1 Nkumi ya dikanga
9 Kam’akashidiya Sɔlɔmɔna mbika luudu la Jehowa, luudu* la nkumekanga+ ndo kɛnɛ tshɛ kakakombola Sɔlɔmɔna nsala,+ 2 Jehowa akɛnama le Sɔlɔmɔna mbala ka 2, oko wakandɛnama le nde la Ngibiyɔna.+ 3 Jehowa akawotɛ ate: “Dimi lamboka dɔmbɛlɔ diamboyosala la ntondo kami ndo ɛsɛngɔsɛngɔ ayɛ dia mpomɔ lokolo l’ɔlɔ. Dimi lambokidia luudu lɔnɛ lamboyoka lo mbidja lokombo lami lɔkɔ+ pondjo, ndo washo ami la otema ami wayongaka nshi tshɛ laawɔ.+ 4 Naka wɛ nkɛndakɛnda la ntondo kami oko wakakɛndakɛnda Davidɛ+ dia shɔ la otema w’olowanyi+ ndo la losembwe,+ lo nsala kɛnɛ tshɛ kamomokodjangɛ+ ndo lo nkitanyiya wadjango ami la dombwelo diami,+ 5 kete dimi layoshikikɛ kiti ka diolelo diayɛ lo Isariyɛlɛ pondjo pondjo, oko wakamalake Davidɛ dia shɔ nte: ‘Ndooko onyake onto ɔmɔtshi la lo ɔlɔndji ayɛ kayodjasɛka lo kiti ka lowandji k’Isariyɛlɛ.’+ 6 Ko naka wɛ l’anayɛ nyambotshika ndjelami ndo hanyokitanyiyisha ɛlɛmbɛ ami la wadjango ami wamomokitsha la ntondo kanyu, ko nyambotshɔ tokambɛ tozambizambi tokina ndo nyambotikusamɛ,+ 7 dimi layonya Isariyɛlɛ oma lo wodja wakamawasha+ ndo luudu lamomokidia dikambo dia lokombo lami, dimi layolinya oma lo washo ami+ ndo Isariyɛlɛ ayonga ɛngɔ ka lɔsɔkɔ* ndo ka diɔnyɔ le anto tshɛ.+ 8 Luudu lɔnɛ layonga tota di’elanyelo.+ Onto tshɛ layetaka laawɔ ayambaka ndo ayodaka kioko, ata ate: ‘Lande na kakasalɛ Jehowa wodja ɔnɛ ndo luudu lɔnɛ nganɛ?’+ 9 Ko wayowatɛ vate: ‘Nɛ dia vɔ wakasɛkɛ Jehowa Nzambi kawɔ lakatondja watshɛwɔ oma lo wodja w’Edjibito ndo vɔ wakamamema tozambizambi tokina, wakatikusamɛ ndo wakatikambɛ. Diakɔ diakawaela Jehowa mpokoso kɛnɛ tshɛ.’”+
10 L’ekomelo k’ɛnɔnyi 20 wakake Sɔlɔmɔna mvudu yakɔ 2, luudu la Jehowa la luudu* la nkumekanga,+ 11 ko Hirama+ nkumekanga ka Tura ambosha Sɔlɔmɔna esongo w’olondo, esongo wa dihake kaamɛ ndo lofulo la paonyi lakandakombola,+ ko nkumekanga Sɔlɔmɔna akasha Hirama esomba 20 lo ɛtshi ka nkɛtɛ ka Ngalileya. 12 Ko Hirama akonɛɛ oma la Tura dia tenda esomba wakawosha Sɔlɔmɔna, koko nde kombangɛnangɛna.* 13 Nde akate ate: “Ɔnalengo, woho akɔna w’esomba wamboyombisha ɛnɛ?” Ɔnkɔnɛ vɔ mbelamɛka ɔnɛ Nkɛtɛ ya Kabulu* polo ndo ɛlɔ. 14 L’etena kɛsɔ, Hirama akatomɛ nkumekanga talata* 120 ya paonyi.+
15 Ɔnɛ ele ɔkɔndɔ wa wanɛ wakakitsha nkumekanga Sɔlɔmɔna dia mbakandjaka elimu la wolo+ dia mbika luudu la Jehowa,+ luudu* lande hita, Milo,*+ ehele ka Jɛrusalɛma, Hazɔra,+ Mengido+ ndo Ngezɛrɛ.+ 16 (Farawɔ nkumekanga k’Edjibito akaye ko akaamamala la Ngezɛrɛ, akakitshumbe la dja ndo nde akadiake ase Kanana+ wakadjasɛka l’osomba akɔ. Ɔnkɔnɛ nde akasha ɔnande la womoto+ lakatshukama le Sɔlɔmɔna osomba akɔ oko dɔngi.*) 17 Sɔlɔmɔna akake* Ngezɛrɛ, Bɛtɛ-Hɔrɔna ka l’Ɛse,+ 18 Baalata+ ndo Tamara lo oswe, l’etei ka wodja akɔ, 19 kaamɛ ndo esomba tshɛ wa mombaka diangɔ waki Sɔlɔmɔna, esomba wa pusupusu,+ esomba w’ambahemi wa mfalasa ndo kɛnɛ tshɛ kakakombola Sɔlɔmɔna dia mbika la Jɛrusalɛma, la Lɛbanɔna ndo lo wodja w’otondo wakandolɛka. 20 Lo kɛnɛ kendana l’anto tshɛ wakatshikala oma laka ase Amɔra, ase Hiti, ase Perizi, ase Hivi ndo ase Jɛbusɛ,+ wanɛ waki komonga ase Isariyɛlɛ,+ 21 tokanula tawɔ takatshikala lo wodja, mbuta ate wanɛ waki ase Isariyɛlɛ kokoka mbadiaka, Sɔlɔmɔna akaakitsha dia mbakandjaka elimu la wolo oko mfumbe polo ndo ɛlɔ.+ 22 Koko Sɔlɔmɔna kombetɛ kaanga ose Isariyɛlɛ 1 mfumbe,+ nɛ dia vɔ waki andɔshi ande wa ta, ekambi ande, ewandji ande, ewandji ande w’asɔlayi ndo ewandji w’anto ande wakotola pusupusu ndo w’ambahemi ande wa mfalasa. 23 Ewandji 550 wakikɔ dikambo dia topita takendaka olimu waki Sɔlɔmɔna, ewandji w’anto wakakambaka olimu.+
24 Ko ɔna Farawɔ la womoto+ akaye oma l’Osomba wa Davidɛ+ oya lo luudu lande hita lakawawokɛ. Oma laasɔ, Sɔlɔmɔna akake Milo.*+
25 Mbala 3 l’ɔnɔnyi,+ Sɔlɔmɔna akalambolaka elambo wa lotshumba ndo elambo w’osanga lo elambwelo kakandasale dikambo dia Jehowa,+ ndo nde akatshumbaka elambo lo elambwelo kakɔ kaki la ntondo ka Jehowa; ko nde akashidiya luudu+ lakɔ.
26 Ndo nto, nkumekanga Sɔlɔmɔna akasale olui wa masuwa la Eziɔna-Ngɛbɛrɛ+ wele suke la Elɔtɛ lo omamu wa Ndjale ka Beela kele lo wodja w’Ɛdɔmɛ.+ 27 Hirama akatome ekambi ande kaamɛ la olui wa masuwa,+ apami weya ashi dimɛna dia tokamba kaamɛ la ekambi waki Sɔlɔmɔna. 28 Vɔ wakatshu otsha la Ɔfira+ ko wakatoya la talata 420 ya paonyi ndo wakayiela le nkumekanga Sɔlɔmɔna.