Jɔbɔ
15 Elifazɛ+ ose Temana akakadimola ate:
2 “Onde kanga lomba ayokadimola la tokanyi t’anyanya,*
Kana onde nde ayolodia dikundju diande la lɔpɛpɛ l’oma lo ɛstɛ?
3 Mpangwɛ la ɛtɛkɛta eto ekɔ anyanya,
Ndo ntɛkɛta tsho bu la wahɔ.
4 Nɛ dia wɛ ambokitshakitsha wɔma wa Nzambi,
Ndo wɛ hayoleka ndjakiyanya dikambo dia Nzambi.
5 Dikambo munga kayɛ kakɔtɛkɛtsha,*
Ndo wɛ sɔnaka ɛtɛkɛta wa mayɛlɛ.
6 Onyɔ ayɛ hita kambokaanya, koko aha dimi;
Ɛlɔmɔ ayɛ hita mbakɔsɔngwɛ.+
7 Onde wɛ kakotɔ onto la ntondo,
Kana onde eotwelo kayɛ kaki la ntondo ka tokonakona?
8 Onde wɛ pokamɛka sawo dia lo sheke diaki Nzambi,
Kana onde wɛ komiyaka lomba paka le yɛ wɛmɛ?
9 Kakɔna keyayɛ kahateye?+
Kakɔna kashihodiayɛ kahatashihodia?
10 Oyadi akanga wa ndjwe kana esombe wekɔ l’atei aso,+
Esombe woole shɔ.
11 Onde sambelo dia Nzambi hadiokoke le yɛ,
Kana ɛtɛkɛta wakotɛwɔ la lotutsha tshɛ?
12 Lande na kakɛtɔya otema ayɛ,
Ndo lande na kangadimɔ washo ayɛ la nkɛlɛ?
13 Nɛ dia lomu layɛ ndɔshanaka la Nzambi ndamɛ,
Ndo wɛ mbetawɔka dia ɛtɛkɛta wa ngasɔ ntomba oma l’onyɔ ayɛ.
14 Onto okovɔ eende katondonga pudipudi,
Kana onto tshɛ lakotɔ oma le womoto eende katondonga ɔlɔlɔ?+
15 Eenda, nde bu la mbetawɔ le ekilami ande,
Kaanga olongo bu pudipudi lo washo ande.+
16 Kete hoke lam’onga onto wɔnɔnyi ndo mindo,+
Onto lanɔ kɔlɔ oko ashi!
17 Dimi layanga kotɛ; ompokame!
Layanga kɔkɔndɔlɛ kɛnɛ kamomɛna,
18 Kɛnɛ kakakɔndɔla akanga wa lomba oma le washɛwɔ,+
Akambo wakiwɔ kombishɛ.
19 Vɔ ato mbakawasha wodja,
Ndo ndooko ɔngɛndangɛnda wakete l’atei awɔ.
20 Kanga kɔlɔ diɛnɛka l’asui lo nshi yande tshɛ,
L’edja k’ɛnɔnyi tshɛ wakalamema dikambo dia kanga hiadi.
21 Londjo lokiya wɔma lekɔ lo atoyi ande;+
Dengalenga mbowɔtwɛka lo nshi ya ki.
22 Nde hetawɔ dia ayohanda oma lo wodjima;+
Nde ambolamema dikambo dia lokuwa la ta.
23 Nde mbekekɔka atayange mbo ya ndɛ,* ata ate: Lende eeyɔ?
Nde mbeyaka dimɛna dia lushi la wodjima laya suke.
24 Asui ndo shɔkɔ tetemalaka mbootsha wɔma;
Vɔ wambɔɔlɛndja oko nkumekanga kele suke dia ntshɔ tɔlɔsha.
25 Nɛ dia nde ambonyiya lonya lande dia ndɔsha Nzambi ndamɛ
Ndo ambolanga nsɛmanɛ* la Kanga-Wolo-Tshɛ;
26 La ɔtɛ wolo tshɛ nde samanyaka dia mbɔlɔsha,
La engawo kande ka nkeka, ka wolo;*
27 Elungi kande kombama la wata,
Ndo ɛlɔmɔ ande wambodanɛ la wata;
28 Nde mbidjasɛka lo esomba wayolanyema,
Lo mvudu yele ndooko onto layodjasɛ,
Yayonga atota w’ave.
29 Nde hatɔngɔna, ndo ɔngɔnyi ande hawotombama,
Ndo diangɔ diande hadiotohandjɔnɛ lo wodja.
30 Nde hatohandɔ oma lo wodjima;
Loombe la dja layonya dimɔnga diande,*
31 Nde atotakɔke mboka ko ndjaɛkɛ lo kɛnɛ kele anyanya,
Nɛ dia kɛnɛ kakondjande lo mengɔnya kayonga anyanya;
32 Dui sɔ diayosalema la ntondo ka lushi lande,
Ndo ntahe yande hayɔmɔngaki pondjo.+
33 Nde ayonga oko ɔkɔdi wa vinyɔ wakɔsha elowa awɔ ɛlɔlɔki,
Ndo oko osongo w’ɔlivɛ wakɔsha alɛmbɔlɛmbɔ awɔ.
34 Nɛ dia olui w’anto waheye Nzambi* wekɔ ekomba,+
Ndo dja yayotshumba mvudu y’apɛma ya wanɛ walongola mbo y’otsho.
35 Vɔ tshɔɔka paa diemi ndo mbotaka kɛnɛ kele kɔlɔ,
Ndo dikundju diawɔ tondjaka lokeso.”