛ hatokioka wɔma.
22 Wɛ ayotondɔ la tɔɔla lo elanyelo ndo lo ndjala,
Ndo wɛ hatoka nyama ya mpango ya la nkɛtɛ wɔma.
23 Nɛ dia mbɔkɔ ya l’oswe hayotokosalɛ kɔlɔ,*
Ndo nyama ya mpango ya l’okonda yayonga lo wɔladi la yɛ.
24 Wɛ ayeya dia luudu layɛ la dipɛma lekɔ lo ekokelo,*
Ndo lam’ayoyenda lo dihole diayɛ dia ndeshaka dongalonga, ndooko ɛngɔ kayoshishɔ.
25 Wɛ ayonga la ana efula,
Ndo tokanula tayɛ tayonga efula oko tombatomba dia la nkɛtɛ.
26 Wɛ ayonga la wolo polo lam’ayoyotshɔ lo diombo,
Oko asudu w’eponga watowotshumanyaka lo eleko kawɔ.
27 Eenda, takasale eyangelo lo dikambo sɔ, ko ekɔ ngasɔ.
Hokamɛ ndo etawɔdiɔ.”