Etombelo
15 L’etena kɛsɔ, Mɔsɛ nde l’ase Isariyɛlɛ wakembɛ Jehowa+ osambo ɔnɛ:
“Dimi layembɛ Jehowa, nɛ dia nde ambodja otshumba la lotombo.+
Nde ambodindja mfalasa la ombahemi atɔ lo ndjale.+
2 Jah* kele wolo ami la nkudu kami, nɛ dia nde kele panda kami.+
Nde kele Nzambi kami, dimi layowotombolaka.+ Nde kele Nzambi ka shɔmi,+ ndo dimi layowandolaka.+
3 Jehowa ekɔ ɔndɔshi wa ta wa wolo.+ Jehowa kele lokombo lande.+
4 Nde ambodindja pusupusu ya Farawɔ la asɔlayi ande lo ndjale,+
Ndo asɔlayi ande woleki mbeya ta wambodinda lo Ndjale ka Beela.+
5 Ashi wambɔmbɔ wambaakukumɛ. Vɔ wambodinda lo dingunda oko dive.+
6 Jehowa le, lonya layɛ l’omi lekɔ la wolo efula,+
Jehowa le, lonya layɛ l’omi koka mbatshatsha otunyi.
7 Oma lo woke wa lɔnɛnɛ layɛ, wɛ kokaka nkɔsha wanɛ wakɔlɔsha;+
Wɛ akatomi nkɛlɛ kayɛ kalombalomba, ko tɔ kambaatshumba oko nɛngɛsɛ.
8 Oma lo loowe l’oma l’ɛhɛmbɛ ayɛ, ashi wakamɔtshanyemi;
Vɔ wakemadi oko lushi lambowoka nkonge;
Ashi wambɔmbɔ wakakami l’atei wa ndjale.
9 Otunyi akate ate: ‘Layowatshanya! Layowanda!
Layɔsa diangɔ dia dimbo polo lam’ayomohekɔ!*
Layɔsɔmɔla lokuwa lami la ta! Lonya lami layowalanya!’+
10 Wɛ akafufi loowe layɛ, ko ndjale kakaakukume;+
Vɔ wakadindji oko dive lo ashi wambɔmbɔ.
11 Jehowa+ le, jambizambi yakɔna yɛdimi la yɛ?
Ɛdimi la yɛ, wɛ lɛnya ekila kayɛ lo yɛdikɔ y’efula?+
Wɛ lahomba mbokama wɔma la esambo wa lotombo, wɛ lasala akambo wa mamba.+
12 Wɛ akasembodi lonya layɛ l’omi, ko nkɛtɛ yakaamɛnyi.+
13 Oma lo ngandji kayɛ ka kɔlamelo, wɛ ambɔlɔmbɔla anto wakayatshungola;+
Oma lo wolo ayɛ, wɛ ayowalɔmbɔla otsha lo edjaselo kayɛ k’ekila.
Ase Kanana tshɛ wayatɛ asolo.+
16 Vɔ+ wayondama la wɔma ndo la sase.
L’ɔtɛ wa woke woke wa lonya layɛ, vɔ wayoteewala oko dive
Jehowa le, polo ndo anto ayɛ wambeta laawɔ,
17 Wɛ ayotshɔ la wɔ ko ayotaakitsha lo dikona di’etenyi kayɛ k’okitɔ,+
Jehowa le, lo dihole dia shikaa diakayalɔngɔsɔla dia wɛmɛ mbidjasɛ,
Jehowa le, lo tɛmpɛlɔ k’ekila kakayahike l’anya ayɛ.
18 Jehowa ayongaka nkumekanga pondjo pondjo.+
19 Lam’akɔtwɛ mfalasa ya Farawɔ kaamɛ la pusupusu yande ya ta la ambahemi wa mfalasa lo ndjale,+
Jehowa akaakukume+ la ashi wa lo ndjale,
Koko ase Isariyɛlɛ wakakɛndjikɛndji lo nkɛtɛ y’ofumbo l’atei wa ndjale.”+
20 Miriyama laki omvutshi wa womoto ndo kadiyɔ aki Arɔna akahome ngɔmɔ la anya ande ndo wamato tshɛ wakooyele wayahome ngɔmɔ ndo wayanɔ lokombe. 21 Ko Miriyama akaakolaka osambo wakembaka apami, ata ate:
“Nyembee Jehowa, nɛ dia nde ambodja otshumba la lotombo.+
Nde ambodindja mfalasa la ombahemi atɔ lo ndjale.”+
22 L’ɔkɔngɔ diko, Mɔsɛ akamɔ nde la ase Isariyɛlɛ oma lo Ndjale ka Beela, ko akatshu la wɔ l’oswe wa Shura ndo wakatshu l’edja ka nshi 3 l’oswe, koko vɔ kɔmɛna ashi. 23 Vɔ wakatokoma la Mara,*+ koko vɔ kokoka nnɔ ashi wa la Mara, nɛ dia ashi akɔ waki ololo. Diakɔ diakandɔlɛ dihole sɔ ɔnɛ Mara. 24 Ko anto wakatatɛ ngunɛngunɛ Mɔsɛ,+ wata vate: “Ayotɔnɔ?” 25 Nde akalelɛ Jehowa,+ ko Jehowa akɔɔlɔmbɔla otsha lo shongosongo mɔtshi. Lam’akandayitambiya lo ashi, ashi wakashile ololo.
Nde akawadjɛ didjango ndo ɔlɛmbɛ laawɔ, ko Nde akawadje l’ohemba.+ 26 Nde akate ate: “Naka wɛ ayohokamɛ dui dia Jehowa Nzambi kayɛ tshɛ lo tshɛ ndo ayosala kɛnɛ kele ɔlɔlɔ lo washo ande, ayodja yimba lo wadjango ande ndo ayokitanyiya ɛlɛmbɛ ande tshɛ,+ kete dimi hantokotatsha ndooko hemɔ kakamatatsha ase Edjibito,+ nɛ dia dimi Jehowa lekɔ ɔkɔnɔdi ayɛ.”+
27 L’ɔkɔngɔ wa laasɔ, vɔ wakakome la Elimɛ, lɛnɛ aki tɛkɔ 12 di’ashi ndo atoko 70. Ko wakahange laawɔ suke la ashi.