Jɔbɔ
6 Ko Jɔbɔ akakadimola ate:
2 “Otowɛdika wotsho wa lɔkɔnyɔ lami+
Ko lidja kaamɛ la mpokoso kami lo kilɔ lee!
3 Nɛ dia lɔ ndeka lɔkɔngɔ la lo ndjale wotsho.
Diakɔ diamomɔtɛkɛta ɔtɛkɛtatɛkɛta.*+
4 Dikambo mpito ya Kanga-Wolo-Tshɛ yambontshieta,
Ndo yimba yami yekɔ lo nnɔ lɔlɛngɔ layɔ;+
Wɔma w’oma le Nzambi wambɔtɔlɔngana la mi.
5 Onde mponda+ ka l’okonda kayawana etena ketɔ la adiyo,
Kana onde ngɔmbɛ kayawana etena ketɔ la adiyo wa tɔ ndɛ?
6 Onde diangɔ dia ɔlɛlɔ koka ndɛma aha la lɛɛhɔ,
Kana ashi w’oma lo etombatomba kelɛwɔ ngimovɛ wekɔ la dɛtɔ?
7 Dimi* lakatone minanda diangɔ sɔ.
Diɔ diekɔ oko diangɔ diasha hemɔ lo mbo ya ndɛ yami.
8 Otondonga kɛnɛ kalɔmbami kotshama
Ndo Nzambi otondombisha kɛnɛ kakombolami lee!
9 Nzambi otondetawɔ minolami,
Ndo otondosembola lonya lande ko ndjakami lee!+
10 Nɛ dia kaanga dui sɔ diotonsamba;
Lotolembɔlembɔ la ɔngɛnɔngɛnɔ kaanga kemi la paa kahashile,
Nɛ dia dimi hamangunyi ɛtɛkɛta waki l’Ekila.+
11 Onde dimi lekɔ la wolo wa ntetemala nkonga?+
Ndo ekomelo kakɔna kankongɛɛ katomotetemala nsɛna?*
12 Onde wolo ami wekɔ oko wa dive?
Kana onde demba diami diakasalema la nkonga?
13 Onde ekɔ yoho mɔtshi yakokami ndjakimanyiya
Etena kele esukɔ ami tshɛ wambɔmbɛkɔ?
15 Analengo hita wambonga la lokeso+ oko ɔkɛdi wa lo nshi ya tshitshi,
Oko watomaka ashi wa lo ɛkɛdi lo nshi ya tshitshi.
16 Vɔ waya edima la ashi w’okamu,
Ndo lɔkɔ mbatoshɛmaka loonge l’ekama lambɔlɛlɔ.
17 Koko lo eleko kawɔ, vɔ hawonge la ashi ndo vɔ komɛka;
Etena konga laladi la dja, vɔ momaka.
18 Mboka kawɔ kambɛtɔyama;
Vɔ wambɔkɛla otsha l’oswe wa shɛnga ndo wamboshishɔ.
19 Elui w’anto w’oma la Tema+ wamboyanga ashi lɔkɔ;
20 Vɔ wamboshama nsɔnyi l’ɔtɛ wakawayaɛkɛ lɔkɔ wɛkɛkɛ;
Vɔ wambotshɔ lɛkɔ tsho dia tɛmba ɛkɔndjɔ.
22 Onde dimi lakate nte: ‘Nyombisha ɛngɔ kɛmɔtshi,’
Kana onde lakalɔmbɛ dia nyu mbishami woshasha w’oma lo ɔngɔnyi anyu?
23 Onde dimi lakalɔmbɛ dia ntshungɔ oma l’anya w’otunyi
Kana dia shimbamɛ* oma lo anya w’asoyanyi?
24 Nyombetsha, ko dimi layotshikala ki;+
Nyonkimanyiya dia nshihodia munga kami.
25 Ɛtɛkɛta wa losembwe hawosha paa!+
Ko wahɔ akɔna wakoka tanema lo lohango lanyu?+
26 Onde nyekɔ lo mbidja sheke dia manya ɛtɛkɛta ami,
Ɛtɛkɛta w’onto lamboshisha elongamelo,+ watɛmbamaka la lɔpɛpɛ?
28 Ɔnkɔnɛ nyokadimɔ ndo nyomende,
Nɛ dia dimi hantota kashi la ntondo kanyu.
29 Lam’alanganyu, nyonyomɔsɛdingola, tanyonkanɛke kɔlɔ,
Ɛɛ, nyonyomɔsɛdingola, nɛ dia losembwe lami leke kokele.
30 Onde lolemi lami lekɔ lo ntɛkɛta lo yoho ya kɔlɔ?
Onde onyɔ ami hita hawoshihodia kɛnɛ kele kɔlɔ?